Kutuhuka 22 - Mukanda Wa Zambi 1970

Shimbi ja kufweta milonga

¹ “Nyi mutu meya ngombe hanji panga, mba mamulanjisa hanji mamushiha, chamutamba kufweta ngombe atano ha ngombe yoze, ni mapanga awana ha panga yoze.

^2-4 Chamutamba kwafweta lume. Nyi keshi nichimwe chakufweta, chatamba kumulanjisa ngwe ndungo ha kufweta Chuma chize anakeya. Chimuna chize anakeya, ngombe hanji chimbulu hanji panga, nyi amuwana ni mwono mu moko jenyi, mamufweta yisuho yaali. “Nyi ngwe akwata mwiji unabubu zuwo ha ufuku hanga akeye, mba nyi amushiha, yoze wamushiha keshi kwenyi ni mulonga. Alioze nyi wamushiha ha mwalwa, kali ni mulonga.

⁵ “Nyi mutu wecha yimuna yenyi ha kuya ni kulia mu yambu hanji mu munda wa vinyu, mba yimuna yize hiyaaya ni kulia mu munda wa mbala, mutu yoze chamutamba kufweta yuma ya mu munda wenyi.

⁶ “Nyi mutu waluwila munda wenyi, mba ke kahia kasambuka, kocha mbuto mu munda wa mbala, yize yili ha ulime, hanji yize yakulumbika kulu, mutu yoze wochanga kahia, akafwete yuma yeswe.

⁷ “Nyi mutu wamwaha mukwo mbongo hanji yimwe yuma ha kunuswekela yo, mba ye yuma eji haayiya mu zuwo lia mutu yoze, nyi mwe mwiji wasoloka, chamutamba kufweta yisuho yaali.

⁸ Alioze, nyi mwe mwiji kasolokele, atwale mukwa zuwo maha ngaji ha kumona nyi keyile ko kwenyi.

⁹ “Nyi ngwe atu aali anazwelela ngombe, hanji yimbulu, hanji mapanga, hanji mahina, hanji chimwe Chuma chize chatoka, aye no maha ngaji. Mba mweswawo ngaji mahisa chamutamba kufweta mukwo yisuho yaali.

¹⁰ “Nyi mutu mamwaha mukwo chimbulu, hanji ngombe, hanji panga, hanji cheswe chimuna ha kumwajilila cho, mba susumuku hichafwa, hanji chalemana, hanji haachibuba mu jita, niumwe kachimwene,

¹¹ yoze ahele kwajilila alishinge ku meso ja ngaji ngwenyi: ‘Hi yami ko namwiyanga,’ mba mwenyacho akachifuliele. Mutu yoze te wamwajila kanda akafweta.

¹² Alioze, nyi ngwe mwiji hachiya, yoze te wachajila afwete mukwa chimuna.

¹³ Nyi ngwe tushitu a mu yambu haachilia, yoze wachajila atwale yifwo yize yasala ho kuli yela. Ha chino kanda afweta kwenyi.

¹⁴ “Nyi mutu watambula chimuna kuli mukwo, mba chalemana hanji chafwa muze te mwenyacho keshiho, mutu yoze afwete chimuna chize;

¹⁵ nyi mwenyacho he ali, kanda afweta. Alioze, nyi hachitambula, hafweta mbongo ha kulinga nacho milimo, nyi chafwa, mutu yoze kechi kufweta nichimwe.

Shimbi hakutwala ku kulivwa cha atu

¹⁶ “Nyi lunga malimona ni mwana pwo yoze kanda achimutenda, lunga yoze akahane chihako, mba abwe pwo lienyi.

¹⁷ Alioze, nyi tato ya mwana pwo kazangile lunga yoze kumbata mwanenyi, mwe lunga akafwete mbongo jize jinalite ni chihako cha mwana pwo yoze kanda achilimona ni lunga.

¹⁸ “Mukwa kupanda chatamba kumushiha.

¹⁹ “Mweswawo mabomba ni kashitu chatamba kumushiha.

²⁰ “Mutu yoze malambula mulambu kuli zambi mukwo, hi kuli yami Mwene Zambi ko, chatamba kumushiha.

²¹ “Chilambala kanda numulinga chibi, hanji kumuhungumiona, mumu ni yenu nawa nwabwile yilambala mu chifuchi cha Egiptu.

²² Kanda numwesa lamba pwo yoze hafwisa lunga, hanji mwana shiwa.

²³ Nyi nwamwesa lamba, mungwevwila muze maangulilila,

²⁴ mungutenuka, mungunushiha mu jita, mapwo jenu maakabwa twamishi, ni ana jenu maakabwa shiwa.

²⁵ “Nyi wasondamisa mbongo kuli umwe chiswale wa kuli atu jami, kanda utambula mbwezo, ngwe chize akulinga atu akwo.

²⁶ Nyi muutambula kazaku ka mutu ngwe chifungo, ukamuhilwisa yo muze tangwa kanda lichitoka,

²⁷ mumu mwenawo akulifuka muze anevu chishika. Yika malifuka? Nyi mangulilila, mungumukwasa, mumu nguli mukwa keke.

²⁸ “Kanda ukalelesa Zambi ye, chibwe kanda ukatuka makulwana je.

²⁹ “Kanda ukalaluka kungulambula mihuko ya mu munda we, tiriku, ni vinyu, ni maji. “Ukangwaha ana je atangu a malunga.

³⁰ Ngwehe atangu kusemuka a ku ngombe je, ni mapanga je. Ana atangu atwame hamwe ni anaye matangwa shimbiali, mba ha tangwa lia muchinake muungwa ho.

³¹ “Yenu nuli atu jami alinanga. Kashika kanda nulia yifwo yamukoka. Nukayihana kuli tuwa.”