Kutuhuka 5 - Mukanda Wa Zambi 1970

Mose ni Arone ku meso ja mwanangana wa Egiptu

¹ Mba Mose ni Arane yaaya maha mwanangana wa Egiptu ni kumulweza ngwo: “Mwene Zambi, Zambi ya Aisraele, kanambe ngwenyi: ‘Echa atu jami aye akangulingile chiwanyino mu puya ni kungulemesa.’ ”

² Mwanangana ngwenyi: “Mwe Mwene Zambi kali iya? Mumu yika Changutamba kumwivwa ni kwecha Aisraele kuya? Mwene Zambi yoze, yami chamunyingikine, chahashile kwaha Aisraele jila ha kuya.”

³ No yaamba ngwo: “Zambi ya Ahebreu hatusolokela. Twalemba, twehe jila ya wenyi wa matangwa atatu mu puya, hanga tukalambule Mwene Zambi, Zambi yetu, mulambu. Nyi ka, matushiha ni misongo hanji ni jita.”

⁴ Mwanangana wa Egiptu yambila Mose ni Arone ngwenyi: “Mumu yika nunachiza atu ku milimo yo? Hilukenu ku milimo yenu.

⁵ Yenu hinwoka, hinwahiana akwa chifuchi. Ni haliabwila hinwecha kulinga milimo!”

⁶ Ha tangwa lizeliene mwanangana yalweza akwa lutwe a milimo, akwa Egiptu ni tupita Aisraele ngwenyi:

⁷ “Kanda nwaha nawa mwambu wa kulinga nawo tujolo (briki) ngwe hatangu. Chatamba kuufupa ayo ene.

⁸ Alioze kanda nukehesa tujolo (briki), alinge chizechene nikulita ni kwalula chitangu. Atu haabwa ni ngwaza, kashika anambe ngwo: ‘Tutayize tuye tukalambule Zambi yetu milambu.’

⁹ Nwaaha milimo yikalu lume, akahondangane, hanga keechi kubanjika nawa ku maliji a mahuza.”

¹⁰ Akwa lutwe a milimo ni tupita yaambila atu ngwo: “Mwanangana hamba ngwenyi: ‘Chichi kunwaha nawa mwambu.

¹¹ Yenwene munuya ni kufupa kweswako munuuwana, alioze kwalula cha tujolo (briki) muchibwa ngwe hatangu.’ ”

¹² Mba atu yaamwangana mu chifuchi cheswe cha Egiptu ha kufupa yiswaswa.

¹³ E akwa lutwe a milimo yaabikalisa ngwo: “Chanutamba kulinga tujolo (briki) tangwa ha tangwa nikulita ni kwalula chitangu muze te twakunwaha mwambu.”

¹⁴ Mba akwa lutwe a milimo a mwanangana yaabutuka kulamba tupita Aisraele waze te akutala akwa milimo, yaahula ngwo: “Kuchi kunwalingile tujolo (briki) nikulita ni kwalula chitangu?”

¹⁵ Mba tupita Aisraele yaaya ni kulinyenga ku meso ja mwanangana ngwo: “Twalemba mwanangana! Kuchi mba nunatulingi chino?

¹⁶ Kaasolo kutwaha nawa mwambu, yetu ngamba jenu, hindu kaanatwambe ngwo, tulinge tujolo (briki) ngwe hatangu! Ni haliabwila kaanatulambe, yili milonga ya atu jenu.”

¹⁷ Mwanangana ngwenyi: “Nuli ni ngwaza kuhiana, kashika nunambe ngwenu: ‘Tweche tuye tukalambule Mwene Zambi milambu.’

¹⁸ Katukenu, hilukenu ku milimo yenu. Keechi kunwaha mwambu nihakepe, alioze lingenu tujolo (briki) nikulita ni kwalula chitangu.”

¹⁹ E tupita, muze heevwa ngwo, chatamba kulinga tujolo (briki) nikulita ni kwalula chitangu, yaamona ngwo, mba hijakangana.

²⁰ Muze haatuhuka mu zuwo lia mwanangana, yaalitakana ni Mose ni Arane, te kaanaatwaminyina.

²¹ Tupita yaamba ngwo: “Mwene Zambi anutale, anubatwile. Mumu mwanangana ni atu jenyi kaanatubikalisa mumu hali yenu. Yenu nwamwaha mwanangana mukwale ha kutushiha.”

Mose yalinyenga ku meso ja Mwene Zambi

²² Mose yalinyenga ku meso ja Mwene Zambi ngwenyi: “Mwene Zambi kuchi mba unalingi atu wano chibi? Yika mba unakangutumina kuno?

²³ Chize kuze ngunakalwezela mwanangana yize yeswe unakangulweza, hindu kanalingi atu je chibi. Alioze yena kuwalingile nichimwe ha kwakwasa!”