Kutuhuka 17 - Mukanda Wa Zambi 1970

Mwene Zambi yatuhwisa meya a kunwa mu liwe

¹ Chikungulwila cheswe cha Aisraele yaakatuka ku puya ya Sine, yaaya ni kututujoka nikulita ni liji lia Mwene Zambi. Mba yaasa musumba ku Refidime, alioze meya a kunwa te keeshiko.

² Mba atu yaabutuka kuketeka Mose ngwo: “Twehe meya tunwe.” Mose ngwenyi: “Mumu yika nunanguketekela? Kuchi nuneseka Mwene Zambi?”

³ Alioze atu yeevwa pwila yinji, yaaketeka Mose ngwo: “Mumu yika watutuhwishile mu Egiptu? Watunehene muno hanga tufwe ni pwila, ni ana jetu, ni yimuna yetu, nyi?”

⁴ Mba Mose yaliumba kuli Mwene Zambi ni chinyengo ngwenyi, “Kuchi mungulinga ni atu wano? Kaanambe kungushiha ni mawe.”

⁵ Mwene Zambi yamwamba ngwenyi: “Katwisa amwe miata ja Aisraele, nutetekele kulutwe lia atu. Umbata nawa lukanda yoze walambile ha lwiji Nile.

⁶ Mungumana kulutwe lie ha limwe liwe ha mulundu wa Sinai. Muumulamba ha liwe, mba meya maatuhuka, hanga atu anwe.” Mose yalinga Chenacho ku meso ja miata ja Aisraele.

⁷ Kuma kuze Mose yaluka ko jina ngwenyi, Masa, kanda Meriba, mumu kwekuze Aisraele aketekelele Mose. Mumu kwekuze nawa esekelele Mwene Zambi, muze ahulile ngwo: “Mwe Mwene Zambi kali ni yetu, nyi ka?”

Aisraele yaasa jita ni Aamaleke

⁸ Mba Aamaleke yeeza ni kwasa jita ni Aisraele kuze ku Refidime.

⁹ Mose yambila Yoshua ngwenyi: “Tongola malunga, hanga hamene uye ukase jita ni Aamaleke. Yami mungukamana ha mulundu ni lukanda yoze anguhele Zambi”

¹⁰ Yoshua yalinga ngwe chize amwambile Mose, yaya ni kwasa jita ni Aamaleke. Alioze Mose ni Arone ni Hure yaakanduka ni kumana ha mulundu.

¹¹ Muze Mose azundwile moko jenyi, Aisraele yaakumba, alioze muze moko jenyi haalekumuka, Aamaleke yaakumba.

¹² Muze moko ja Mose haazeya, Arone ni Hure yaaneha liwe hanga Mose atwame ho. Arone ni Hure yaamana ku lumbu lienyi, yaamukwasa kwolola moko jenyi ndoo ni kutoka cha tangwa.

¹³ Mba Yoshua yakumba Aamaleke liakulu.

¹⁴ Mba Mwene Zambi yambila Mose ngwenyi: “Soneka yuma yino ha mukanda hanga yikabwe chiwulwiso. Lweza Yoshua ngwe: ‘Mungukakuwisa vungu lia Ameleke.’ ”

¹⁵ Mose yatunga chilumbilo, yachiluka jina ngwenyi: “Mwene Zambi kali bendelo liami.”

¹⁶ Yamba ngwenyi: “Zundulenu bendelo lia Mwene Zambi! Kumabwa ni kwasa jita ni Aamaleke ndoo ku miaka yeswe!”