Kutuhuka 32 - Mukanda Wa Zambi 1970

Kuji a ngombe wa oru

¹ Muze Aisraele haamona ngwo, Mose kanashimbula chinji ha mulundu, yaalikungulula kuli Arone, ngwo: “Tweya, tulingilenu zambi yoze maatusongwela, mumu kutwanyingikine chize chawana Mose, mutu yoze watuchijile mu chifuchi cha Egiptu.”

² Arone ngwenyi: “Chizenu yingeliengelie ya oru ya ku matwi ja mapwo jenu, ni ja ana jenu a malunga ni a mapwo, ngunehenenu yo.”

³ Mba atu eswe yaalinga chizechene, yaachiza yingeliengelie ya ku matwi, yaayitwalila Arone.

⁴ Muze Arone hayitambula, yayisa ha kahia hanga yisangunuke, mba yayizuzulula ngwe chimbembe wa kuji wa oru. Aisraele yaamba ngwo: “Yono mwe zambi yetu yoze watuchijile mu chifuchi cha Egiptu.”

⁵ Hohene Arone yatunga chilumbilo kulutwe lia ngombe yoze, yalweza atu ngwenyi: “Hamene mutukalinga chiwanyino cha kulemesa Mwene Zambi.”

⁶ Muze hikwacha, yaalambula milambu ya yimuna yize ochele, yaaneha nawa yimuna ha kulambula milambu ya kulivwa ni Zambi. Atu yaatwama hashi, yaalia, yaanwa, yaalinga utanji.

⁷ Mwene Zambi yambila Mose ngwenyi: “Palumuka nikawashi, mumu atu je, waze watuhwishile mu chifuchi cha Egiptu, haalinga yibi.

⁸ Haahichika kulu jila yize naalwezele, haalingila hamba, haamukombelela, haamulambula milambu. Kaanambe ngwo: ‘Aisraele, yono mwe zambi yenu, yoze wanutuhwishile mu Egiptu.’ ”

⁹ Mwene Zambi yambila nawa Mose ngwenyi: “Atu wano ngunaanyingika, haabwa ni mbunge jikalu.

¹⁰ Haliabwila ngweche ngwashihe ni ufwatulo wami. Mba yena, mungukupwisa vungu linene.”

¹¹ Alioze Mose yalembejeka Mwene Zambi, Zambi yenyi, ngwenyi: “Mwene Zambi, kuchi muuvwila atu je ufwatulo ubwa haha, waze watuhwishile mu Egiptu ni ndundo je jahiana?

¹² Hi chibema ko akwa Egiptu akambe ngwo: ‘Zambi hanaatuhwisa mu chifuchi chetu hanga akashihile eswe ku milundu ni kwoonona liakulu!’ Echa kama ufwatulo we, walumune mbunge ye, kanda ushiha atu je.

¹³ Iwuluka kama tuvumbi twe, Abrahama, ni Isake, ni Israele, ni chize walishingile ni jina lie ngwe: ‘Mungukanupwisa vungu linene, ngwe matongonoshi a mwilu. Chifuchi chize naalakenyene, muchikabwa nichenu ndoo ku miaka yeswe.’ ”

¹⁴ Kashika Mwene Zambi yalumuna mbunge yenyi, kashihile atu jenyi ngwe chize ambile.

¹⁵ Mba Mose yalumuka, yapalumuka ni kumbata mawe waze aali a Shimbi, te akusoneka sali ni sali.

¹⁶ Zambi mwene mwe walingile e mawe waze, iye mwene waatotele ni kwoko lienyi.

¹⁷ Yoshua yevwa liji lia kukalumioka cha atu, yalweza Mose ngwenyi: “Ngunevu zungo lia jita kuze ku musumba.”

¹⁸ Mose ngwenyi: “Zungo lize hi lia kukumba ko, chibwe zungo lia kwaakumba, alioze miaso ya akwa kunwa.”

¹⁹ Muze Mose hakundama ku musumba, yamona chimbembe wa kuji ni atu anahangana. Mba yatenuka kuhiana, yanyasa hashi mawe waze te anambata, no yaabalwoka mushi lia mulundu.

²⁰ Mba yanda chimbembe wa kuji yoze alingile, yamwocha mweswe, yamufwenya yifenyufenyu. Yasa uto uze mu meya, mba yanwisa Aisraele meya waze.

²¹ Yahula Arone ngwenyi: “Atu wano chika anakakulinga kashika hiwaakokela mulonga ubwa haha?”

²² Arone ngwenyi: “Mwata, kanda ungutenukina. Unanyingika atu wano kaakulihana lume ha kulinga yibi,

²³ Yaangwamba ngwo: ‘Tulingile zambi yoze matutetekela, mumu kutwanyingikine chize chawana Mose, mutu yoze watutuhwishile mu Egiptu.’

²⁴ Mba yingwaamba ngwami: ‘Yoze uli ni yingeliengelie ya oru ayinehe.’ No yaayichiza, yaangunehena yo. Yinguyitambula, yinguyisa ha kahia, mba kuji a ngombe yono yatuhuka.”

²⁵ Muze Mose hamona chize Arone atayijile atu kulifukula kuli hamba ni kulisaula ku meso ja akwa kole jo,

²⁶ yamana ku chikolo cha musumba, yakololoka ngwenyi: “Eswe waze nuli ku sali lia Mwene Zambi kundamenu kuno!” Alevi eswe yaakundama kuli Mose,

²⁷ neye yaamba ngwenyi: “Mwene Zambi, Zambi ya Aisraele kanambe ngwenyi: ‘Mutu mweswe aswelele mukwale wenyi, abalieke mu musumba weswe ashihe usoko wenyi, ni masepa jenyi, ni enyembo jenyi.’ ”

²⁸ Malunga ja Alevi yaalinga ngwe chize ambile Mose, yaashiha malunga tununu atatu.

²⁹ Mose yambila Arone ngwenyi: “Musono uno Mwene Zambi hananukunjika ku milimo ya uhako, mumu hinwalituna ana jenu a malunga ni usoko wenu, mba Mwene Zambi hanuwahisa.”

³⁰ Muze hikwacha Mose yambila atu ngwenyi: “Kunwavulumuna kuhiana. Alioze haliabwila ngunakanduka nawa ha mulundu kuli Mwene Zambi, hanji mangwivwa ha kunukonekena mulonga wenu.”

³¹ Mose yahiluka kuli Mwene Zambi, yamba ngwenyi: “Aa Mwene Zambi, atu wano havulumuna kuhiana. Haalinga zambi yo ya oru.

³² Alioze haliabwila, nalemba, akonekene kama mulonga wo. Nyi kuusolo, nalemba, ujimune jina liami ha mukanda uze wasonekene majina ja atu je.”

³³ Mwene Zambi yambila Mose ngwenyi: “Mutu yoze unakanguvulumuna mwenawo mungujimuna ha mukanda wami.

³⁴ Haliabwila yako utwale atu kuze nakulwezele. Kanda uvulama kanganda kami mabwa hamwe ni yena, alioze ha matangwa a kulutwe mungubatwila atu wano mumu ha mulonga wo.”

³⁵ Mba Mwene Zambi yatumina atu misongo, mumu ashinjikile Arone ha kwalingila kuji a ngombe wa oru.