Kutuhuka 40 - Mukanda Wa Zambi 1970

Mose yamika zuwo lia Zambi, yalikunjika kuli Zambi

¹ Mwene Zambi yambila Mose ngwenyi:

² “Ha tangwa litangu lia kakweji mutangu ukamika zuwo lia Zambi lia makubu.

³ Mushete wa Usendo muze muli Shimbi kumi, ukaunjisa mu zuwo, Ukazezeleka chikalakala kulutwe liawo.

⁴ Ukanjisa mo mesa, Ukasa ho yikashi yaho. Ukanjisa mo nawa mukungo wa ndeya, ni kunangika ho je ndeya.

⁵ Kulutwe lia mushete wa Usendo, Ukasa ko chilumbilo cha oru cha kwochela yuma ya vumba libema, mba ukazezeleke chikalakala ku chikolo cha zuwo.

⁶ Ukasa chilumbilo cha kwochela milambu kulutwe lia zuwo.

⁷ Ukanangika lumbashila hakachi ka chilumbilo ni zuwo, mba ukase meya mu lumbashila.

⁸ Ukamika chipanga mba ukazezeleke chikalakala ku chikolo.

⁹ “Mba ukande maji ukakwite zuwo lia Zambi ni yikashi yeswe yize yilimo, ha kuyikunjika.

¹⁰ Ukakwita nawa maji ku chilumbilo cha kwochela milambu ni yikashi yacho yeswe ha kuyikunjika. Chenacho muyikabwa ya chijila kuhiana.

¹¹ Ukakwita nawa maji ku lumbashila lwa kusanyina ni nganda yalwo ha kulukunjika.

¹² “Ukaneha Arone ni ana jenyi a malunga ku chikolo cha zuwo lia Zambi mba ukaalweze akasane meya.

¹³ Ukajika Arone mahina ja mahako, mba ukamuwayise maji ni kumukunjika ku moko jami, hanga angulingile milimo ya uhako.

¹⁴ Ukaneha nawa ana ja Arone a malunga, ukaajike yikuto,

¹⁵ mba Ukaawayise maji ngwe chize unakawayisa tato, hanga angulingile milimo ya uhako. Kuwayisa chize muchikaapwisa mahako ndoo ku miaka yeswe.”

¹⁶ Mose yalinga yuma yeswe ngwe chize amwambile Mwene Zambi.

¹⁷ Chenacho, ha tangwa litangu lia kakweji mutangu, ha mwaka wa muchaali chize kuze atuhukile mu chifuchi cha Egiptu, yaamika zuwo lia Zambi lia makubu.

¹⁸ Mose yasa yimanyino, yamika mabaya, yanjisa mikambo, yamika manguji,

¹⁹ yasa fulumba litangu ni lia muchaali lia zuwo lia Zambi, ngwe chize amwambile Mwene Zambi.

²⁰ Mba yanda mawe aali a Shimbi kumi, yaasa mu mushete wa Usendo wa Zambi ni atu. Yanjisa mikambo mu maswi ja mushete, mba yasa ho chifuko, he homa ha kukukila milonga.

²¹ Mba yanda mushete yausa mu zuwo lia Zambi, yazezeleka chikalakala ha kufuka mushete uze uli ni mawe a Shimbi kumi, ngwe chize amwambile Mwene Zambi.

²² Mose yasa mesa muma mwa chijila ku sali lia norde,

²³ mba yasa mbolo ya kutumbieka ha mesa, ku meso ja Mwene Zambi, ngwe chize amwambile Mwene Zambi.

²⁴ Yasa ndeya mu zuwo ku sali lia sude, ha talanganyi ni mesa.

²⁵ Yawika ndeya ku meso ja Mwene Zambi, ngwe chize amwambile Mwene Zambi.

²⁶ Yasa nawa chilumbilo cha oru mu zuwo, kulutwe lia chikalakala,

²⁷ mba yochela ho yuma ya vumba libema, ngwe chize amwambile Mwene Zambi.

²⁸ Yazezeleka chikalakala ku chikolo cha zuwo.

²⁹ Kulutwe lia chikalakala yasa ko chilumbilo cha kwochela milambu, mba yochela ho milambu ya kwocha ni milambu ya mbuto, ngwe chize amwambile Mwene Zambi.

³⁰ Yasa lumbashila hakachi ka chilumbilo ni zuwo mba yasa mo meya a kusana.

³¹ Mose, ni Arone, ni ana jenyi a malunga te kakusanyina mo moko ni molu

³² muze te akunjila mu zuwo lia Zambi, ni muze akukundama ku chilumbilo, ngwe chize Mwene Zambi ambilile Mose.

³³ Mose yatunga chipanga yichijingilika zuwo lia Zambi ni chilumbilo, mba yazezeleka chikalakala ku chikolo. Chenacho amanunwine milimo yeswe.

Lelwa yilifuka zuwo lia Zambi

³⁴ Hohene lelwa yilifuka zuwo lia Zambi lia makubu, ni uhenya wa Zambi yiuzalisa lie zuwo.

³⁵ Kashika te Mose kahashile kunjila mo.

³⁶ Aisraele te kaakukatuka ha musumba ni kuya, muze lelwa hiliazunduka ha zuwo lia Zambi.

³⁷ Alioze nyi kuliazundukile, Aisraele kaakatukile ko.

³⁸ Ufuku ni mwalwa Aisraele lelwa lize yaalimona ngwo: “Kuma Zambi kali mukachi ketu.” Ha mwalwa te liakusoloka ngwe lelwa helu lia zuwo lia Zambi. Ha ufuku mulibwa ngwe kahia. Chenacho chabwile mu wenyi wo weswe.