Kutuhuka 28 - Mukanda Wa Zambi 1970

Mahina ja mahako ja Zambi

¹ “Tambika yayenu Arone ni ana jenyi a malunga: Nadabe, ni Abihu, ni Eleazare, ni Itamare. Ahandunune kuli Aisraele hanga angulingile milimo ya uhako.

² Ukanukina yayenu Arane mahina a uhako, abwe mulemu ni mukwa uhenya.

³ Ukatambika malunga waze nahele mana akunyingika kunuka mahina abema, anukine Arone mahina hanga angulingile milimo ya uhako.

⁴ Ukaalweza akanuke mahina wano: chibwiko, ni chikuto chihi, ni chikulo chisuku, ni chikuto cha kwola, ni kapusa, ni muya. Akanukina yayenu Arane ni ana jenyi a malunga mahina hanga akangulingile milimo ya uhako.

⁵ Akwa kunuka akanda Wanda ulauluka, ni wa ufungo, ni uchila, ni mahina atoma alefuna, ni Wanda wa oru.

⁶ “Akanuka chikuto chihi ni Wanda ulauluka, ni wa ufungo, ni uchila, ni mahina atoma alefuna a kwola ni Wanda wa oru.

⁷ Akanuka miya yaali, akayikashila ha yipaya, akayinukina ku masongo ja chikuto.

⁸ Akanuka nawa muya wa kuzalila che chikuto ni mahina waze ene, akaunukina ku chikuto.

⁹ Ukanda nawa mawe aali achila a uhenya, ukola ho majina ja ana ja Israele a malunga.

¹⁰ Ha liwe litangu ukola ho majina asambano, akwo asambano ha liwe likwo, nikulita ni kusemuka cho.

¹¹ Fupa mukwa kwola wa utotombo ha kwola majina ja ana ja Israele a malunga ha mawe waze aali, mba aanjise mu yituwa ya oru,

¹² Ukaabalakenya ha miya ya ha yipaya ya chikuto chihi, ha kwiwuluka mavungu kumi ni aali ja Aisraele. Chenacho Arane mabwa ni kumbata majina jo ha yipaya yenyi ku meso ja yami Mwene Zambi. Ha chino mungukeewuluka matangwa eswe.

^13-14 Ukafula yikwachilo yaali ya oru, ni malenge aali a oru yibema. Ukafula malenge ngwe muhipu wakuhosa. Ukanunga e malenge ku yikwachilo.

Chibwiko

¹⁵ “Ukanuka chibwiko cha mwata wa mahako ja Zambi. Akachizala muze mazanga kunyingika chize Zambi anapale. Ukachinuka ni mahina waze ene ngwe chikuto chihi ni kwola chizechene.

¹⁶ Ukachikoneka haali, masongo eswe awana akabwa chimuwika, sentimetro makumi aali ni jaali.

¹⁷ Ukalamika mikala yiwana ya mawe a uhenya ha chibwiko. Ha mukala utangu ukasa ho mawe wano: lichila, ni lia usungwa, ni lichiluluka.

¹⁸ Ha mukala wa muchaali: lia mafwo a matamba, ni lilauluka, ni liama.

¹⁹ Ha mukala wa muchitatu: lia umbundu, ni lia mifundamifunda, ni lia ufungo.

²⁰ Ha mukala wa muchiwana: lia mbundumbundu, ni lichila hakepe, ni lia bundumuka. Ukaasa mu yituwa ya oru.

²¹ Ha mawe kumi ni aali, liwe ni liwe ukola ho jina lia mwana umuwika wa Israele wa lunga, ha kwiwuluka mavungu kumi ni aali ja Aisraele.

²² Ukafula mihipu yaali ya oru yibema ha kuyikashila ha chibwiko.

²³ Ukafula yikwachilo yaali ni ngo jaali ja oru. Ukaswika je ngo ku masongo ja chibwiko helu.

²⁴ Ukasa mihipu yize yaali ya oru ku ngo jize.

²⁵ Masongo akwo aali a mihipu ukayikashila ku miya ya ha yipaya ya chikuto chihi.

²⁶ Ukalinga nawa ngo jaali ja oru, ukajiswika ku masongo kushi lia chibwiko, hehi ni chikuto chihi.

²⁷ Ukafula ngo jaali jikwo ja oru, ukajiswika ha bambo ku miya yaali ya ha yipaya, hehi ni unungino, helu lia muya wa chikuto.

²⁸ Ukakashila ngo ja chibwiko ku ngo ja chikuto chihi ni lwoji mulauluka, hanga chibwiko kuchichi kukasuluka ku chikulo, ni hanga chibwe helu lia muya wa chikulo.

²⁹ “Muze Arone makabwa ni kunjila muma mwa chijila, makazala chibwiko chize chili ni majina ja mavungu ja Aisraele ngwe chiwulwiso ku meso ja yami Mwene Zambi matangwa eswe.

³⁰ “Ukasa nawa mu chibwiko Urime ni Tumime, hanga Arone ayimbate ha tulo yenyi matangwa eswe muze meza ku meso ja yami Mwene Zambi. Ha chino mahasa kushindakenya chize ngunapale mumu hali Aisraele.

Mahina akwo ja mahako

³¹ “Ukanuka nawa chikuto chisuku ni mahina a ngona ja mapanga alauluka ha kufuka chikuto chihi.

³² Akasa chituwa cha kutuhwishila mutwe. Chituwa chize ukachikundula ni Wanda, kuchina chikulo muchifwa.

^33-34 Ku songo lia chikulo ukanukina ko mafufu alifwa ngwe mihuko ya granade, a Wanda ulauluka, ni wa ufungo, ni uchila. Ukanuka nawa yiwolowolo ya oru yibema, ukayisowela ni mafufu, ha kujingilika ku songo lia chikulo.

³⁵ Arone akazala chikulo chino chisuku muze malinga milimo ya uhako. Muze manjila muma mwa chijila ku meso ja yami Mwene Zambi, ni muze matuhuka, yiwolowolo muyihiohia, mba kechi kufwa.

³⁶ “Ukalinga chipenya cha oru yibema, ni kwola ho sona jino: ‘Munangi wa Mwene Zambi.’

³⁷ Ukachikashila kulutwe ha kapusa ni muhipu ulauluka.

³⁸ Chikabwa ha huma lia Arane muze analambula milambu ya chijila kuli yami. Ha chino, yami Mwene Zambi mungukatayiza milambu yize, chibwe atu kononokenene ko Shimbi jeswe ha kuyilambula.

³⁹ “Ukanukina Arane chikulo ni kapusa ni mahina atoma alefuna, ni muya wakwola wa mahina atoma alefuna.

⁴⁰ “Ukanukina ana ja Arone a malunga yikuto, ni miya, ni yifulu, akabwa a ulemu ni a uhenya.

⁴¹ Ukaajika yayenu Arone ni ana jenyi a malunga. Ukaawayise maji a olive ni kwapwisa a chijila, hanga akangulingile milimo ya uhako.

⁴² Ukaanukina tuputula a mahina atoma alefuna ha kufuka sonyi jo, chize mu zalilo ndoo ku shina lia kulu.

⁴³ Arone ni ana jenyi a malunga chaatamba kwazala muze maanjila mu zuwo lia kuwayila, ni muze maakundama ku chilumbilo ha kuhakwila atu muma mwa chijila, hanga keechi kufwa. Shimbi jino Arone ni vungu lienyi akajifunga ndoo ku miaka yeswe.