Kutuhuka 26 - Mukanda Wa Zambi 1970

Zuwo lia Zambi lia makubu

¹ “Ukangutungila zuwo lia chijila lia kuwayila. Ukatunga mahina kumi atoma alefuna, akunuka ni Wanda ulauluka, ni wa ufungo, ni uchila. Mahina wano chatamba kwoola ni yizulie ya akwa mwono a mwilu.

² Usuhwe wa hina ni hina ukabwa metro 12, unene walio metro jaali. Mahina eswe akabwa lume ndwa.

³ Ukanuka mahina atano atano hamuwika.

^4-5 Ku songo lia hina lia muchitano ukatunga ko maswi makumi atano a hina lilauluka. Ku songo lia hina likwo lia muchitano ukalinga nawa chimuwika. E maswi akalitalangana.

⁶ Ukafula nawa makumi atano a ngo ja oru. Ukasepekenya mahina ni je ngo, hanga hina likabwe lume Chihanda chimuwika.

⁷ “Ukatunga fulumba lia zuwo ni mahina kumi ni limuwika a ngona ja pembe.

⁸ Hina ni hina usuhwe walio ukabwa metro 13, unene walio metro jaali. Mahina eswe akabwa lume ndwa.

⁹ Ukanuka mahina atano hamuwika, asambano hamuwika. Hina lia muchisambano ukalikoneka haali kulutwe lia zuwo.

¹⁰ Ku songo lia hina liakusula ukanuka maswi makumi atano, ku songo lia hina lize likwo ukalinga nawa chizechene.

¹¹ Ukafula ngo ja unengu makumi atano, ukajisepekenya mu maswi hanga jeswe jikabwe chimuwika,

¹² Mba hina lize mulihiana kusuhwa, ukalizembula chizechene kunyima lia zuwo.

¹³ Chipinji cha sentimetro makumi atano chize chinahiana kusuhwa cha zuwo, ukachecha chizechene ku mbango jaali ja zuwo, ha kulifuka.

¹⁴ “Ukanuka mafulumba aali a makubu, limuwika lia makuji a panga akulomba ni ulombo uchila, likwo lia malambu abema lia kufuka nalio fulumba lize likwo.

¹⁵ “Ukalinga mbango ya zuwo ya mabaya ja mutondo akasia, mba ukamike kakiki.

¹⁶ Baya Heswe usuhwe walio ukabwa metro jiwana, unene walio sentimetro 66.

¹⁷ Baya ni baya yilibwa ni mbambo jaali ja kubalakenya najo.

¹⁸ Ukalinga mabaya makumi aali a ku mbango ya ku sude.

¹⁹ Ukafula nawa yimanyino ya prata makumi awana, kushi lia baya ni baya linga yimanyino yaali nikulita ni mbambo ja baya.

²⁰ Ku mbango ya ku norde nawa chizechene, mabaya makumi aali,

²¹ ni yimanyino ya prata makumi awana, kushi lia baya ni baya yimanyino yaali yaali.

²² Ku mbango ya kunyima lia zuwo, ku chitokelo, ukalinga mabaya asambano,

²³ mba ukalinga nawa mabaya aali aali a ha mambango.

²⁴ Mabaya waze a ha mambango maalikwata chize kwilu ndoo hashi. Mabaya aali a ha mambango aali ukalinga chizechene.

²⁵ Chenacho muchikabwa mabaya nake akunangika ha yimanyino ya prata kumi ni yisambano, ku baya ni baya yimanyino yaali.

²⁶ “Ukasonga mikambo kumi ni yitano ya mutondo akasia, mikambo yitano ku mbango yimuwika ya zuwo,

²⁷ yitano ku mbango yikwo, ni yitano ku mbango ya kunyima lia zuwo ku chitokelo.

²⁸ Mukambo wa hakachi chatamba kuuhetesa ku songo ni songo lia mbango.

²⁹ Mabaya eswe ukashila oru, mba ukafula maswi ja oru ha kunjisa mo mikambo. Ye mikambo nawa ukashila oru.

³⁰ Zuwo lino lia makubu ukalitunga nikulita ni cheseko chize hinakulweza hano ha mulundu.

³¹ “Ukanuka chikalakala ni mahina atoma alefuna, ni Wanda ulauluka, ni wa ufungo, ni uchila. Ukachola ni yizulie ya akwa mwono a mwilu.

³² Ukachizezeleka ha manguji awana ja mutondo akasia waze haashila ni oru, waze hanjisa mo ngo, waze haamika mu yimanyino yiwana ya prata.

³³ Ukazezeleka chikalakala chize chili ha fulumba. Mba ukase mushete wa Usendo, uze muubwa ni mawe aali a Shimbi kumi, kunyima lia chikalakala. Che chikalakala muchikahandununa muma mwa chijila ni muma mwa chijila kuhiana.

³⁴ Sako chifuko ha mushete wa Usendo.

³⁵ Ukasa mesa muma mwa chijila ku sali lia norde ni chikwachilo cha ndeya ku sali lia sude, ha talanganyi ni mesa.

³⁶ “Ku chikolo cha zuwo ukazezeleka ko chikalakala cha kulinga ni mahina atoma alefuna chakwola ni Wanda ulauluka, ni wa ufungo, ni uchila.

³⁷ Ha kusa che chikalakala, ukasa manguji atano a mutondo akasia waze haashila oru, waze haanjisa mo ngo ja oru. Ukalinga nawa yimanyino yitano ya unengu ya kunjisa mo manguji waze.