Kutuhuka 35 - Mukanda Wa Zambi 1970

Shimbi ja tangwa lia kuhwima

¹ Mose yakungulula Chikungulwila cheswe cha Aisraele, yaalweza maliji wano: “Mwene Zambi ngwenyi:

² ‘Nukalinga milimo yenu ha matangwa asambano, alioze tangwa lia muchishimbiali lili tangwa lia chijila, lia kuhwima, lia yami Mwene Zambi. Yoze malinga milimo ha tangwa lize akamushiha.

³ Kanda nukawika kahia mu mazuwo jenu ha tangwa lia kuhwima.’ ”

Yawana ya kutunga nayo zuwo lia Zambi

⁴ Mose yambila Aisraele eswe, “Mwene Zambi ngwenyi:

⁵ ‘Ngunehenenu yawana. Mweswawo mazanga akaneha yawana yino: oru, ni prata, ni unengu,

⁶ ni mahina atoma alefuna, ni Wanda wa ngona ja mapanga ulauluka, ni wa ufungo, ni uchila, ni mahina a ngona ja pembe,

⁷ ni makubu a makuji a panga waze haalomba ni ulombo uchila, ni malambu abema, ni mitondo akasia,

⁸ ni maji a ndeya, ni yuma ya vumba libema yakukama maji akuwaya ni akwocha;

⁹ ni mawe achila, ni mawe akwo akulamika ha chikuto ni ha chibwiko cha mwata wa mahako a Zambi.’ ”

Yuma ya mu zuwo lia Zambi

¹⁰ “Akwa mana waze anyingika kulinga yeka ni yeka, eze alinge yeswe yize Mwene Zambi hamba.

¹¹ Alinge zuwo lia makubu, ni fulumba lia muchima, ni fulumba lia haze, ni mabaya, ni ngo, ni mikambo, ni manguji, ni yimanyino;

¹² ni mushete wa Usendo, ni mikambo yawo, ni chifuko chawo, ni chikalakala cha kufuka we mushete;

¹³ ni mesa, ni mikambo yayo, ni yikashi yayo yeswe; ni mbolo ya kutumbieka ku meso ja Zambi;

¹⁴ ni mukungo wa ndeya, ni yikashi yayo yeswe; ni je ndeya ni maji jayo;

¹⁵ ni chilumbilo cha kwochela yuma ya vumba libema ni mikambo yacho; ni maji a kuwayisa no mahako; ni yuma ya vumba libema; ni chikalakala cha ku chikolo cha zuwo lia makubu;

¹⁶ ni chilumbilo cha kwochela milambu, ni sambu jacho ja unengu, ni mikambo yacho, ni yikashi yacho yeswe; ni lumbashila ni nganda yalwo;

¹⁷ ni yikalakala ya chipanga, ni manguji ni yimanyino yayo; ni chikalakala cha ku chikolo cha chipanga;

¹⁸ ni mbambo, ni mihipu ya zuwo lia Zambi lia makubu ni ya chipanga;

¹⁹ ni mahina a uhenya waze mahako maazala muze maalinga milimo muma mwa chijila—mahina a chijila a hako Arone ni ana jenyi a malunga.”

Aisraele yaaneha yawana

²⁰ Chikungulwila cheswe cha Aisraele yaakatuka ku meso ja Mose.

²¹ Mweswawo watayijile, yaneha chawana cha kutunga nacho zuwo lia Mwene Zambi. Yaaneha yuma yeswe ya uwayilo ni ya kulinga nayo mahina ja mahako.

²² Eswe waze atayijile, malunga ni mapwo, yaaneha yibenya, ni yingeliengelie, ni tuzeya, ni yijingo, ni mikosa, ni yuma yeka ni yeka ya oru, yaayikunjika kuli Mwene Zambi.

²³ Mweswawo te uli ni mahina atoma alefuna, ni Wanda wa ngona ja mapanga ulauluka, ni wa ufungo, ni uchila, ni mahina a ngona ja pembe, ni makubu a makuji a panga akulomba ni ulombo uchila, ni malambu abema, yayineha.

²⁴ Eswe waze te akwete prata hanji unengu, yaayineha ha kulambula Mwene Zambi. Ni waze te akwete mabaya a mutondo akasia a kutunga no zuwo lia Zambi, yaaneha.

²⁵ Mapwo waze anyingika milimo ya kuhosa yaaneha Wanda utoma walefuna, ni wa ngona ja mapanga ulauluka, ni wa ufungo, ni uchila.

²⁶ Te kaakuhosa nawa Wanda ni ngona ja pembe.

²⁷ Miata yaaneha mawe achila a uhenya ni mawe akwo ha kulamika ha chikuto ni ha chibwiko.

²⁸ Yaatwala nawa yuma ya vumba libema, ni maji a ndeya, ni a kuwayisa, ni a vumba libema.

²⁹ Aisraele waze atayijile yaaneha yawana yo kuli Mwene Zambi ha kulinga milimo yize Mwene Zambi ambilile Mose.

Akwa kutunga zuwo lia Zambi

³⁰ Mose yambila Aisraele ngwenyi: “Mwene Zambi hatongola Bezalele, mwana wa Uri, mujikulu wa Hure, wa ku vungu lia Yuda.

³¹ Hamuzalisa ni Mwiku wenyi, hamwaha mana, ni malinjekela, ni yinyingi ya milimo yeka ni yeka

^32-33 ya kutomba ni kufula oru, ni prata, ni unengu; ni kusonga mawe a uhenya ni mabaya, ni milimo yeka ni yeka ya utotombo.

³⁴ Iye ni Oholiabe, mwana wa Ahisamake, wa ku vungu lia Dane, Mwene Zambi haanahe mana a kulongesa atu akwo.

³⁵ Mwene Zambi haanahe mana anji ni kwola ha mawe a uhenya, ni kwola yuma yeka ni yeka yikwo, ni kutunga mahina atoma alefuna, ni Wanda wa ngona ja mapanga ulauluka, ni wa ufungo, ni uchila. Maahasa kulinga milimo yino yeswe.