Kutuhuka 29 - Mukanda Wa Zambi 1970

Chize chatamba kukunjika mahako

¹ “Ukalinga chino ha kukunjika Arone ni ana jenyi a malunga ku milimo ya uhako. Anda chimbembe wa kuji ni makuji aali a panga waze keeshi kapalia.

² Anda wunga Ubema wa tiriku, mba linga mbolo yize kuyishi yitumbo: yikwo yinene ya maji a olive, yikwo yinene kuyishi maji, yikwo yikepe ya kukwita maji.

³ Ukayisa mu kapaya umuwika ni kuyikunjika kuli yami muze munukalambula mwe chimbembe ni e mapanga.

⁴ “Ukaneha Arone ni ana jenyi a malunga ku chikolo cha zuwo lia kuwayila, Ukaalweza akasane meya.

⁵ Ukajika Arone mahina a uhako: chikuto chakwola, ni chikuto chihi, ni chikuto chisuku, ni chibwiko, ni muya.

⁶ Ukamujika nawa kapusa ni chibenya cha chijila chize chili ni maliji ngwo: ‘Munangi wa Mwene Zambi.’

⁷ Mba ukande maji ukamuwayise ha mutwe wenyi.

⁸ “Ukeza ni ana jenyi a malunga, Ukaajika yikuto ya kwola,

⁹ ni miya mu zalilo, ni yifulu. Chenacho chatamba kukunjika Arone ni ana jenyi. Ayo ni vungu lio maakangulingila milimo yino ku miaka yeswe.

¹⁰ “Ukatwala mwe chimbembe kulutwe lia zuwo lia Zambi. Lweza Arone ni ana jenyi akase moko ha mutwe wa chimbembe.

¹¹ Ukamushihila ku meso ja yami Mwene Zambi, ku chikolo cha zuwo liami.

¹² Ukakomona manyinga ja chimbembe ha mbinga ja chilumbilo, manyinga akwo ukamwangina kushi lia chilumbilo.

¹³ Ukachiza maji eswe ku yuma yeswe ya mu jimo, ni liayi lia mukelenge, ni ana asukwa ni maji jaho, ukayocha ha chilumbilo, yikaweme.

¹⁴ Alioze yifwo ya mwe chimbembe, ni kubu, ni ufwachi, ukayochela haze lia musumba, yikaweme. Kuuli mulambu wa kuchiza milonga ya mahako.

¹⁵ “Ukanda nawa umwe kuji a panga, lweza Arone ni ana jenyi a malunga akase moko ha mutwe wa mwe panga.

¹⁶ Ukamushiha, Ukanda manyinga jenyi, ukasapwile ku mbango jiwana ja chilumbilo.

¹⁷ Ukamubatwola yipinji yipinji, ukakosa molu ni yuma yeswe ya mu jimo, Ukayisa ha ye yipinji ni ha mutwe.

¹⁸ Ukocha kuji a panga mweswe ha chilumbilo, akaweme. Kuuli mulambu wa kwocha, lupembo wawo kakunguwahila.

¹⁹ “Ukanda kuji a panga mukwo, lweza Arone ni ana jenyi a malunga akase moko ha mutwe wenyi.

²⁰ Ukamushiha, Ukanda amwe manyinga akaakomone ku songo lia twitwi lia chindume lia Arone ni ku masongo ja matwi ja ana jenyi, ni ku minwe ya shina ya chindume ya ku moko ni ya ku molu. Ukasapwila manyinga waze maasala ho ku mbango jiwana ja chilumbilo.

²¹ Ukanda amwe manyinga a ha chilumbilo ni amwe maji a kuwayisa, ukaasapwila hali Arone ni ha mahina jenyi, ni hali ana jenyi ni ha mahina jo. Chenacho Arone ni ana jenyi, ni mahina jo maakabwa achijila.

²² “Ukanda maji a kuji a panga a ku mukila, ni a ku yuma yeswe ya mu jimo, ni liayi lia mukelenge, ni ana asukwa ni maji jaho, ni kulu lia chindume.

²³ Mu kapaya yoze uli ni mbolo ya kukunjika kuli yami, Ukanda mo mbolo yimuwika yinene yakulinga ni maji a olive, yimuwika yinene kuyishi maji, ni yimuwika yikepe.

²⁴ Yeswe ukayisa mu moko ja Arone ni ja ana jenyi, akayihungisa ku meso ja yami Mwene Zambi. Kuuli mulambu wa kuhungisa.

