Kutuhuka 31 - Mukanda Wa Zambi 1970

Akwa kutunga zuwo lia Zambi lia makubu

¹ Mwene Zambi yambila Mose ngwenyi:

² “Hinatongola Bezalele, mwana wa Uri, mujikulu wa Hure, wa ku vungu lia Yuda.

³ Hinamuzalisa ni mwiku wami, hinamwaha mana ni malinjekela, ni yinyingi ya milimo yeka ni yeka:

^4-5 ya kutomba ni kufula oru, ni prata, ni unengu; ni kusonga mawe a uhenya ni mabaya; ni milimo yeka ni yeka ya utotombo.

⁶ Hinatongola nawa Oholiabe, mwana wa Ahisamake, wa ku vungu lia Dane, ha kumukwasa ku milimo yenyi. Atu akwo nawa hinaaha mana anji ha kulinga milimo yize nakulwezele. Ye yuma yize yenayi ayi:

⁷ zuwo lia kuwayila, ni mushete wa Usendo ni chifuko chawo, ni yikashi yeswe ya mu zuwo,

⁸ ni mesa ni yikashi yayo, ni ndeya ya oru yibema ni yikashi yayo yeswe, ni chilumbilo cha kwochela yuma ya vumba libema,

⁹ ni chilumbilo cha kwochela milambu ni yikashi yacho yeswe, ni lumbashila lwa kusanyina,

¹⁰ ni mahina a uhenya a mahako ja Arone ni ana jenyi a malunga,

¹¹ ni maji a kuwayisa, ni yuma ya vumba libema ya muma mwa chijila. Chaatamba kulinga yino yeswe ngwe chize hinakwamba.”

Tangwa lia kuhwima

¹² Mwene Zambi yambila Mose

¹³ halweza Aisraele ngwenyi: “Fungenu tangwa liami lia kuhwima, mumu lili chilweza mukachi ka yenu ni yami ndoo ku miaka yeswe ngwami, yami Mwene Zambi hingunanupwisa atu ja yami mwene.

¹⁴ Chanutamba kulemesa tangwa lia kuhwima mumu lili lia chijila. Yoze kechi kulilemesa, alioze malinga ho milimo, chatamba kumushiha.

¹⁵ Nukalinga milimo yenu ha matangwa asambano, alioze tangwa lia muchishimbiali lili tangwa lilemu lia kuhwima, lia chijila, lia yami Mwene Zambi. Yoze makalinga ho milimo, chatamba kumushiha.

^16-17 Aisraele chaatamba kufunga tangwa lino mumu lili chilweza cha Usendo uze hinakolesa ni yenu, mumu yami Mwene Zambi yingulinga lilu ni hashi ha matangwa asambano, mba ha tangwa lia muchishimbiala yingwecha milimo, yinguhwima.”

¹⁸ Muze Mwene Zambi hamanununa kuhanjika ni Mose ha mulundu wa Sinai, yamwaha mawe aali a Shimbi waze asonekene Zambi iye mwene ni kwoko lienyi.