Kutuhuka 34 - Mukanda Wa Zambi 1970

Mwene Zambi yahana je Shimbi kumi chisuho cha muchaali

¹ Mwene Zambi yambila Mose ngwenyi: “Sesa mawe aali a luhanda ngwe waze atangu, mba yami mungusoneka maliji waze abwile ha mawe atangu waze washihile.

² Lilulike hamene chichamene, ukakanduke ha mulundu wa Sinai ha kungutakana.

³ Mutu niumwe kanda akakanduka hamwe ni yena, niumwe kanda akamoneka ha mulundu. Ngombe chibwe mapanga kanda akalila hehi ni mulundu.”

⁴ Hohene Mose yasesa mawe aali ngwe waze atangu. Mba, muze hikwacha, yakanduka ha mulundu wa Sinai. Yambata mawe waze aali ngwe chize amwambile Mwene Zambi.

⁵ Mwene Zambi yapalumuka mu lelwa, yamana hehi ni Mose, yalivuluka jina lienyi lia linanga, Mwene Zambi.

⁶ Mba yabalika ku meso ja Mose nikwamba ngwenyi: “Yami, Mwene Zambi, nguli Zambi ya utu ni keke, Chishi kutenuka nikawashi, nguli mukwa zango ni mukwa kushishika,

⁷ Nakumanununa chilakenyo chami kuli tununu twa yisemuko, nakukonekena akwa uhenge, ni akwa shili, ni akwa milonga. Alioze chichi kwecha kumwesa lamba ana ni ajikulu ni tukwatambuli mumu ha milonga ya yisemi jo.”

⁸ Mose yafulamana nikawashi, yawayila Zambi ngwenyi:

⁹ “Mwene Zambi, nyi chamwenemwene unawahilila ni yami, tweya kama ni yetu. Atu wano kaali akwa mbunge jikalu, alioze tukonekene kama mumu ha uhenge wetu ni ha shili yetu, tutambule kama ngwe atu je lume.”

Mwene Zambi yakolesa nawa Usendo ni Aisraele

¹⁰ Mwene Zambi yamba ngwenyi: “Ngunakolesa Usendo ni Aisraele. Mungulinga yikomokeso ku meso jo. Yikomokeso yize niumwe kanda ayilinga kama nilimwe tangwa hano hashi hakachi ka mavungu akwo. Atu eswe maakamona chize yami Mwene Zambi ngunahase kulinga, mumu mungukanulingila Chuma cha kukomwesa.

¹¹ Funga Shimbi jami jize ngunakwehe musono. Mungukahuma Aamore, ni Akanana, ni Ahite, ni Aperize, ni Ahive, ni Ajebuse kulutwe lie.

¹² Tala kanawa! Mu chifuchi muze unayi, kanda ukakolesa Usendo ni atu waze atwama mo. Nyi ka, muchikabwa ngwe kambwila kuli yenu.

¹³ Alioze Ukabuzwola yilumbilo yo, ukabalwola mahamba jo a mawe, ukabatwola mitondo ya hamba yo wa pwo, Ashera.

¹⁴ “Kanda ukawayila zambi mukwo, mumu jina liami Ukwa, kulumbunuka ngwo, nguli Zambi ya ukwa.

¹⁵ Kanda ukakolesa Usendo ni akwa chifuchi chize, mumu muze maakawayila mazambi jo, hanji muze maakalambula milambu kuli mazambi jo, maakanulakenya, mba maakanweseka kulia yakulia yize akulambula kuli mazambi jo.

¹⁶ Tangwa likwo ana jenu a malunga maakambata mapwo a yilambala waze maakaakoka ha kwehuka yami ni kuwayila mazambi jo.

¹⁷ “Kanda ukalifulila mazambi a utale.

