Kutuhuka 37 - Mukanda Wa Zambi 1970

Mushete wa Usendo wa Zambi ni atu

¹ Bezalele yasonga mushete wa Usendo wa Zambi ni atu wa mutondo akasia. Usuhwe wawo metro 1 ni sentimetro 10, ni unene wawo sentimetro 66, ni chizundamo chawo sentimetro 66.

² Yaushila oru yibema muchima ni haze, yawola nawa oru nikuujingilika kweswe.

³ Yafula maswi awana a oru, yasa ku molu jawo awana, maswi aali sali ni sali.

⁴ Yasonga mikambo ya mutondo akasia ya kumbachila mushete, yayishila oru.

⁵ Mba yayinjisa mu maswi waze awana.

⁶ Yafula chifuko cha mushete wa Usendo cha oru yibema. Usuhwe wacho metro 1 ni sentimetro 10, unene wacho sentimetro 66.

⁷ Yafula nawa yizulie ya akwa mwono a mwilu aali a oru,

⁸ mukwo songo mukwo songo Ha chifuko. Yizulie ya akwa mwono ni chifuko yayifula ni chishinda chimuwika cha oru.

⁹ Akwa mwono yaazazulula mapulwa hanga afuke chifuko, yaatala meso jo ha chifuko, he homa ha kukukila milonga.

Mesa ya kutumbieka mbolo ku meso ja Zambi

¹⁰ Bezalele yasonga mesa ya mutondo akasia. Usuhwe wayo sentimetro 88, unene wayo sentimetro 44, chizundamo chayo sentimetro 66.

¹¹ Yayishila oru yibema, nikuyijingilika kweswe.

¹² Yayijingilika mukomo, unene wawo sentimetro 75. Mba yawola oru.

¹³ Yafula maswi awana a oru a kumbachila mesa, yaasa ku molu jayo awana, maswi aali sali ni sali.

¹⁴ Maswi a kunjisa mikambo ya kumbachila mesa yaasa hehi ni mukomo.

¹⁵ Yasonga mikambo ya mutondo akasia, mba yayishila oru.

¹⁶ Yafula yikashi ya mesa: yenga, ni misenge, ni ndeho, ni milondo ya kuzujila nayo milambu ya vinyu. Yeswe yayifula ni oru yibema.

Ndeya

¹⁷ Yafula ndeya ya oru yibema, nganda, ni mukungo, ni misenge, ni mawundu, ni yitemo yayo ya uhenya, yeswe ya chishinda chimuwika cha oru.

¹⁸ Ye ndeya yiibwa ni mitango yisambano, yitatu sali yitatu sali.

¹⁹ Mutango ni mutango yiubwa ni yitemo ya uhenya yitatu, yalifwa ngwe mikeshi.

²⁰ We mukungo wa ndeya yiubwa ni yitemo yiwana ya uhenya yalifwa ngwe mikeshi.

²¹ Kushi lia mutango ni mutango yasa ko wundu limuwika.

²² Mawundu, ni mitango, ni mukungo wa ndeya yiubwa wa chishinda chimuwika cha oru yibema yakutatula.

²³ Yafula ndeya shimbiali ha mukungo umuwika, ni lumana ni yenga ya ndeya. Yeswe yayifula ni oru yibema.

²⁴ Yafula ndeya ni yuma yayo yeswe ni kilo 35 ja oru.

Chilumbilo cha kwochela yuma ya vumba libema

²⁵ Bezalele yalinga chilumbilo ni mutondo akasia cha kwochela yuma ya vumba libema. Usuhwe wacho ni unene wacho ngeseko yimuwika, sentimetro 45, chizundamo chacho sentimetro 90. Mbinga jacho ha mbango ni mbango yijibwa ja mutondo umuwika ni chilumbilo.

²⁶ Yashila oru yibema helu lia chilumbilo, ni mu mambango eswe awana, ni ha mbinga. Yachola oru nikuchijingilika kweswe.

²⁷ Yafula maswi aali a oru, yasa kushi lia masongo ku mbango jaali ja chilumbilo hanga anjise mo mikambo ya kuchimbachila.

²⁸ Yasonga mikambo ya mutondo akasia, mba yayishila oru.

Maji a kuwayisa

²⁹ Bezalele yateleka maji a kuwayisa a chijila ni yuma ya kuchingachinga ya vumba libema.