Kutuhuka 24 - Mukanda Wa Zambi 1970

Zambi yakolesa Usendo ni Aisraele

¹ Mwene Zambi yambila Mose ngwenyi: “Kandukenu ha mulundu kuli yami, yena, ni Arone, ni Nadabe, ni Abihu, ni miata ja Aisraele makumi shimbiali. Hetamenu kapinji kasuku ha kunguwayila.

² Shina yena muukundama hehi ni yami. Atu akwo kanda akanduka ha mulundu hamwe ni yena.”

³ Mose yaya ni kwambulwila atu Shimbi jeswe jize ambile Zambi. Atu eswe yaakumbulula hamuwika ngwo: “Mutulinga yeswe yize Mwene Zambi hamba.”

⁴ Mose yasoneka Shimbi jeswe ja Mwene Zambi. Yalimeneka chichamene cheswe, yatunga chilumbilo mushi lia mulundu, yalumbika mawe kumi ni aali ngwe chingina nikulita ni mavungu kumi ni aali ja Aisraele.

⁵ Mba Mose yatuma akweze ha kwocha milambu ku meso ja Zambi, yaashiha makuji a ngombe a mulambu ha kulivwa ni Mwene Zambi.

⁶ Mose yanda amwe manyinga, yaasa mu jimwe mbashila, akwo yaasapwila ha chilumbilo.

⁷ Mba yanda mukanda wa Usendo, yautanga ku meso ja atu. No yaamba ngwo: “Mutulinga yeswe yize Mwene Zambi hamba, mutwononokena Shimbi jenyi.”

⁸ Mba Mose yanda manyinga mu mbashila, yaasapwila hali atu, yaamba ngwenyi: “Manyinga wano kaali Usendo uze Mwene Zambi hakolesa nenu muze hanwaha Shimbi jino jeswe.”

⁹ Mose yakanduka ha mulundu hamwe ni Arone, ni Nadabe, ni Abihu, ni miata ja Aisraele makumi shimbiali.

¹⁰ No yaamona Zambi ya Aisraele. Kushi lia molu jenyi yikubwa Chuma ngwe mawe a safira akwala, ulauluka ngwe mwilu.

¹¹ Zambi kalingile ko miata ja Aisraele chibi. No yaamumona, yaalia, yaanwa.

Mose ha mulundu wa Sinai

¹² Mwene Zambi yambila Mose ngwenyi: “Kanduka kuli yami ha mulundu, hanga ngukwehe mawe waze hinasoneka Shimbi ja kulongesa atu jami.”

¹³ Mose yalilulika hamwe ni chikwashi chenyi Yoshua, mba yaakanduka ha mulundu wa Zambi.

¹⁴ Muze kanda achikanduka, Mose yambila miata ja Aisraele ngwenyi: “Tushimbwilenu hano ndoo mutukahiluka. Arone ni Hure kaali hamwe ni yenu. Yoze uli ni chihula maahula.”

¹⁵ Mose yakanduka ha mulundu, lelwa yilifuka we mulundu.

¹⁶ Uhenya wa Mwene Zambi yiumoneka ha mulundu wa Sinai. Lie lelwa yilifuka mulundu matangwa asambano. Ha tangwa lia muchishimbiali Mwene Zambi yatambika Mose mu lelwa muze te ali.

¹⁷ Aisraele yaamona uhenya wa Zambi unahenye ha mutwe wa mulundu ngwe kahia.

¹⁸ Mose yakanduka, yanjila mu lelwa, yabwa ko matangwa makumi awana.