Kutuhuka 25 - Mukanda Wa Zambi 1970

Yawana ya kutunga nayo zuwo lia Zambi lia makubu

¹ Mwene Zambi yambila Mose ngwenyi:

² “Lweza Aisraele angunehene yawana. Ukatambule yawana kuli mweswawo unazange kuhana ni mbunge yibema.

³ Ye yawana munutambula yino: oru, ni prata, ni unengu,

⁴ ni mahina atoma alefuna; ni Wanda wa ngona ja mapanga ulauluka, ni wa ufungo, ni uchila: ni mahina a ngona ja pembe;

⁵ ni makubu a makuji a panga waze haalomba ni ulombo uchila, ni malambu abema; ni mitondo akasia,

⁶ ni maji a ndeya; ni yuma ya vumba libema yakukama maji akuwaya ni akwocha;

⁷ ni mawe achila, ni mawe akwo akulamika ha chikuto ni ha chibwiko cha mwata wa mahako a Zambi,

⁸ Akangutungila zuwo lia chijila lia makubu, mba mungukabwa hakachi ko.

⁹ Nukalitunga ni yuma yaho yeswe, ngwe cheseko chize mungukulweza.

Mushete wa Usendo wa Zambi ni atu

¹⁰ “Ukasonga mushete wa mutondo akasia. Usuhwe wawo ukabwa metro 1 ni sentimetro 10, unene wawo sentimetro 66, ni chizundamo chawo sentimetro 66.

¹¹ Ukaushila oru yibema muchima ni haze, ukawola oru ku mbango ni mbango.

¹² Ukafula maswi awana a oru, ukaasa ku molu jawo awana, maswi aali sali ni sali.

¹³ Ukasonga mikambo ya mutondo akasia ya kumbachila mushete, ukayishila oru.

¹⁴ Mba ukayinjise mu maswi waze awana.

¹⁵ Mikambo yize yikatwama mu maswi ja mushete, kuchatambile kuyichiza nawa.

¹⁶ Mu mushete ukasa mo mawe aali a Shimbi waze mungukwaha.

¹⁷ “Ukafula nawa chifuko cha mushete, haze muhabwa homa ha kukulia milonga. Ukachifula ni oru yibema, usuhwe wacho metro 1 ni sentimetro 10, unene wacho sentimetro 66.

¹⁸ Ukafula nawa yizulie ya akwa mwono a mwilu aali a oru,

¹⁹ mukwo songo mukwo songo lia chifuko. Ukafulile yizulie ya mwono chishinda chimuwika ni chifuko.

²⁰ Akwa mwono chaatamba kuzazulula mapulwa ha kufuka chifuko, alitale meso jo ha chifuko, he homa ha kukukila milonga.

²¹ Ukasa mawe a Shimbi, waze mungukakwaha, mu mushete, mba ukase ho chifuko.

²² Kwenako, helu lia chifuko cha mushete wa Usendo wa yami ni Aisraele mungubwa ni kukutakana, mukwa mwono mukwo sali mukwo sali, yami mukachi.

Mesa ya mbolo ya kutumbieka ku meso ja Zambi

²³ “Ukasonga mesa ya mutondo akasia, usuhwe wayo sentimetro 88, unene wayo sentimetro 44, chizundamo chayo sentimetro 66.

²⁴ Ukayishila oru yibema ni kuyola nikuyijingilika kweswe.

²⁵ Ukajingilika mukomo, unene wayo milimetro 75, ukawola oru.

²⁶ Ukafula maswi awana a oru a kumbachila mesa, ukasa ku molu jayo awana, maswi aali sali ni sali.

²⁷ Ukasa e maswi a kunjisa mikambo ha kumbata mesa hehi ni mukomo.

²⁸ Ukasonga mikambo ya mutondo akasia, mba ukayishile oru.

²⁹ Ukafula yenga, ni misenge, ni ndeho, ni milondo, ya kuzujila nayo milambu ya vinyu, yeswe ukayifula ni oru yibema.

³⁰ Tangwa lieswe ubwa ni kusa mbolo ya kutumbieka ha mesa ku meso jami.

Ndeya

³¹ “Ukafula ndeya ya oru yibema. Nganda, ni mukungo, ni misenge, ni mawundu, ni yitemo yayo ya uhenya, yeswe yikabwe chishinda chimuwika cha oru.

³² Ye ndeya yikabwa ni mitango yisambano, yitatu sali yitatu sali.

³³ Mutango ni mutango ukabwa ni yitemo ya uhenya yitatu, yize muyilifwa ngwe mikeshi.

³⁴ We mukungo wa ndeya ukabwa ni yitemo yiwana ya uhenya, kulifwa ngwe mikeshi.

³⁵ Kushi lia mutango ni mutango ukasa ko wundu limuwika.

³⁶ Mawundu, ni mitango, ni mukungo wa ndeya, yeswe ukayifula ya chishinda chimuwika cha oru yibema yakutatula.

³⁷ Ukafula ndeya shimbiali ha mukungo umuwika, ukayiwika ha kutemuna kulutwe liayo.

³⁸ Ukafula lumana ni yenga yayo ya oru yibema.

³⁹ Anda kilo ja oru makumi atatu ni jitano ha kulinga ye ndeya ni yuma yayo yeswe.

⁴⁰ Tala kanawa, yuma yino ukayilinga nikulita ni cheseko chize hinakulweza hano ha mulundu.