Kutuhuka 30 - Mukanda Wa Zambi 1970

Chilumbilo cha kwochela yuma ya vumba libema

¹ “Ukalinga chilumbilo ni mutondo akasia, cha kwochela yuma ya vumba libeme.

² Usuhwe ni unene wacho ukabwa ni ngeseko yimuwika, sentimetro 45. Chizundamo chacho sentimetro 90. Mbinga jacho ha mbango ni mbango jikabwa ja mutondo umuwika ni chilumbilo.

³ Ukashila, oru yibema helu lia chilumbilo, ni mu mambango eswe awana, ni ha mbinga. Ukachishila ni oru kuchijingilika kweswe.

⁴ Ukafula maswi aali a oru, ukaase kushi lia masongo ku mbango jaali ja chilumbilo, ha kunjisa mo mikambo ya kuchimbachila.

⁵ Ukasonga mikambo ya mutondo akasia, mba ukayishila oru.

⁶ Ukasa chilumbilo kulutwe lia chikalakala chize chinasweke mushete wa Usendo wa yami ni Aisraele, Kwenako mungubwa ni kukutakana.

⁷ Tangwa lieswe, ha chichamene, muze Arone aneza ni kululika ndeya, chamutamba kwocha yuma ya vumba libema ha chilumbilo.

⁸ Chamutamba kuyocha nawa chingoloshi, muze akuwika ndeya. Milambu yino ya vumba libema chanutamba kuyocha ndoo ku miaka yeswe.

⁹ Ha chilumbilo chino, kanda ulambwila ho milambu yize kuyalitele, ngwe milambu ya yifwo ya kwocha, chibwe ya wunga, hanji kumwangina ho vinyu.

¹⁰ Chisuho chimuwika mwaka ha mwaka, Arone chatamba kubemesa chilumbilo ni kukwita ha mbinga jiwana manyinga a kashitu yoze alambwile ha shili. Achilinga mwaka ha mwaka ndoo ku miaka yeswe. Chilumbilo chino chikabwa cha chijila kuhiana ha kuchikunjika kuli yami Mwene Zambi.”

Mulambu wa kutunga nawo zuwo lia Zambi

¹¹ Mwene Zambi yambila Mose ngwenyi:

¹² “Muze munwalula Aisraele, mutu mweswe chamutamba kuhana mulambu kuli yami Mwene Zambi, mumu ha mwono wenyi. Ha chino atu keechi kamona lamba muze muwalula.

¹³ Mutu mweswe yoze hiwalula chamutamba kungulambula lumbongo umuwika, nikulita ni ulemu wa mbongo ja ha miaka yize.

¹⁴ Mutu mweswe yoze habwa ni miaka makumi aali ni helu chamutamba kungulambula yami Mwene Zambi mulambu uno.

¹⁵ Pichi kanda aweza ho, chiswale neye kanda achiza ho, muze maalambula mulambu uno mumu ha mwono wo.

¹⁶ Ukalambula mulambu uno kuli Aisraele ha kulinga nayo milimo ya zuwo lia kuwayila. Mulambu uno kuuli wa mwono wo, mba mungwiwuluka ha kwafunga.”

Lumbashila lwa unengu

¹⁷ Mwene Zambi yambila Mose ngwenyi:

¹⁸ “Ukafula lumbashila lwa unengu lwa kusanyina ni nganda yalwo. Ukalusa hakachi ka zuwo ni chilumbilo. Ukasa mo meya.

¹⁹ Arone ni ana jenyi a malunga abwe ni kusanyina mo moko ni molu,

²⁰ muze maanjila mu zuwo liami, ni muze maakundama ku chilumbilo ha kulambula mulambu wa kwocha. Nyi asana meya keechi kafwa.

²¹ Chenacho chaatamba kusanyina molu ni moko hanga keechi kafwa. Yino yili Shimbi yo ni ya vungu lio ndoo ku miaka yeswe.”

Maji a kuwayisa

²² Mwene Zambi yambila Mose ngwenyi:

²³ “Ukanda yuma ya vumba libema: kilo jisambano ja maji a mira, ni kilo jitatu ja sinamone, ni kilo jitatu ja mishachi,

²⁴ ni kilo jisambano ja kasia, (nikulita ni ngeseko ya ha miaka yize.) Ukaweza ho nawa litro yimuwika ya maji a olive

²⁵ ha kuchinga nayo maji a vumba libema a chijila a kuwayisa.

²⁶ Ukawayisa no zuwo lia kuwayila, ni mushete wa Usendo,

²⁷ ni mesa ni yikashi yayo yeswe, ni ndeya ni yikashi yayo, ni chilumbilo cha kwochela yuma ya vumba libema,

²⁸ ni chilumbilo cha kulambwila milambu ya kwocha ni yikashi yayo yeswe, ni lumbashila lwa kusanyina.

²⁹ Chenacho chatamba kupwisa yuma yino ya chijila mba muyibwa liakulu ya chijila. Mutu mweswe yoze makuka ko, hanji Chuma cheswe chize muchikuka ko, muchibwa cha chijila.

³⁰ Mba ukawayise Arone ni ana jenyi a malunga ni maji, ukaakunjika akangulingile milimo ya uhako.

³¹ Ukambila Aisraele ngwe: ‘Maji wano a chijila a kuwayisa chaatamba kulinga no mu milimo yami ndoo ku miaka yeswe.

³² Maji wano kanda nukaawayisa no mutu weka, kanda nukachinga chinga nawa maji ngwe wano. Nyingikenu ngwenu, maji kaali a chijila.

³³ Nyi umwe machinga maji ngwe wano, hanji kwawayisa yoze hi hako ko, mutu yoze chatamba kumuchiza mukachi ka atu jami.’ ”

Yuma ya vumba libema

³⁴ Mwene Zambi yambila Mose ngwenyi: “Ukanda yihanda yize yinalite ya yuma yino ya vumba libema: stakte, ni onisha, ni ngalbanume, ni libano libema, yeswe yikabwa cheseko chimuwika.

³⁵ Ukachinga yuma yino kanawa hanga yikabwe maji a vumba libema. Ukaweza ho mungwa, hanga akabwe abema a chijila.

³⁶ Yimwe ukayitwa wunga. Ukaulakumwina kulutwe lia mushete wa Usendo mu zuwo lia kuwayila, akabwa a chijila kuhiana.

³⁷ Kanda nukachinga nawa maji ngwe wano. Akabwa liakulu a chijila a yami Mwene Zambi.

³⁸ Nyi umwe machinga maji ngwe wano, mutu yoze chatamba kumuchiza mukachi ka atu jami.”