Kutuhuka 19 - Mukanda Wa Zambi 1970

Aisraele ku mulundu wa Sinai

^1-2 Aisraele yaakatuka ku Refidime, mba ha tangwa litangu lia kakweji wa muchitatu, chize kuze Aisraele atuhukile mu chifuchi cha Egiptu, yaaheta mu puya ya Sinai. Henaho asele musumba hatalanganyi ni mulundu.

³ Mose yakanduka ha mulundu ni kulitakana ni Zambi. Mba helu lia mulundu Mwene Zambi yamutambika, yamwamba ngwenyi: “Wano e maliji waze muukahanjika kuli Aisraele, vungu lia Yakoba, ngwe:

⁴ ‘Yenwene nunakamona chize yami Mwene Zambi ngunakalinga akwa Egiptu, ni chize ngunakanuneha kuno, ngwe ha mapulwa ja tela.

⁵ Haliabwila, nyi munubwa nikungwivwa ni kufunga Shimbi ja Usendo wami, uze nakolesele ni yenu, munubwa atu jami chamwenemwene. Hashi heswe nihami, alioze munubwa atu jami waze natongwele.

⁶ Munubwa akwa wanangana wami wa mahako, vungu lia chijila.’ ”

⁷ Mba Mose yaya ni kutambika miata ja Aisraele, yaalweza yeswe yize Mwene Zambi amwambile.

⁸ Atu eswe yaakumbulula hamuwika ngwo: “Mutulinga yeswe yize Mwene Zambi hamba.” Mose yaya nikulweza Mwene Zambi ngwenyi: “Atu haatayiza.”

⁹ Mwene Zambi yamwamba Mose ngwenyi: “Mungukusolokela mu lelwa lilaa, hanga muze atu maangwivwa chize ngunahanjika ni yena mu lelwa, mba maakakufuliela matangwa eswe.” Mose yalweza Mwene Zambi yize atu akumbulwile.

¹⁰ Mwene Zambi yamwamba ngwenyi: “Yako ulweze atu alijilike musono ni hamene ha kunguwayila. Chaatamba kukosa mahina jo.

¹¹ Chaatamba kulijilika hakutwala ku tangwa lia hamene alize. Ha lie tangwa alio, yami Mwene Zambi mungukahulumuka helu lia mulundu wa Sinai, hanga atu eswe akangumone.

¹² Ukasa njiza ha kujingilika mulundu, hanga atu keechi kutangunuka njiza ha kuheta ku mulundu, chibwe kukwata ko. Nyi mutu makwata ko, akamushiha.

¹³ Akamushiha ni mawe hanji ni mivwi, alioze kumukwata ka. Shimbi yino yili ya atu ni tushitu, chatamba kwashiha. Alioze muze maakemba chitavwi, atu akakanduka ha mulundu.”

¹⁴ Mose yapalumuka ha mulundu, yaheta kuli atu, yalweza alijilike ha kuwayila. No yaakosa mahina jo,

¹⁵ mba Mose yaamba ngwenyi: “Lijilikenu hakutwala ku tangwa lia hamene alize, kanda nulimona ni mapwo jenu.”

¹⁶ Ha tangwa lia muchitatu yikubwa mihenyo ni kukulunguza helu lia mulundu, lelwa lilaa yilimoneka, ni chitavwi yichihiohia kuhiana. Atu eswe ha musumba yaachikima ni woma.

¹⁷ Mose yatuhwisa atu mu musumba ha kuya ni kutakana ni Zambi. No yaaya ni kumana mushi lia mulundu.

¹⁸ Mulundu weswe wa Sinai yiulaa bwii ni mwishi, mumu Mwene Zambi yahulumuka ha mulundu mu kahia, mwishi yiukakumuka ngwe wa ku lutengo, atu eswe yaachikima kuhiana.

¹⁹ Chitavwi yichihiohia kuhiana. Mose yahanjeka, mba Zambi yakumbulula Mose ni liji lia tachi ngwe lia kukulunguza cha vula.

²⁰ Mba Mwene Zambi yahulumuka helu lia mulundu wa Sinai. Yatambika Mose akanduke, neye yakanduka.

²¹ Mwene Zambi yambila Mose ngwenyi: “Palu muka ulweze atu ngwe: ‘Kanda atangunuka njiza ha kwiza ni kungutala. Nyi ka, atu anji maafwa.

²² Chibwe mahako ja Zambi, waze akukundama kuli yami Mwene Zambi, alijilike. Nyi ka, mungwamwesa lamba.’ ”

²³ Mose yakumbulula Mwene Zambi ngwenyi: “Atu kaahashile kukanduka, mumu watulweza ngwe, mulundu uli wa chijila, hiwaujingilika ni njiza.”

²⁴ Mwene Zambi yamwamba ngwenyi: “Palumuka usake Arone. Alioze mahako ja Zambi ni atu akwo kanda atangunuka njiza ha kukanduka. Nyi ka, mungwamwesa lamba.”

²⁵ Mose yapalumuka, yalweza atu yize yeswe.