²⁵ Mba ukayichiza mu moko jo ni kuyocha ha chilumbilo, helu lia mulambu wa kwocha, yikaweme. Kuuli mulambu wa yakulia, lupembo wawo kakunguwahila.

²⁶ “Ukanda bambo lia panga yoze ni kulihungisa ku meso ja yami Mwene Zambi. Kuuli mulambu wa kuhungisa, muukabwa chitundo che.

²⁷ “Muze munukunjika mahako ku milimo yo, bambo lia kuji a panga lize halihungisa, ni kulu lienyi lize halizundula ku meso ja yami Mwene Zambi, yikabwe chitundo cha Arone ni ana jenyi a malunga.

²⁸ Yino yili Shimbi yami ya miaka yeswe: muze atu jami maabwa ni kulambula milambu yo ya kulivwa ni yami, bambo ni kulu lia chimuna yili yakulia ya Arone ni ana jenyi. Chili chawana cha atu kuli yami Mwene Zambi.

²⁹ “Muze Arone makafwa mahina jenyi a chijila maakabwa a ana jenyi, hanga akazale muze maakawayisa maji ha kwakunjika ku milimo yo.

³⁰ Mwanenyi wa lunga yoze makamuhinga mu milimo ya uhako, muze makanjila mu zuwo lia kuwayila ni kulingila muma mwa chijila, makazala e mahina matangwa shimbiali.

³¹ “Ukanda yifwo ya kuji a panga ha kukunjika mahako Arone ni ana jenyi a malunga, ukayitelekela muma mwa chijila.

³² Akayilila ku chikolo cha zuwo lia kuwayila hamwe ni mbolo yize yasala mu kapaya.

³³ Akalia yuma yize ya kukonekena nayo shili yo ha kwakunjika. Alioze atu akwo kaahashile kulia yuma yize, mumu yili ya chijila.

³⁴ Nyi yimwe yifwo hanji mbolo yasala ho ndoo chichamene, akayocha ha kahia, yikaweme. Kanda akayilia, mumu yili ya chijila.

³⁵ “Ha kukunjika Arone ni ana jenyi a malunga ukalinga ngwe chize hingunakulweze. Matangwa shimbiali ukaapwisa a chijila.

³⁶ Tangwa ha tangwa ukalambula kuji a ngombe, mumu kuuli mulambu wa kukonekena milonga. Chenacho muukakunjika chilumbilo. Mba ukachiwayise ni maji a olive ha kuchikunjika.

³⁷ Chino ukachilinga matangwa shimbiali, mba chilumbilo muchibwa cha chijila kuhiana. Chuma cheswe chize muchikwata ko muchibwa cha chijila, ni mutu mweswe yoze makwata ko mabwa wa chijila.

Milambu ya tangwa ha tangwa

³⁸ “Tangwa ha tangwa ku miaka yeswe, ukalambula ha chilumbilo ana mapanga aali, a mwaka umuwika.

³⁹ Ukalambula mwana panga umuwika ha chichamene, mukwo ha chingoloshi.

⁴⁰ Hamwe ni mwana panga mutangu ukasa kilo yimuwika ya wunga wafufunuka, wakuchinga ni litro yimuwika ya maji abema a olive. Ukazuza nawa mulambu wa litro yimuwika ya vinyu hashi.

⁴¹ Mwana panga yoze wa muchaali ukamulambula ha chingoloshi, hamwe ni wunga, ni maji a olive, ni vinyu, ngwe ha chichamene. Kuuli mulambu wa yakulia kuli yami Mwene Zambi, nakuwahilila ha lupembo wawo mubema.

⁴² Ku miaka yeswe ukalambula mulambu uno wa kwocha ku meso jami, ku chikolo cha zuwo lia kuwayila. Kwenako mutukalitakana muze munguhanjika ne.

⁴³ Kwenako nawa mungukatakana ni Aisraele, ni uhenya wami muukajilika homa haze.

⁴⁴ Zuwo ni chilumbilo mungukayipwisa ya chijila, ni Arone ni ana jenyi a malunga mungukaapwisa a chijila, hanga akangulingile milimo ya uhako.

⁴⁵ Mungukatwama mukachi ka Aisraele ni kubwa Zambi yo.

⁴⁶ Maakanyingika ngwo, nguli Mwene Zambi, Zambi yo, yoze waatuhwishile mu chifuchi cha Egiptu, hanga ngukatwame hakachi ko. Nguli Mwene Zambi, Zambi yo.