Kutuhuka 38 - Mukanda Wa Zambi 1970

Chilumbilo cha kwochela milambu

¹ Yasonga chilumbilo cha mutondo akasia cha kwochela milambu. Usuhwe ni unene wacho ngeseko yimuwika, metro jaali ni sentimetro 20, chizundamo chacho metro yimuwika ni sentimetro 30.

² Ha mbango ni mbango yasonga ho mbinga yimuwika ya mutondo umuwika ni chilumbilo, mba chilumbilo cheswe yachishila unengu.

³ Yafula yikashi yeswe ya chilumbilo ni unengu: yula ya kukombela uto, ni makombo, ni yenga, ni somo, ni yula ya kwokwela kahia.

⁴ Yafula sambu ja kuseleka ja unengu, yajinjisa kushi lia mukomo hakachi ka chilumbilo.

⁵ Yafula maswi awana a kumbachila chilumbilo, yaasa ku mbango ni mbango.

⁶ Ye mikambo ya kumbachila yayisonga ya mutondo akasia, yayishila unengu.

⁷ Mba yayinjisa mu maswi a ku mbango ni mbango ya chilumbilo. Yasonga chilumbilo cha mutondo wa akasia, muchima yimubwa pako.

Lumbashila lwa unengu

⁸ Yafula lumbashila lwa unengu lwa kusanyina ni nganda yalwo. We unengu yautambula kuli mapwo waze te akulinga ku chikolo cha zuwo lia Zambi.

Chipanga cha zuwo lia Zambi

⁹ Yatunga chipanga cha yikalakala ya zuwo lia Zambi ni mahina atoma alefuna. Usuhwe wa chipanga ku sali lia sude metro 44.

¹⁰ Ye yikalakala yayizezeleka ha manguji makumi aali a unengu waze amikine mu yimanyino ya unengu makumi aali. Ngo jo ni mikambo yo yayilinga ni prata.

¹¹ Yalinga nawa chizechene ku sali lia norde.

¹² Chikalakala cha ku sali lia chitokelo unene wacho metro 22, yichibwa ni manguji kumi ni yimanyino kumi. Ngo jo ni mikambo yo yayilinga ni prata.

¹³ Unene wa chipanga ku sali lia ku chivumbuko nawa te metro 22.

^14-15 Unene wa chikalakala ku mbango ni mbango ya chikolo te metro 6 ni sentimetro 60 chakuzezeleka ha manguji atatu, akumika mu yimanyino yitatu.

¹⁶ Yikalakala yeswe ya chipanga yaayilinga ni mahina atoma alefuna.

¹⁷ Yimanyino ya manguji yayilinga ni unengu. Ngo, ni mikambo, ni yifuko ya ha manguji, yayilinga ni prata. Manguji eswe a chipanga yaakolesa ni mikambo ya prata.

¹⁸ Chikalakala cha ku chikolo cha chipanga yachinuka ni mahina atoma alefuna, ni Wanda ulauluka ni wa ufungo, ni uchila, mba yoola. Usuhwe wacho metro 9, chizundamo chacho metro 2, ngwe yikalakala ya chipanga.

¹⁹ Yazezeleka chikalakala ha manguji awana akumika mu yimanyino yayo ya unengu. Ngo ni mikambo ni yifuko ya manguji yayilinga ni prata.

²⁰ Mbambo jeswe ja zuwo ni ja chipanga yajilinga ni unengu.

Yikungo yize atungilile nayo zuwo lia Zambi

²¹ Chino che kwoka cha yikungo yize atungile nayo zuwo lia Zambi lia makubu lize te likwete mawe aali a Shimbi kumi. Mose mwe wahanyine Shimbi kuli Alevi, waze asonekene kwoka cha yikungo nikulita ni maliji ja Itamare, mwana wa hako Arone.

²² Bezalele, mwana wa Ure, wa ku Chikota cha Hure, wa ku vungu lia Yuda, yalinga yuma yeswe yize Mwene Zambi alwezele Mose.

²³ Chikwashi chenyi, Oholiabe, mwana wa Ahisamake, wa ku vungu lia Dane. Milimo yenyi ya kwola ha mawe, ni kwola yuma yeka ni yeka yikwo, ni kutunga mahina atoma alefuna, ni Wanda ulauluka, ni wa ufungo ni uchila.

²⁴ Oru yeswe yize alingile nayo milimo ya zuwo lia Zambi, kulema chayo kilo 1,000, nikulita ni ngeseko ya matangwa waze.

²⁵ Atu eswe waze alwile a ku Chikungulwila, yaahana prata kulema chayo kilo 3,430, nikulita ni ngeseko ya matangwa waze.

²⁶ Kwoka cheswe cha prata yino yichilita ni kuhana cha mutu ni mutu nikulita ni Shimbi yize aahele, kulema chayo nikulita ni ngeseko ya matangwa waze. Malunga eswe yaabwa 603,550, waze te haabwa ni miaka makumi aali ni helu.

²⁷ Prata ya kilo, 3,400 yalinga nayo yimanyino kulakaji ya kumika nayo chikalakala cha ku zuwo lia Zambi. Kulumbunuka chimanyino ni chimanyino kilo 34.

²⁸ Prata yize yasala, kilo 30, Bezalele yalinga nayo mikambo ni ngo ja manguji, ni yifuko yajo.

²⁹ Unengu uze akunjikile kuli Mwene Zambi yiubwa kilo 2,425.

³⁰ Yafula nayo ye yimanyino ya ku chikolo cha zuwo lia Zambi, ni chilumbilo ni sambu jacho, ni yikashi yacho,

³¹ ni yimanyino ya chipanga ni ya ku chikolo chayo, ni mbambo jeswe ja ku zuwo ni ku chipanga.