Kutuhuka 20 - Mukanda Wa Zambi 1970

Shimbi kumi

¹ Zambi yamba maliji wano ngwenyi:

² “Yami nguli Mwene Zambi ye, yoze wakutuhwishile mu chifuchi cha Egiptu, kuze wabwile ndungo.

³ “Kanda uwayila zambi mukwo shina yami.

⁴ “Kanda ulisongela hamba walifwa ni chimwe Chuma cha mwilu, hanji cha hano hashi, chibwe cha mu meya mushi lia hashi.

⁵ Kanda wafukamina, chibwe kwakombelela, mumu yami Mwene Zambi, Zambi ye, nguli Zambi ya ukwa. Atu waze akunguvutwokela mungukaamwesa lamba, ni ana jo, ni ajikulu jo, ni tukwatambuli two.

⁶ Alioze tununu twa yisemuko ya waze akunguzanga ni akufunga Shimbi jami, mungubwa ni kwalweza utu.

⁷ “Kanda uvuluka jina lia yami Mwene Zambi, Zambi ye, ni kaleleso, mumu chichi kasambisa yoze malelesa jina liami.

⁸ “Lemesa tangwa lia kuhwima, ulipwise lia chijila.

⁹ Ulinga milimo ye yeswe ha matangwa asambano,

¹⁰ alioze tangwa lia muchishimbiali lili tangwa lia kuhwima, tangwa lia yami Mwene Zambi ye. Kanda Ulinga ho mulimo, chibwe yena, hanji ana je, chibwe ndungo je, hanji yimuna ye, chibwe yilambala waze atwama mu chifuchi che.

¹¹ Yami Mwene Zambi natangile lilu, ni hashi, ni kalunga lwiji, ni yeswe yize yilimo ha matangwa asambano, mba yinguhwima ha tangwa lia muchishimbiali. Kashika yami Mwene Zambi yinguwahisa tangwa lize lia kuhwima, yingulipwisa lia chijila.

¹² “Lemesa tatenu ni noko, hanga Ukatwame matangwa anji mu chifuchi chize yami Mwene Zambi ngunakwehe.

¹³ “Kanda ushiha mutu.

¹⁴ “Kanda Ulinga utanji.

¹⁵ “Kanda wiya.

¹⁶ “Kanda ulamikiza mutu niumwe.

¹⁷ “Kanda uvwila chipululu zuwo lia mwenyembo we, chibwe pwo lienyi, hanji ngamba yenyi, chibwe ngombe yenyi, hanji chimbulu chenyi, chibwe Chuma chikwo chize ali nacho.”

Atu yeevwa woma

¹⁸ Muze atu heevwa kukulunguza cha vula ni kuhiohia cha chitavwi, ni muze haamona mihenyo ni kufwindangana cha mwishi ha mulundu, yaachikima ni woma, mba yaaya ni kumana kusuku.

¹⁹ No yaambila Mose ngwo: “Tuhanjikise yena, kumutwivwa, alioze nyi Mwene Zambi watuhanjikisa kumutufwa.”

²⁰ Mose ngwenyi: “Kanda nwivwa woma, Zambi keza lume ni kunweseka, amone nyi nwakumuvwila woma, hanga kunuchi kuvulumuna.”

²¹ Hindu atu te kusuku anamana, shina Mose lume mwe wakundamine ku lelwa lilaa, kuze te anatwama Zambi.

Zambi yaaha Shimbi hakutwala ku yilumbilo yenyi

²² Mwene Zambi yambila Mose ngwenyi: “Ukalweza Aisraele maliji wano ngwe: ‘Yenwene hinwalivwila chize yami Mwene Zambi mwilu hinahanjika ni yenu.

²³ Kanda nulifulila mazambi a prata hanji a oru, ha kuwayila hamuwika ni yami.

²⁴ “ ‘Ukangulingila chilumbilo cha mavu. Ha chilumbilo chize he munubwa ni kulambwila mapanga ni ngombe, nikwoocha liakulu. Munuchilinga ha kulweza kulivwa chenu ni yami Zambi yenu. Kweswako mungukanulweza ha kunguwayila, mungukeza ni kunuwahisa.

²⁵ Nyi nwangutungila chilumbilo cha mawe, kanda nuchitunga ni mawe akubula ni utale. Mumu, nyi nwabula mawe ni utale, munwabihisa.

²⁶ Kanda nutunga ndondelo ku chilumbilo, kuchina uselesele wenu muusoloka.’ ”