Kutuhuka 16 - Mukanda Wa Zambi 1970

Mwene Zambi yalisa Aisraele

¹ Chikungulwila cheswe cha Aisraele yaakatuka ku Elime. Mba ha tangwa kumi ni lia muchitano ha kakweji wa muchaali, chize kuze akatukile mu chifuchi cha Egiptu, yaaheta mu puya ya Sine. Puya yize yili hakachi ka Elime ni mulundu wa Sinai.

² Chikungulwila cheswe cha Aisraele yaalinyenga ku meso ja Mose ni Arone ngwo:

³ “Te chinalite kachi Mwene Zambi watushihilile kwetu mu Egiptu. Kuze te twakulia yenga yinazala ni yifwo, ni kukuta ngwe chize tunazange. Alioze hinwatuneha muno mu puya, hanga tufwe kwetu ni zala.”

⁴ Mwene Zambi yambila Mose ngwenyi: “Haliabwila mungununokesela mbolo ya kwilu. Tangwa ha tangwa akatuhwoka ni kwanda yakulia yinalite ni tangwa limuwika. Mba mungweseka ngwatale nyi maafunga Shimbi jami.

⁵ Ha tangwa lia muchisambano akanda yakulia ya matangwa aali, mba akayiteleke.”

^6-8 Mose ni Arane yaalweza Aisraele eswe ngwo: “Ha chingoloshi Mwene Zambi manwaha yifwo, mumu hevwa chize nunalinyenge kuli iye. Mba mununyingika ngwenu, Mwene Zambi mwe wanutuhwishile mu chifuchi cha Egiptu. Hamene chichamene, muze makanwaha mbolo yinji, munukamona uhenya wenyi. Alioze yetu tuli aya kashika nunatuketeka? Muze nunachilingi, Mwene Zambi mwe nunaketeka.”

⁹ Mose yambila Arane ngwenyi: “Lweza Chikungulwila cheswe, eze amane ku meso ja Mwene Zambi, mumu hevwa chize analinyenge.”

¹⁰ Shimbu te Arane machihanjika no, Chikungulwila cheswe yaatala ku puya. Susumuku yaamona uhenya wa Mwene Zambi mu lelwa.

¹¹ Mwene Zambi yambila Mose ngwenyi:

¹² “Hinevwa chize atu eswe analinyenge. Alweze ngwe: ‘Ha chingoloshi munulia yifwo, muze mukucha mba munulia mbolo yinji. Mba mununyingika ngwenu, yami Mwene Zambi nguli Zambi yenu.’ ”

¹³ Ha chingoloshi tujila ngwe tumbangu, anji, yaazalisa musumba weswe. Ha chichamene mume yiubwa unji hashi.

¹⁴ Muze mume hiwoma, hashi yihabwa yuma yikepe yikepe ngwe senga, nawa ngwe chiwe, ha kusengunuka chacho.

¹⁵ Muze Aisraele haachimona, kaachinyingikine ko. Yaalihula ngwo: “Ayi yuma yika?” Mose ngwenyi: “Yino ye mbolo yize Mwene Zambi hanwaha.

¹⁶ Mwene Zambi hamba ngwenyi: ‘Mutu mweswe manda yize yinalite ni akwa jiko lienyi,’ kafwa ngwe kilo jaali mutu ni mutu.”

¹⁷ Chenacho alingile Aisraele, amwe yaakunga yinji, akwo yaakunga yikepe.

¹⁸ Muze haayeseka, waze akungile yinji kuyahianyine ko, ni waze akungile yikepe kaahonene ko. Mutu mweswe yakunga yize te mahasa kulia.

¹⁹ Mose yaalweza ngwenyi: “Mutu niumwe kanda atulika yikwo ya kulia hamene.”

²⁰ Alioze akwo kabanjikile ko Mose, yaasweka yimwe. Mba ha chichamene yiibola, yiibwa ni mavuno. Mose yaatenukina.

²¹ Chichamene cheswe mutu mweswe te kakukunga yize mahasa kulia. Alioze muze tangwa hiliasasaminya, yize yasalile hashi yiyalumuka meya meya.

²² Ha tangwa lia muchisambano yaakunga yakulia ya matangwa aali, kulumbunuka ngwo, kilo jiwana mutu ni mutu. Makulwana eswe ja Aisraele yeeza ni kulweza Mose yuma yize.

²³ Mba Mose ngwenyi: “Mwene Zambi hamba chino: ‘Hamene lili tangwa lia kuhwima, tangwa lia chijila lia Mwene Zambi. Musono ochenu yakulia yize nunazange kwocha, ni telekenu yize nunazange kuteleka. Yize muyisala, nuyitulike ya kulia hamene.’ ”

²⁴ Yaatulika yize yasalile ndoo chichamene, ngwe chize ambile Mose. Kuyabolele ko, chibwe kuyatuhukile mavuno.

²⁵ Mose yaamba ngwenyi: “Yakulia yize nuyilia musono, mumu musono lili tangwa lia chijila lia Mwene Zambi, lili tangwa lize chanutamba kuhwima. Musono kunuchi kumona yakulia yikwo.

²⁶ Chanutamba kukunga yakulia ha matangwa asambano, alioze tangwa lia muchishimbiali lili tangwa lia kuhwima, kuyichi kubwa ko nichimwe.”

²⁷ Ha tangwa lia muchishimbiali amwe atu yaaya ni kukunga yakulia, alioze kaamwene ko nichimwe.

²⁸ Mba Mwene Zambi yambila Mose ngwenyi: “Yisuho yingahi munulituna kufunga Shimbi jami ni yiyulo yami?

²⁹ Nyingikenu ngwenu, yami Mwene Zambi hinanwaha tangwa lia kuhwima. Kashika, ha tangwa lia muchisambano nakunwaha yakulia ya matangwa aali. Mutu mweswe akatwame ku zuwo ha tangwa lia muchishimbiali, kanda akahichika zuwo lienyi.”

³⁰ Kashika atu te keeshi kulinga milimo ha tangwa lia muchishimbiali.

³¹ Aisraele yaaluka yakulia yize ngwo, mana. Yabwile ngwe mbuto ya masa, yitoma, kuyema chayo ngwe mbolo ya kuchinga ni wuchi.

³² Mose ngwenyi: “Mwene Zambi hamba chino: ‘Andenu kamwe kachisoka ka yakulia yino, hanga nuyiswekele vungu lienu, hanga no akamone yakulia yize nanulishile mu puya, muze nanutuhwishile mu chifuchi cha Egiptu.’ ”

³³ Mose yalweza Arone ngwenyi: “Sako kilo jaali ja mana mu mulondo ni kujitulika ku meso ja Mwene Zambi, tukalweze vungu lietu kulutwe.”

³⁴ Arane yalinga chize Mwene Zambi alwezele Mose, yasa we mulondo kulutwe lia mushete wa Usendo wa Zambi ni atu, ha kuufunga.

³⁵ Aisraele yaalia yakulia, mana, ha miaka makumi awana, ndoo ni muze ahetele ku chifuchi chize aahele Mwene Zambi, cha Kanana, kuze te maakatwama. (

³⁶ Yikashi yize te akweseka nayo ha matangwa waze yabwile ya kilo makumi aali.)