Kutuhuka 4 - Mukanda Wa Zambi 1970

Zambi yamwaha Mose tachi ja kulinga najo yilayi

¹ Mose yakumbulula Mwene Zambi ngwenyi: “Alioze Aisraele keechi kangufunda, chibwe kungubanjika. Mumu maakamba ngwo: ‘Mwene Zambi kakusolokelele.’ ”

² Mwene Zambi yamuhula ngwenyi: “Yika unakwata?” Mose ngwenyi: “Lukanda.”

³ Mwene Zambi ngwenyi: “Mumbile hashi.” Muze Mose hamumbila hashi, yalumuka kapela, Mose yamuchina.

⁴ Mba Mwene Zambi yambila Mose ngwenyi: “Mukwate ku muchila.” Mose yamukwata; kweseka habwa nawa lukanda.

⁵ Mwene Zambi ngwenyi: “Ukalinge Chenacho hanga Aisraele akafuliele ngwo, Mwene Zambi, Zambi ya akakenu, Zambi ya Abrahama, ni Isake, ni Yakoba, hinakusolokela.”

⁶ Mwene Zambi yambila nawa Mose ngwenyi: “Njisa kwoko lie mu tulo.” Mose yalinjisa, muze halichiza yilibwa ni mbumba yitoma ngwe chiwe.

⁷ Mwene Zambi ngwenyi: “Hilwisa kwoko lie mu tulo.” Mose yalihilwisa, muze halituhwisa nawa, yilibwa libema ngwe mujimba wenyi weswe.

⁸ Mwene Zambi ngwenyi: “Nyi keechi kakufuliela ku chilayi chitangu, maakakufuliela ku chilayi cha muchaali.

⁹ Nyi keechi kakufuliela ku yilayi yino yaali, nawa nyi kaakubanjikile, ukaswita meya a mu Nile, muwamwangina hashi, kumaakalumuka manyinga.”

¹⁰ Mose yakumbulula Mwene Zambi ngwenyi: “Nalemba Mwene Zambi, nguli mukwa chilimi. Nilimwe tangwa kanda nguhanjika kama kanawa ku meso ja atu anji, chibwe ku miaka ya kunyima, chibwe chize ku shimbu lize wabutuka kuhanjika ni yami kavumbi ke.”

¹¹ Mwene Zambi ngwenyi: “Iya wahele mutu kanwa? Iya wakupwisa mutu kafwa matwi hanji kanaye? Iya wakupwisa meso ja mutu, hanji kumupwisa kapuputa? Hi yami Mwene Zambi ko, nyi?

¹² Haliabwila yako. Yami mungukakukwasa kuhanjika, mungukakulweza yize muukamba.”

¹³ Alioze Mose ngwenyi: “Nalemba mwane, tuma kama mutu weka, mweswawo unazange.”

¹⁴ Mba Mwene Zambi yatenukina Mose ngwenyi: “Yayenu Arone, wa ku vungu lia Levi, keshiko nyi? Ngunanyingika kakuhanjika kanawa. Ni mwene kaneza ni kukubatwiza, kumawahilila ha kukumona.

¹⁵ Yena muukamwambulwila yize chamutamba kuhanjika. Mungukanukwasa yenu eswe aali ha kuhanjika, mungukanulweza nawa yiza munukalinga.

¹⁶ Arone mwe makakuhanjikila kuli atu, mba yena muukabwa ngwe Zambi, yoze unamulweze yize chamutamba kuhanjika.

¹⁷ Anda lukanda we, ukalinge nenyi yilayi.”

Mose yahiluka ku Egiptu

¹⁸ Mose yahiluka ku zuwo lia ukwe wenyi Jetro, yamwamba ngwenyi: “Ngutayize kama kuhiluka kuli usoko wami mu chifuchi cha Egiptu, ha kumona nyi kaali kanawa nyi ka.” Jetro yatayiza ngwenyi: “Yako kanawa.”

¹⁹ Mwene Zambi yambila Mose shimbu te kanda achikatuka mu chifuchi cha Midiane, ngwenyi: “Hiluka ku Egiptu. Eswe waze ambile kukushiha haanafu.”

²⁰ Chenacho Mose anjile pwo lienyi ni ana jenyi a malunga, yaalumbika ha chimbulu nikuhiluka ku Egiptu. Yambata nawa lukanda wa Mwene Zambi.

²¹ Mwene Zambi yambila Mose ngwenyi: “Haliabwila unahiluka ku Egiptu, nyingika ngwe, yilayi yeswe yize hinakulweza chatamba kuyilinga ku meso ja mwanangana. Alioze mungukakalisa mbunge yenyi, hanga kechi kecha Aisraele akaye.

²² Mba muukamulweza ngwe: ‘Mwene Zambi kanambe ngwenyi, Israele kali mwanami mutangu wa lunga.

²³ Hinakulweza weche mwanami aye akangulingile, alioze hiwalituna. Haliabwila mungushiha mwane mutangu.’ ”

²⁴ Mu jila ya kuya ku Egiptu, ku zuwo Ha ngeji, Mwene Zambi yasolokela Mose, yamba kumushiha.

^25-26 Mba Zipora, pwo lia Mose, yanda liwe lia lutwilo, yenga mwanenyi. Mba yanda musosha uze wa mwanenyi, yausa ha molu ja lunga lienyi. Mba Mwene Zambi yecha Mose. Zipora yambila Mose ngwenyi: “Chamwenemwene, uli lunga liami wa manyinga”. Yachamba mumu hali mwana yoze engele.

²⁷ Mwene Zambi te halweza kulu Arane ngwenyi: “Yako utakane ni Mose mu puya.” Neye yaya ni kubatwiza Mose ha mulundu wa Zambi. Muze haalitakana, Arane yamushisa.

²⁸ Mose yambulwila Arane yeswe yize amulwezele Mwene Zambi muze amwambile ahiluke ku Egiptu. Yamwambulwila nawa chize Mwene Zambi amulwezele kulinga yilayi.

²⁹ Mba Mose ni Arane yaaya ku Egiptu. Yaakungulula miata eswe ja Aisraele hamuwika.

³⁰ Arane yaalumbunwina maliji eswe waze Mwene Zambi alwezele Mose. Mba Mose yalinga yilayi yeswe ku meso ja atu.

³¹ E atu yaafuliela. Muze heevwa ngwo, Mwene Zambi heza ni kwanangisa ni hamona lamba lize akwa Egiptu anaamwesa, yaafulamana, yaawayila Zambi.