Kutuhuka 21 - Mukanda Wa Zambi 1970

Shimbi hakutwala kuli ndungo

¹ “Jino je Shimbi jize muuhana kuli Aisraele:

² Nyi walanda Kahebreu, chamutamba kukulingila miaka yisambano. Ha mwaka wa muchishimbiali akatusuke ku undungo wenyi, kanda akafweta nichimwe.

³ Nyi wamulanjile twamishi, makaya kwenyi nawa twamishi. Alioze, nyi te kali ni pwo, makaya nawa ni pwo lienyi.

⁴ Nyi te mwe kako hanamwehe pwo, mba ndungo hasema nenyi ana, mwe pwo ni e ana maabwa a mbala a kako. Mba mwe lunga yoze, makaya kwenyi ukawenyi.

⁵ Alioze nyi mwe ndungo makamba kwenyi ngwenyi: ‘Ngunazange kaka, ni mukwetu pwo, ni ana jami, Chazangile kutusuka,’

⁶ mba kako mamutwala homa ha kuwayila, kwenako maya nenyi ku chikolo cha zuwo, mamutuwa ku twitwi. Mba mabwa ndungo yenyi ndoo ku kufwa chenyi.

⁷ “Nyi umwe lunga walanjisa mwanenyi wa pwo mu undungo, mwana yoze kanda akatuka mu undungo ngwe chize akukatuka ndungo wa lunga.

⁸ Nyi wamulanjisa kuli umwe lunga yoze unazange kumumbata, alioze nyi keshi kuwahilila nenyi, tato amukule. Kanda umulanjisa kuli yilambala, mumu chili chibi.

⁹ Nyi mwe kako kananyongo kumuhana kuli mwanenyi wa lunga, chamutamba kumupwisa ngwe mwanenyi.

¹⁰ Nyi umwe lunga mambata pwo mukwo, pwo yoze mutangu akamuhoka ni kumujika ni kumusa vumbi ngwe hatangu.

¹¹ Alioze nyi kachilingile, amutusule kwenyi mu undungo, kanda amwita mbongo.

Shimbi ha kuzwela hanji ha kushiha mutu

¹² “Mweswawo malamba mukwo ni kumushiha, neye akamushihe.

¹³ Alioze, nyi mutu mashiha mukwo, te kazangile kumushiha, achinyine kuze mungukanulweza, ha kulamwina.

¹⁴ Alioze, nyi mutu mevwila mwenyembo wenyi ufwatulo, ni kumushihila shili, neye amushihe, chibwe machinyina ku chilumbilo chami.

¹⁵ “Mweswawo malamba tato hanji naye, akamushiha.

¹⁶ “Mweswawo makwata mukwo ni kumulanjisa hanji kutwama nenyi, akamushiha.

¹⁷ “Mweswawo matuka tato hanji naye, akamushiha.

¹⁸ “Nyi malunga aali maazwela, mba umwe walamba mukwo liwe hanji kome, alioze nyi mwe mutu kafwile ko, yoze wamulambanga kanda amumwesa lamba. Alioze nyi mutu yoze alambanga kali ha muhela,

¹⁹ mba kutala ngwe kanahase kukatuka ni kwendangana, hanji kwendela ku pango, yoze wamulambanga akamufwete matangwa waze te akuyiza, ni yitumbo yize te akutambula.

²⁰ “Nyi mutu malamba ndungo yenyi wa lunga hanji wa pwo ni mutondo, mba mwe ndungo mafwa shimbu lizeliene, mutu yoze amumwese lamba.

²¹ Alioze, nyi mwe ndungo wabomba tangwa limuwika hanji matangwa aali mba mafwa, kako kanda amumwesa lamba, mumu kuuli ubite wenyi.

²² “Nyi amwe malunga maazwela, mba umwe malamba kafumbakaji, neye maselumuna mwana, alioze mwe pwo kafwile ko, yoze walambanga pwo afwete chize lunga lienyi meta, nyi ngaji matayiza.

²³ Alioze nyi mwe pwo walemana, lunga yoze wamulambanga chatamba kumumwesa lamba, mwono ni mwono,

²⁴ liso ni liso, lizo ni lizo, kwoko ni kwoko, kulu ni kulu,

²⁵ kwocha ni kwocha, ulema ni ulema, mujiji ni mujiji.

²⁶ “Nyi mutu malamba ndungo yenyi wa lunga hanji wa pwo ha liso, mba lie liso lialokoka, akamutusule mu undungo, kafwa ngwe kafweta liso lize,

²⁷ Nyi mabukula lizo lia ndungo yenyi wa lunga hanji wa pwo, akamutusule mumu ha lizo lienyi.

Shimbi hakutwala kuli akwa yimuna

²⁸ “Nyi kuji a ngombe wabuba umwe lunga hanji pwo, mba mwe mutu mafwa, ngombe akamushihe ni mawe. Yifwo yenyi kanda akayilia, alioze kanda akasuma mulonga kako ya ngombe.

²⁹ Alioze, nyi kuji a ngombe te kakwete ndako ya kububa atu, nyi haanalweze kako, hindu kamufungile ko mu tanga, mba nyi mashiha umwe lunga hanji pwo, ngombe yoze akamushihe ni mawe, ni mwe kako nawa akamushihe.

³⁰ Alioze, nyi maamwamba ngwo, fweta ulilamwine, chamutamba kufweta jeswe jize maamwita.

³¹ Nyi mwe kuji a ngombe mashiha mwana lunga hanji mwana pwo, chatamba kukaula Shimbi yinoyene.

³² Nyi mwe kuji a ngombe mashiha ndungo wa lunga hanji wa pwo, kako chamutamba kufweta mwenya ndungo makumi atatu a mbongo ja prata, ni mwe ngombe chatamba kumushiha ni mawe.

³³ “Nyi mutu washima wina, kuufuka ka, nyi kuji a ngombe hanji chimbulu maholokela mo,

³⁴ mukwa wina akafwete mukwa chimuna, mba chimuna muchibwa cha mukwa wina.

³⁵ Nyi umwe lunga kuji a ngombe yenyi washiha kuji a ngombe wa mbala, ayo eswe aali akalanjise ngombe wa mwono, mba akalipangile je mbongo, akalitetele nawa ngombe yoze unafu.

³⁶ Alioze, nyi haanyingika ngwo, ngombe yoze te kakububa, nyi kako te keshi kumukuchika, chamutamba kufweta ngombe wa mwono, ni yoze unafu mabwa niwenyi.