Kutuhuka 18 - Mukanda Wa Zambi 1970

Jetro yanangisa Mose

¹ Jetro, hako wa mu chifuchi cha Midiane, Ukwe wa Mose, yevwa yeswe yize Mwene Zambi halingila Mose ni Aisraele muze atuhukile mu chifuchi cha Egiptu.

² Jetro yanda Zipora, pwo lia Mose, yamunehena ye, mumu Mose te hanamuhilwisa kuli Ukwe wenyi.

³ Yaneha nawa ana jenyi a malunga, Gershome ni Eliezere. (Mose te hanaluku mwana mutangu jina ngwenyi, Gershome. Mumu ngwenyi: “Nguli njize mu chifuchi cha mbala.”

⁴ Mwana mukwo te hanamuluku jina ngwenyi, Eliezere. Mumu ngwenyi: “Zambi ya tata hangukwasa, hangulamwina ku mukwale wa mwanangana wa Egiptu.”)

⁵ Jetro yeza ni pwo lia Mose ni ana jenyi aali a malunga mu puya, kuze Mose asele musumba, ku mulundu wa Zambi.

⁶ Te hatuma kulu liji kuli Mose ngwenyi: “Yami Ukwe we Jetro, nguneza ni mukwenu pwo ni ana je aali.”

⁷ Mose yaya ni kumubatwiza, yafulamana ku meso jenyi, yamushisa. No yaalihula sango, mba yaanjila mu zuwo lia Mose lia makubu.

⁸ Mose yamwambulwila sango jeswe jize Mwene Zambi alingile ni mwanangana wa Egiptu ni atu jenyi mumu hali Aisraele. Yamulweza lamba lize amwene mu jila, ni chize Mwene Zambi waapulwile.

⁹ Jetro yawahilila ha kwivwa yiwape yize Mwene Zambi alingilile Aisraele muze aapulwile mu moko ja akwa Egiptu.

¹⁰ Yamba ngwenyi: “Mwene Zambi afumane, mumu unakanuchiza mu moko ja mwanangana wa Egiptu ni atu jenyi, unakanupulula mu undungo.

¹¹ Haliabwila mba hinanyingika ngwami, Mwene Zambi kanahiana mazambi akwo eswe, mumu halamwina atu jenyi Aisraele, chibwe shili ya akwa Egiptu yahianyine naye.”

¹² Mba Jetro yalambula Zambi mulambu wa kwocha ni milambu yikwo. Arone ni miata ja Aisraele yaalinga chiwanyino ni Ukwe wa Mose ku meso ja Zambi.

Mose yatongola ngaji

¹³ Muze hikwacha, Mose yatwama ha chitwamo cha kubatwila atu milonga, chize ku chichamene ndoo ku ufuku.

¹⁴ Jetro, Ukwe wenyi, muze hamona chize Mose analingi, yamuhula ngwenyi: “Kuchi unalingi chize ni atu wano? Mumu yika unatwamina ukawe, chize ku chichamene ndoo ku ufuku, ha kusopesa atu wano?”

¹⁵ Mose ngwenyi: “Mumu atu kaakwizaza ha kunyingika upale wa Zambi.

¹⁶ Nyi ngwe atu aali haazwela, meeza kuli yami, mba mungwabatwila ni kwalweza Shimbi ni yiyulo ya Zambi.”

¹⁷ Mba Jetro yamwamba ngwenyi: “Kuushi kulinga kanawa.

¹⁸ Yena ni atu wano munuhonga nikawashi. Milimo yakwoka naye, kuwahashile kuyilinga ukawe.

¹⁹ Haliabwila banjika, ngunakwehe mana, mba Zambi mabwa hamwe ni yena. Yena muubwa hako ya atu ku meso ja Zambi ni kwahakwila.

²⁰ Yena muubwa ni kwalongesa yiyulo ni je Shimbi, ni kwalweza chize chaatamba kubwa, ni chize chaatamba kulinga.

²¹ Alioze tongola akwa mana, waapwise miata a tununu twa atu, ni a makulakaji, ni a makumi atano, ni a kumi. Chaatamba kubwa waze akulemesa Zambi, waze atu akusa shindakenyo, waze keeshi kulia ubite wa mbenga.

²² Akabwe ngaji matangwa eswe. Milonga yikalu maaneha kuli yena, alioze yize yashi maabatula ayo ene. Ha chino milimo ye kuyichikubwa yinji, mumu no maakukwasa ha kuchiza ko yikwo.

²³ Nyi wachilinga, Zambi neye che anambe. Kuuchi kuhonga nikawashi. Muumona atu eswe milonga yo hiyahwa, no maahilwoka ku mazuwo jo ni uhwimino.”

²⁴ Mose yevwa liji lia Ukwe wenyi, yalinga ngwe chize amwambile.

²⁵ Yatongola akwa mana mu Israele, yaapwisa miata ja mbunga ya tununu twa atu, ni ya makulakaji, ni ya makumi atano, ni ya kumi.

²⁶ No yaabwa ngaji ja atu. Yaatwala twala milonga yikalu kuli Mose, alioze yize yashi yaayibatwola ayo ene.

²⁷ Mba Mose yalishika ni Ukwe wenyi, neye yahiluka ku chifuchi chenyi.