Kutuhuka 27 - Mukanda Wa Zambi 1970

Chilumbilo cha kwochela milambu

¹ “Chilumbilo cha kwochela milambu ukachisonga cha mutondo akasia. Usuhwe ni unene wacho ukabwa ngeseko yimuwika: metro 2 ni sentimetro 20. Chizundamo chacho chikabwa metro 1 ni sentimetro 30.

² Ukasonga mbinga yimuwika ha mbango ni mbango ya mutondo umuwika ni chilumbilo. Mba chilumbilo cheswe ukachishila unengu.

³ Yikashi yeswe ya chilumbilo ukayifula ya unengu; yula ya kukombela uto, ni makombo, ni yenga, ni somo, ni yula ya kwokwela kahia.

⁴ Ukafula nawa sambu ja kuseleka ja enengu. Ha mbango ni mbango ja sambu ukasa ko liswi limuwika lia unengu lia kumbachila chilumbilo.

⁵ Je sambu ukajinjisa kushi lia mukomo, hanga jikabwe hakachi ka chilumbilo.

⁶ Ukasonga mikambo ya mutondo akasia ya kambachila chilumbilo, ukayishila unengu.

⁷ Ha kumbata chilumbilo ukanjisa ye mikambo mu maswi ha mbango ni mbango ya chilumbilo.

⁸ Chilumbilo ukachitunga ni mutondo akasia, chikabwa ni pako nikulita ni cheseko chize hinakulweza hano ha mulundu.

Chipanga cha zuwo lia Zambi lia makubu

⁹ “Ukatunga chipanga cha yikalakala ya zuwo lia kuwayila ni mahina atoma alefuna. Usuhwe wa chipanga ku sali lia sude ukabwa metro 44.

¹⁰ Manguji jacho a unengu akabwa makumi aali a kumika mo yimanyino ya unengu makumi aali, ni je ngo ni ye mikambo ya manguji yikabwa ya prata.

¹¹ Chizechene nawa ni ku sali lia norde.

¹² Unene wa chikalakala ku sali lia chitokelo ukabwa metro 22. Ukachizezeleka ha manguji kumi akunjisa mu yimanyino kumi.

¹³ Unene wa chipanga ku sali lia chivumbuko ku chikolo ukabwa nawa metro 22.

^14-15 Unene wa chikalakala ku mbango ni mbango ya chikolo ukabwa metro 6 ni sentimetro 60. Ukazezeleka chikalakala ha manguji atatu a kumika mu yimanyino yitatu.

¹⁶ Unene wa chikalakala cha ku chikolo ukabwa metro 9. Ukachinuka ni mahina atoma alefuna, chakwola ni Wanda ulauluka, ni wa ufungo, ni uchila. Ukazezeleka che chikalakala ha manguji awana a kumika mu yimanyino yayo.

¹⁷ Manguji eswe a chipanga ukaabalakenya ni mikambo ya prata. Ngo ja manguji jikabwa ja prata ni yimanyino ya unengu.

¹⁸ Usuhwe wa chipanga ukabwa metro 44, unene wacho metro 22, chizundamo metro 2 ni sentimetro 20. Yikalakala ya chipanga ukayinuka ni mahina atoma alefuna ni yimanyino ya unengu.

¹⁹ Yikashi yeswe ya mu zuwo liami ni mbambo jeswe ja zuwo ni ja chipanga ukayilinga ni unengu.

Chize chatamba kuwika ndeya ni kuyifunga

²⁰ “Ambila Aisraele akunehene maji a ndeya abema a olive, hanga ndeya yikatemuke ufuku weswe.

²¹ Arone ni ana jenyi a malunga akasa ndeya yize muma mwa chijila mu zuwo lia kuwayila, hehi ni chikalakala chize chili kulutwe lia mushete wa Usendo. Kwenako, ku meso ja yami Mwene Zambi, ye ndeya muyibwa ni kutemuka ufuku weswe, chize ku chingoloshi ndoo chichamene. Aisraele ni vungu lio, chaatamba kufunga Shimbi yino ndoo ku miaka yeswe.