Kutuhuka 2 - Mukanda Wa Zambi 1970

Kusemuka cha Mose

¹ Umwe Kalevi yambata pwo wa ku vungu lienyi.

² Mwe pwo yaka ufumba, yasema mwana wa lunga. Muze naye hamona ngwenyi, mwana wabema naye, yamusweka tukweji atatu.

³ Alioze muze te kahashile kumusweka nawa, yanda kamutonga ka manenga, yakakwita kaso ni usolososhi, yasa mo mwana, mba yaya ni kumusa hakachi ka mbungu.

⁴ Ndumbwenyi yezaza ni kumana hakamwihi amone chize muchimuwana.

⁵ Mwana wa pwo wa mwanangana yapalumuka ku lwiji ni kusana, muze te tuvumbi twenyi a mapwo anendangana ku mbumbulu ya lwiji. Mwe mwana wa mwanangana yamona ke kamutonga mu mbungu, mba yatuma umwe mwana pwo amwanjile ko.

⁶ Muze mwana wa mwanangana habakula ke kamutonga, yamona mwe mwana, te kanalili. Yamuvwila keke, yamba ngwenyi, “Au kali umwe mwana wa Ahebreu.”

⁷ Mba mwe ndumbu ya mwana yahula mwana wa mwanangana ngwenyi: “Nalemba mwane, nguye ngutambike ndeji wa kuli Ahebreu eze akulelele mwana yono, nyi?”

⁸ Iye ngwenyi: “Chibema, Yako.” Mba ndumbu ya mwana yaya ni kutambika naye.

⁹ Mwe mwana wa mwanangana yambila mama yoze ngwenyi: “Tambula mwana yono, ungulelele ye, mba mungukufweta.” Pwo yatambula mwe mwana, yamulela.

¹⁰ Muze mwana hakola, yamutwala kuli mwana wa mwanangana. Neye yamupwisa mwanenyi, yamuluka jina ngwenyi, Mose.

Mose yachinyina ku Midiane

¹¹ Limwe tangwa, muze Mose hakola, yaya ni kunangisa usoko wenyi Ahebreu. Yamona chize akwa Egiptu aalingishile milimo ni tachi. Yamona nawa umwe mukwa Egiptu kanashihi umwe Kahebreu.

¹² Mose yatala sali ni sali, kamwene mutu niumwe, mba yashiha mwe mukwa Egiptu, yamuvumbika mu masekeseke.

¹³ Muze hikwacha, Mose yaya nawa, yamona malunga aali Ahebreu, te kaanazwele. Mba yambila yoze unalingi mukwo chibi, ngwenyi: “Kuchi kevwe unalambe mukwenu chichize?”

¹⁴ Mwe lunga yamukumbulula ngwenyi: “Iya wakupwishile mukwa kutuyula hanji ngaji mukachi ketu? Kuchi, unazange kungushiha ngwe chize unakashiha mukwa Egiptu zau, nyi?” Mose yevwa woma, yalihanjikisa ngwenyi: “Mamee, kuma Chuma chino haachinyingika.”

^15-16 Muze mwanangana hachivwa, yafupa kushiha Mose. Alioze Mose yachina, yaya ni kutwama mu chifuchi cha Midiane. Limwe tangwa muze te anatwama ku shima lia meya, ana mapwo shimbiali a Jetro, hako wa ku Midiane, yeeza nikutaha meya ha kuzalisa yingolongolo ya kunwisa mbunga ya yimuna ya tato.

¹⁷ Alioze amwe tufunga yeeza, yaahanga. Mba Mose yakatuka, yeza ha kwakwasa, yanwisa ye mbunga ya mapanga jo.

¹⁸ Muze haahiluka, tato yaahula ngwenyi: “Musono kuchi nweza chichize nikawashi?”

¹⁹ Yaakumbulula ngwo: “Umwe mukwa Egiptu watukinjilanga tufunga. Chikwo nawa, katutahilanga meya nikunwisa mapanga.”

²⁰ Yahula ana jenyi ngwenyi: “Kuli ali? Kuchi mba nwahichikanga lunga yoze? Mutambikenu hanga alie.”

²¹ Mose yevwa kuwaha ha kutwama ni lunga yoze, neye yahangisa mwanenyi Zipora kuli Mose.

²² Mose yasema nenyi mwana wa lunga, yamuluka jina ngwenyi, Gershome, mumu yamba ngwenyi: “Nguli njize mu chifuchi cha mbala.”

²³ Miaka yinji yabalikile, mba mwanangana wa Egiptu yafwa. Aisraele yeevwa kubiha ha undungo wo, yaalila chikolo, ni kulila cho yichiheta ku matwi ja Zambi.

²⁴ Neye yewuluka Usendo wenyi ni Abrahama, ni Isake, ni Yakoba,

²⁵ yamona lamba lia Aisraele, yeevwila keke.