¹⁸ “Ukalinga chiwanyino cha Mbolo Yize Kuyishi Yitumbo. Ngwe chize nakwambile ngwami, ha matangwa shimbiali a kakweji mutangu, Abibe, kanda ukalia mbolo yize yili ni yitumbo, mumu mwe kakweji yoze nwatuhukile mu chifuchi cha Egiptu.

¹⁹ “Mwana lunga mweswe mutangu kusemuka ni kuji mweswe mutangu kusemuka ku chimuna kaali niami.

²⁰ Alioze mwana chimbulu mutangu kusemuka, chatamba kumusumbakenya ni mwana panga. Nyi ka, chatamba kumumakuna kota, Chatamba kukula mwana lunga mweswe mutangu kusemuka. “Mutu niumwe kanda aheta ku meso jami nyi keshi mulambu.

²¹ “Ukalinga milimo matangwa asambano, alioze ha tangwa lia muchishimbiali kanda Ukalinga ho milimo, chibwe ha mwaka wa kulima chibwe ha mwaka wa kuhela mihuko.

²² “Ukalinga chiwanyino cha Kubatula Mbuto, muze unabatula mbuto yitangu ya mu munda we. Ukalinga nawa chiwanyino cha Yikulika ha kuhwa cha mwaka wa kuhela mihuko.

²³ “Malunga eswe chaatamba kwiza ku meso ja yami, Mwene Zambi ya Aisraele, yisuho yitatu mwaka ha mwaka ha kunguwayila.

²⁴ Kulutwe, muze hinahuma mavungu eswe ku meso je, ni muze hinatohwesa chifuchi che, mutu niumwe kechi keseka kukumba chifuchi che ha yiwanyino yino yitatu.

²⁵ “Muze unangulambula mulambu wa chimuna, kanda uchilinga hamwe ni mbolo yize yili ni yitumbo. Yifwo ya chimuna chize hiwashiha wa chiwanyino cha Kubalika, kanda yikasala ndoo chichamene.

²⁶ “Mwaka ha mwaka ukaneha mbuto yitangu ya ku minda ye ku zuwo lia Mwene Zambi. “Kanda ukateleka mwana panga hanji mwana pembe ni yamwa ya naye.”

²⁷ Mwene Zambi yambila Mose ngwenyi: “Soneka maliji wano Hahanjika, mumu maliji wano kaanalumbununa Usendo uze ngunakolesa ni yena ni Aisraele.”

²⁸ Mose yatwama ha mulundu hamwe ni Mwene Zambi matangwa makumi awana. Te keshi kulia chibwe kunwa. Ha mawe yasoneka ho maliji a Usendo, je Shimbi kumi.

Mose yapalumuka ha mulundu

²⁹ Muze te Mose anapalumuka ha mulundu wa Sinai ni mawe aali a Shimbi, meso jenyi te kaanabeyima ngwe Pangu mumu ha kuhanjeka ni Mwene Zambi, alioze kachinyingikine ko.

³⁰ Arone ni atu eswe, muze te anahulikila Mose, yaamona kubeyima cha ku meso jenyi, yeevwa woma ha kumukundama.

³¹ Alioze Mose yaatambika, mba Arone ni miata eswe a Chikungulwila yaamukundama. Hohene Mose yahanjika no.

³² Mwabwamuze Aisraele eswe yaamukundama, mba Mose yaalweza Shimbi jeswe jize amwambile Mwene Zambi ha mulundu wa Sinai.

³³ Muze Mose hamana kuhanjika, yalifuka Wanda ku meso.

³⁴ Shimbu Heswe lize te akunjila mu zuwo lia Zambi lia makubu ni kuhanjika nenyi, te kakuchiza Wanda uze akufuka ha meso. Ha kutuhuka, hanga alweze Aisraele maliji eswe waze hamulweza,

³⁵ Aisraele maamona kubeyima cha meso jenyi. Mba Mose malifuka ku meso ndoo muze mahiluka ni kuhanjika nawa ni Mwene Zambi.