Kutuhuka 23 - Mukanda Wa Zambi 1970

Lingenu Kanawa

¹ “Kanda ulamikiza mutu niumwe, kanda ulifutula ni chingulungulu ha kubwa chela cha uhenge.

² Kanda ukaula mbunga ha kulinga yibi, waze maashindakenya mahuza ha kuhengesa ubatwilo.

³ Kanda ubatwila chiswale ni katonde.

⁴ “Nyi wamona ngombe hanji chimbulu cha mukwa kole ye kanatoko, mukwate umuhilwishile ye.

⁵ Nyi wamona chimbulu chenyi halimbuka ni yilemu, kanda umuhichika chizechene, alioze muhindwise.

⁶ “Nyi mukwenu chiswale kali ni mulonga, kanda umuhengesela wo.

⁷ Kanda ushindakenya mahuza. Kanda ushiha yoze keshi chitela, mumu munguhisa waze akulinga yibi ngwe yize.

⁸ Kanda utambula ubite wa mbenga, mumu ubite ngwe uze kuwakupupuchisa meso ja ngaji ni kuhisa akwa ululi.

⁹ “Kanda umwesa chilambala lamba. Nunanyingika chize abwa chilambala, mumu ni yenu nawa nwabwile yilambala mu chifuchi cha Egiptu.”

Mwaka wa muchishimbiali ni tangwa lia muchishimbiali

¹⁰ “Ukalima minda ye ha miaka yisambano ni kuhungula yize muukalima,

¹¹ alioze ha mwaka wa muchishimbiali ukahwimise mavu, yikabwe yihutu, hanga atu jami yiswale akalie kama. Mba yize muyikasala, tushitu a mu yambu no akalie. Chimuwika nawa ni minda ye ya vinyu ni ya olive.

¹² “Ukalinga milimo ye ha matangwa asambano, alioze ha tangwa lia muchishimbiali ukahwima, hanga ndungo je, ni njize, ni yimuna ye, no akahwime.

¹³ “Nukafunga yeswe yize hinanwamba. Kanda nukawayila mazambi akwo, chibwe kanda nukavuluka majina jo.”

Shimbi ja yiwanyino yitatu

¹⁴ “Mwaka ha mwaka Chakutamba kulinga yiwanyino yitatu ha kungulemesa.

¹⁵ Ukalinge chiwanyino cha Mbolo Yize Kuyishi Yitumbo, ngwe chize nakwambile. Kanda ukalia mbolo yize yili ni yitumbo ha matangwa shimbiali ha kakweji mutangu Abibe, mumu mwe kakweji yoze watuhukile mu chifuchi cha Egiptu. Mutu niumwe kanda aheta ku meso jami nyi keshi mulambu.

¹⁶ “Ukalinga chiwanyino cha Kubatula Mbuto, muze unabatula mbuto yitangu ya mu munda we. “Ukalinga nawa chiwanyino cha Yikulika ha kuhwa cha mwaka, muze muukahela mihuko ya vinyu ni ya olive.

¹⁷ Malunga eswe chaatamba kwiza ku meso ja yami Mwene Zambi, Zambi ye, yisuho yitatu mwaka ha mwaka, ha kunguwayila.

¹⁸ “Muze unangulambula mulambu wa chimuna, kanda uchilinga hamwe ni mbolo yize yili ni yitumbo. Maji a chimuna chize wangulambula, kanda akasala ndoo chichamene.

¹⁹ “Mwaka ha mwaka ukaneha mbuto yitangu ya ku minda ye ku zuwo lia Mwene Zambi, Zambi ye. “Kanda ukateleka mwana panga hanji mwana pembe ni yamwa ya naye.”

Yilakenyo ni kushinjila

²⁰ “Mungukatuma kanganda ka mwilu kulutwe lie, yoze makakufunga mu jila ni kukutwala kuma kuze hingunakululikila.

²¹ Ulifunga kanawa ku meso jenyi. Kanda ulituna ye. Kechi kanukonekena milonga yenu, mumu kaneza mu jina liami.

²² Alioze, nyi muwononoka ni kulinga yeswe yize ngunakwambe, mungubwa mukwa kole ya akwa kole je, mungulimika ni waze akukumwesa lamba.

²³ Kanganda kami makatetekela kulutwe lie, makakutwala ku chifuchi cha Aamore, ni Ahite, ni Aperize, ni Akanana, ni Ahive, ni Ajebuse. Ni ayo mungukaashiha.

²⁴ Kanda ukawayila mazambi jo, chibwe kwalingila. Kanda ukembulula yitanga ya atu waze. Ukabuzwola mahamba jo eswe.

²⁵ Nyi mununguwayila yami Mwene Zambi, Zambi yenu, mungunuwahisa ni yakulia ni meya, munguchiza kuyiza hakachi kenu.

²⁶ Mu chifuchi chenu, chibwe pwo umuwika kechi kaselumuna jimo hanji kubwa mumba. Munukatwama ni mwono matangwa anji.

²⁷ “Mungukevwisa mwongo akwa kole jenu, waze nwakuzwela no. Mungukaapwisa, mungukaahilwisa kunyima, no kumaakanuchina.

²⁸ Mungukaahapisa. Mungukahuma Ahive, ni Akanana, ni Ahite. Mungukaahuma kulutwe lienu ngwe chize mboji akuhuma atu.

²⁹ Chichi kaahuma ha mwaka umuwika, kuchina chifuchi muchikabwa chahululu, ni tushitu asasu maakanwokela naye.

³⁰ Mungubwa ni kwahuma hakehe hakehe kulutwe lienu, ndoo ni kuze munukoka ni kuzuka chifuchi chize.

³¹ Mungukatohwesa njiza yenu chize ku kalunga lwiji Muchila, ndoo ku kalunga lwiji Mediterane, chize nawa ku puya ya Sinai, ndoo ku lwiji wa Ufrateze. Atu ja chifuchi chize mungukanwahoo, munukaahuma kulutwe lienu.

³² Kanda nukolesa no Usendo, chibwe ni mazambi jo.

³³ Kanda akatwama mu chifuchi chenu, kuchina maakanupiangula ha kunguvulumuna. Nyi munukawayila mazambi jo, kumuchikabwa ngwe muheto kuli yenu.”