Kutuhuka 39 - Mukanda Wa Zambi 1970

Atu yaanuka mahina ja mahako ja Zambi

¹ Atu yaalinga mahina abema a mahako ja Zambi ni Wanda ulauluka, ni wa ufungo, ni uchila, akulingila no muma mwa chijila. Yaalingila Arone mahina waze a chijila ngwe chize Mwene Zambi alwezele Mose.

² Yaanuka chikuto chihi ni mahina atoma alefuna, ni Wanda ulauluka, ni wa ufungo, ni uchila, ni Wanda wa oru.

³ Yaatatula ye oru hanga yikabwe ngwe lifwo linene, mba yaayibulabula ni kuyoola hamwe ni Wanda ulauluka, ni wa ufungo, ni uchila ku mahina atoma alefuna.

⁴ Yaanuka miya yaali ha kukasa nayo chikuto chihi ha yipaya, yaayinukina ku masongo a chikuto.

⁵ Yaanuka nawa muya wa kuzalila che chikuto ni mahina waze ene, yaaunukina ku chikuto, ngwe chize Mwene Zambi alwezele Mose.

⁶ Yaasonga mawe achila a uhenya a kunjisa mu yituwa ya oru, yoola ho majina kumi ni aali ja ana ja Israele a malunga.

⁷ Yaalamika ha miya ya ha yipaya ya chikuto chihi ha kwiwuluka mavungu kumi ni aali ja Aisraele, ngwe chize Mwene Zambi alwezele Mose.

Atu yaanuka chibwiko

⁸ Yaanuka chibwiko ni mahina waze ene ngwe chikuto chihi, yaachola nawa chizechene.

⁹ Yaachikoneka haali, masongo eswe awana yaabwa chimuwika, sentimetro makumi aali ni jaali.

¹⁰ Yaalamika mikala yiwana ya mawe a uhenya ha chibwiko. Ha mukala utangu yaasa ho mawe wano: lichila, ni lia usungwa, ni lichiluluka.

¹¹ Ha mukala wa muchaali; lia mafwo a matamba, ni lilauluka, ni liama.

¹² Ha mukala wa muchitatu; lia umbundu, ni lia mifundamifunda, ni lia ufungo.

¹³ Ha mukala wa muchiwana: lia mbundumbundu, ni lichila hakepe, ni lia bundumuka. Yaasa mu yituwa ya oru.

¹⁴ Ha mawe kumi ni aali, liwe ni liwe yoola ho jina lia mwana umuwika wa Israele wa lunga, ha kwiwuluka mavungu kumi ni aali ja Aisraele.

¹⁵ Yaafula mihipu yaali ya oru yibema ni kuyikashila ha chibwiko.

¹⁶ Yaafula yikwachilo yaali ni ngo jaali ja oru. Yaaswika je ngo ku masongo ja chibwiko helu.

¹⁷ Yaakasa mihipu yize yaali ya oru ku ngo jize,

¹⁸ ni masongo akwo aali a mihipu yaayikashila ku miya ya ha yipaya ya chikuto chihi.

¹⁹ Yaalinga nawa ngo jaali ja oru, yaajiswika ku masongo kushi lia chibwiko, hehi ni chikuto chihi.

²⁰ Yaafula ngo jaali jikwo ja oru, yaajiswika ha bambo ku miya yaali ya ha yipaya, hehi ni unungino, helu lia muya wa chikuto chihi.

²¹ Yaakashila ngo ja chibwiko ku ngo ja chikuto chihi ni lwoji mulauluka, hanga chibwiko kuchichi kukasuluka ku chikuto, ni hanga chibwe helu lia muya wa chikuto, ngwe chize Mwene Zambi ambilile Mose.

Atu yaanuka mahina akwo ja mahako

²² Yaanuka chikuto chisuku ni mahina a ngona ja mapanga alauluka, ha kufuka chikuto chihi.

²³ Yaasa chituwa cha kutuhwishila mutwe. Chituwa chize yaachikundula ni Wanda wa ngona ja mapanga, kuchina chikuto muchifwa.

²⁴ Ku songo lia chikuto yaanuka ko mafufu, alifwa ngwe mihuko ya granade, ya Wanda utoma walefuna, ni Wanda ulauluka, ni wa ufungo, ni uchila.

^25-26 Yaafula yiwolowolo ya oru yibema, yaayisowela ni mafufu, ha kujingilika ku songo lia chikuto, ngwe chize Mwene Zambi alwezele Mose.

^27-28 Yaanuka yikuto, ni kapusa, ni yifulu, ni tuputula a mahina atoma alefuna, ya Arone ni ana jenyi a malunga.

²⁹ Yaanuka nawa muya wa hina litoma lia lefuna, ni wa Wanda ulauluka ni wa ufungo ni uchila, yaawola ni utotombo, ngwe chize Mwene Zambi ambilile Mose.

³⁰ Yaafula chibenya cha oru yibema, chilayi cha chijila, yoola ho sona jino: “Munangi wa Mwene Zambi.”

³¹ Yaachikashila kulutwe ha kapusa ni muhipu ulauluka, ngwe chize Mwene Zambi ambilile Mose.

Aisraele yaaswisa yuma yeswe

³² Aisraele yaaswisa yuma yeswe ya zuwo lia Zambi lia makubu, yaalinga yuma yeswe ngwe chize Mwene Zambi ambilile Mose.

³³ Yaanehena Mose zuwo lia makubu ni yikashi yalio yeswe: ngo, ni mabaya, ni mikambo, ni manguji, ni yimanyino;

³⁴ ni fulumba lia makubu a makuji a panga, akulomba achila; ni fulumba lia malambu abema; ni chikalakala cha kufuka mushete wa Usendo;

³⁵ ni mushete wa Usendo ni mawe a Shimbi kumi mukachi, ni mikambo yawo, ni chifuko chawo;

³⁶ ni mesa ni yikashi yayo, ni mbolo yakutumbieka ku meso ja Zambi;

³⁷ ni mukungo wa ndeya wa oru yibema, ni je ndeya, ni yikashi yajo yeswe, ni maji a ndeya;

³⁸ ni chilumbilo cha oru, ni maji a kuwayisa mahako; ni yuma ya vumba libema; ni chikalakala cha ku chikolo cha zuwo;

³⁹ ni chilumbilo cha unengu ni sambu jacho ja unengu, ni mikambo yacho, ni yikashi yacho yeswe; ni lumbashila ni nganda yalwo;

⁴⁰ ni yikalakala ya chipanga, ni manguji ni yimanyino yacho; ni chikalakala cha ku chikolo cha chipanga ni mihipu yacho; ni mbambo ja zuwo; ni yikashi yalio yeswe;

⁴¹ ni mahina a uhenya waze mahako maazala muze maalinga milimo muma mwa chijila—mahina a chijila a hako Arone ni a ana jenyi a malunga.

⁴² Aisraele yaalinga milimo yeswe ngwe chize Mwene Zambi ambilile Mose.

⁴³ Mose yashishika kutala yuma yeswe yize atu alingile, mba yanyingika ngwenyi, yeswe haayilinga ngwe chize ambile Mwene Zambi. Kashika Mose yaawahisa.