Kutuhuka 3 - Mukanda Wa Zambi 1970

Zambi yatambika Mose ha kumulingila milimo

¹ Mose te kakufunga yimuna ya Ukwe wenyi Jetro, hako wa ku chifuchi cha Midiane. Yatwala yimuna mu puya, yaheta ku Sinai ku mulundu wa Zambi.

² Kwenako kanganda ka Mwene Zambi amusolokelele mu mulengi wa kahia, mu chibuta. Mose yatala ko. Che chibuta te chinalekwoka ni kahia, alioze kuchawemene ko.

³ Mose ngwenyi: “Manguchijinge ko hanga ngumone chipupu chino chibwa haha. Kuchi mba che chibuta kuchisolo kuwema?”

⁴ Muze Mwene Zambi hamona ngwenyi, Mose kanakundama ko, yamutambika mukachi ka chibuta ngwenyi: “Mose! Mose!” Iye ngwenyi: “Ewa mwane.”

⁵ Zambi ngwenyi: “Kanda ukundama kuno. Zula sapato (haku) je, mumu homa hano unamana ha chijila.

⁶ Nguli Zambi ya akaka je, Zambi ya Abrahama, ni Isake, ni Yakoba.” Mose yafuka ku meso, mumu yevwa woma ha kutala Zambi.

⁷ Mwene Zambi ngwenyi: “Hinamona chize atu jami anamono lamba mu chifuchi cha Egiptu. Hinevwa chize analili ku moko ja akwa lutwe jo, akwa Egiptu waze akwaaha milimo. Ngunanyingika lamba lio lieswe.

⁸ Hinahulumuka hanga ngwapulule ku moko ja akwa Egiptu, ni kwatwala mu chifuchi chinene, chibema, ni cha chinuno. Akanana, ni Ahite, ni Aamore, ni Aperize, ni Ahive, ni Ajebuse, enoo atwama mu chifuchi chize haliabwila.

⁹ Hinevwa kulila cha Aisraele, hinamona chize akwa Egiptu akwamwesa lamba.

¹⁰ Haliabwila ngunakutumu kuli mwanangana wa Egiptu hanga ukatuhwise atu jami, Aisraele, mu chifuchi chenyi.”

¹¹ Mose yakumbulula Zambi ngwenyi: “Yami iya, mba nguye maha mwanangana ni kutuhwisa Aisraele mu Egiptu?”

¹² Zambi ngwenyi: “Mungukabwa hamwe ni yena. Chinyingi chize muchikalweza ngwo, yami nakutuma, chili chino. Muze muukatuhwisa atu wano mu Egiptu, munukeza ni kunguwayila ha mulundu uno.”

¹³ Alioze Mose ngwenyi: “Mwene, muze mungukaya ni kulweza Aisraele ngwami: ‘Zambi ya akakenu kangutuma kuno kuli yenu,’ nyi anguhula ngwo: ‘Mwe Zambi yoze jina lienyi iya?’ Mba yami kuchi mungukakumbulula?”

¹⁴ Zambi ngwenyi: “YAMI NGULI YOZE NGULI. Chatamba kulweza Aisraele ngwe: ‘Yoze akuvuluka ngwo, YAMI NGULI, hangutuma kuli yenu.’

¹⁵ Ukalweza Aisraele ngwe: ‘Yami, Mwene Zambi, Zambi ya akakenu, Zambi ya Abrahama, ni Isake, ni Yakoba, mwe nakutuma.’ Lino lie jina liami ku miaka yeswe; waze maakasemuka kulutwe, maakanguvulwoka jina lino.

¹⁶ Yako ukakungulule miata ja Aisraele, ukaalweze ngwe: ‘Yami Mwene Zambi, Zambi ya akakenu, Zambi ya Abrahama, ni Isake, ni Yakoba hangusolokela. Hangulweza ha kunwambulwila ngwenyi: Hineza, hinamona chize akwa Egiptu akunulinga.

¹⁷ Mba hinabatula ngwami, mungunutuhwisa mu chifuchi cha Egiptu, muze nwakumwena lamba, ni kunutwala mu chifuchi cha chinuno, chifuchi cha Akanana, ni Ahite, ni Aamore, ni Aperize, ni Ahive, ni Ajebuse.’

¹⁸ “Atu jami kumakakwivwa. Mba yena ni miata ja Aisraele munukaya ni kumwambulwila mwanangana wa Egiptu ngwenu: ‘Mwene Zambi, Zambi ya Ahebreu, hatusolokela. Twalemba, tutayize tuye mu wenyi wa matangwa atatu mu puya, tukalambule Zambi yetu milambu.’

¹⁹ Ngunanyingika ngwami, mwanangana wa Egiptu kechi kunutayiza kuya, shina kumushinjika ni tachi.

²⁰ Alioze mungukalamba akwa Egiptu ni ndundo, ni kwalweza yilayi yize mungukalinga ko. Mba mwanangana makanwecha nukaye.

²¹ “Mungukanupwisa akwa vumbi ku meso ja akwa Egiptu, hanga muze munukatuhuka, kunuchi kaya mokomoko.

²² Pwo mweswe akete mwenyembo wenyi, mukwa Egiptu yoze asulangana nenyi, ni pwo mukwa Egiptu yoze watwama mu zuwo lienyi, prata, ni oru, ni mahina. Nukajika anenu a malunga ni a mapwo yuma yize. Chenacho munukabuba ubite wa akwa Egiptu.”