Kutuhuka 36 - Mukanda Wa Zambi 1970

¹ “Bezalele, ni Oholiabe, ni eswe akwo waze Mwene Zambi ahele mana ni malinjekela a kulinga yuma yize maahasa kutunga nayo zuwo lia Zambi, chaatamba kulinga yeswe ngwe chize Mwene Zambi aambile.”

Atu yaaneha yawana yinji

² Mose yatambika Bezalele ni Oholiabe ni eswe waze Mwene Zambi ahele mana a kulinga milimo kanawa, waze te akutayiza kukwasa. Yaambila ngwenyi: “Butukenu milimo.”

³ Mose yaaha yawana yeswe yize Aisraele anehene ha kutunga nayo zuwo lia makubu lia chijila. Tangwa ha tangwa Aisraele te kaakunehena Mose milambu.

⁴ Mba waze te akutunga zuwo lia Zambi yaahichika milimo,

⁵ yaaya nikulweza Mose ngwo: “Milambu ya kulinga nayo milimo yize ambile Mwene Zambi hiyoka kuhiana.”

⁶ Kashika Mose yatuma liji atwe mutambi mu musumba ngwo: “Haliabwila, chibwe lunga chibwe pwo, kanda aneha nawa yawana ya zuwo lia Zambi.” Kashika atu kaanehene ko nawa yawana.

⁷ Yawana yize anehene te hiyoka kuhiana yize azangile ni kulinga nayo milimo.

Atu yaatunga zuwo lia Zambi

⁸ Akwa mana yaatunga zuwo lia Zambi lia makubu. Yaatunga mahina kumi atoma alefuna, yaanuka ni Wanda ulauluka, ni wa ufungo, ni uchila. Mahina wano yoola ni yizulie ya akwa mwono a mwilu.

⁹ Hina ni hina Usuhwe walio metro 12, unene walio metro 2. Mahina eswe yaabwa lume ndwa.

¹⁰ Yaanuka mahina atano atano hamuwika.

^11-12 Ku songo lia hina lia muchitano yaatunga ko maswi makumi atano a hina lilauluka. Ku songo lia hina likwo lia muchitano yaalinga nawa chimuwika, e maswi yaalitalangana.

¹³ Yaafula makumi atano a ngo ja oru ni kusepekenya e mahina waze atano atano, mba yaabwa lume Chihanda chimuwika.

¹⁴ Mba yaatunga fulumba lia zuwo lia Zambi lia makubu ni mahina kumi ni limuwika a ngona ja pembe.

¹⁵ Hina ni hina Usuhwe walio metro 13, unene walio metro 2, mahina eswe yaabwa lume ndwa.

¹⁶ Yaanuka mahina atano hamuwika, asambano hamuwika.

¹⁷ Yaanuka maswi makumi atano ku hina liakusula lia ku mahina atano. Yaalinga nawa chizechene ku hina liakusula lia mahina asambano.

¹⁸ Yaafula ngo ja unengu makumi atano ja kununga najo mahina waze.

¹⁹ Yaanuka mafulumba aali a makubu, limuwika lia makuji a panga akulomba ni ulombo uchila, likwo ni malambu abema lia kufuka ha fulumba lize likwo.

²⁰ Yaasonga mabaya a mutondo akasia ni kumika mbango ya zuwo.

²¹ Baya Heswe Usuhwe walio metro jiwana, unene walio sentimetro 66.

²² Baya Heswe yilibwa ni mbambo jaali ja kubalakenya najo.

²³ Yaasonga mabaya makumi aali a ku mbango ya ku sude.

²⁴ Yaafula nawa yimanyino ya prata makumi awana. Ku baya ni baya yaasa ko yimanyino yaali nikulita ni mbambo ja baya.

²⁵ Ni ku mbango ya ku norde nawa chizechene, mabaya makumi aali,

²⁶ ni yimanyino ya prata makumi awana, kushi Ha baya ni baya yimanyino yaali yaali.

²⁷ Ku mbango ya kunyima Ha zuwo ku chitokelo, yaasonga mabaya asambano.

²⁸ Yaasonga nawa mabaya aali aali a ha mambango.

²⁹ Mabaya waze a ha mambango yaalikwata chize kwilu ndoo hashi. Mabaya aali a ha mambango aali yaalinga chizechene.

³⁰ Chenacho yikubwa mabaya nake a kunangika ha yimanyino ya prata kumi ni yisambano, ku baya ni baya yimanyino yaali.

³¹ Yaasonga nawa mikambo kumi ni yitano ya mutondo akasia, mikambo yitano ku mbango yimuwika ya zuwo,

³² yitano ku mbango yikwo, ni yitano ku mbango ya kunyima Ha zuwo ku chitokelo.

³³ Mukambo wa hakachi yaauhetesa ku songo ni songo lia mbango.

³⁴ E mabaya eswe yaashila oru, mba yaafula maswi ja oru, yaasa mu mabaya hanga anjise mo mikambo. Yize nawa ashilile oru.

³⁵ Yaanuka chikalakala ni mahina atoma alefuna, ni Wanda ulauluka ni wa ufungo, ni uchila. Yaachola ni yizulie ya akwa mwono a mwilu.

³⁶ Yaasonga manguji awana a mutondo akasia a kuzundwila no chikalakala. E manguji yaashila oru, yaasa ko maswi ja oru. Yaafula yimanyino yiwana ya oru hanga amike mo manguji.

³⁷ Ha kufuka chikolo cha zuwo, yaanuka chikalakala cha mahina atoma alefuna, ni Wanda ulauluka, ni wa ufungo, ni uchila. Yaachola ni utotombo.

³⁸ Ha kuzundula chikalakala chize yaasonga manguji atano, yaasa ko maswi. Ku songo lia manguji ni makambo yayo yaashila oru. Yaafula yimanyino yitano ya unengu, yamika mo manguji.