Kutuhuka 15 - Mukanda Wa Zambi 1970

Mwaso wa Mose

¹ Mba Mose ni Aisraele yeemba mwaso uno ha kuhalisa Mwene Zambi ngwo: “Mungwimbila Mwene Zambi mwaso, mumu hakumba kuhiana. Hambila tuvwalu ni waze akwenda ho mu meya.

² Mwene Zambi kali tachi jami ni mwaso wami, mwe chilamwina chami. Kali Zambi yami, mungumuhalisa. Kali Zambi ya tata yami, mungumulemesa.

³ Mwene Zambi kali kajita, jina lienyi Mwene Zambi.

⁴ “Matemba ni tujita a mwanangana yaambila mu kalunga lwiji. Miata a tujita a mana kuhiana, haashimbama mu kalunga lwiji Muchila.

⁵ Kalunga lwiji haafuka; e tujita haashimbama ngwe liwe muma mwajotoka.

⁶ “Mwene Zambi, kwoko lie lia chindume likwete ndundo kuhiana, hilionona akwa kole.

⁷ Mu uhenya we Wahiana, wakukumba akwa kole je. Ufwatulo we kuwakwocha akwa kole je ngwe yiswaswa.

⁸ Wafuzanga kalunga lwiji, mba meya yaamana vwii, ngwe mulundu, ha mashima yaakala mbee.

⁹ Mukwa kole yamba ngwenyi: ‘Mungwahanga, mungwakwata. Mungububa yikumba yo, mungwanda yeswe yize ngunazange. Mungutomona mukwale wami, kwoko liami mulianongesa.’

¹⁰ Alioze Mwene Zambi, yena waafuzanga. Kalunga lwiji yafuka akwa Egiptu, no yaashimbama mu meya ngwe liwe.

¹¹ “Aa Mwene Zambi, hakachi ka mazambi, iya walifwa ni yena? Iya uli munangi ngwe yena? Iya malinga yilayi ni yikomokeso ngwe yena?

¹² Hiwolola kwoko lie lia chindume, hashi hihamina akwa kole jetu.

¹³ Mukwa kushishika, yiusongwela atu waze hiwakula. Ku ndundo je yiwaneha mu chifuchi che cha chijila.

¹⁴ Akwa yifuchi heevwa, kaanachikima ni woma. Afilistia mwongo anevu.

¹⁵ Miata ja Edome kaanalekumuka. Akwa ndundo ja Moabe kaanangangama. Akwa Kanana eswe haazeya.

¹⁶ Heevwa woma ni mwongo mumu ha ndundo ja kwoko lie, Mwene Zambi. Kaanaholo kuluu ngwe liwe ndoo atu je haahiana, atu waze hiwakula mu undungo.

¹⁷ Muutwala atu je, muwasa ha mulundu we, homa haze yena Mwene Zambi walitongwelele, zuwo lia kukuwayila lize yena mwene walilulikilile.

¹⁸ Yena Mwene Zambi, muwiza kuyula ndoo ku miaka yeswe ni miaka yeswe.”

Mwaso wa Miriame

¹⁹ Tuvwalu twa mwanangana wa Egiptu, ni matemba jenyi, ni e atu waze akwenda ho, eswe yaanjila mu meya. Mba Mwene Zambi yahilwisa meya ngwe hatangu, yaafuka. Alioze Aisraele te haazauka kulu kalunga lwiji hashi homu.

²⁰ Mba mukwa munanyi Miriame, ndumbwa Arone, yanda muyaya, yabutuka kwimba, ni mapwo eswe ja Aisraele yaamukaula nikwimba miyaya ni kuhangana.

²¹ Mwe Miriame te kanende kulutwe lio nikwimba ngwenyi: “Yimbilenu Mwene Zambi mumu hakumba kuhiana, hambila tuvwalu ni waze akwenda ho mu meya.”

Meya asasu

²² Mose yakatwisa Aisraele ku kalunga lwiji Muchila, yaatwala mu puya ya Shure. Yeenda matangwa atatu mu puya, alioze kaamwene ko kama meya.

²³ Mba yaaheta ku Mara, alioze meya jako te asasu kuhiana, kaahashile kwaanwa. Kashika akuvuluka homa haze ngwo, Mara.

²⁴ Atu yaabutuka kuketeka Mose ngwo: “Yika mutunwa?”

²⁵ Mose yaliumba ni chinyengo kuli Mwene Zambi. Neye yamulweza umwe mutondo ngwenyi. “Use mu meya.” Mose yalinga Chenacho, mba meya yayema. Kwenako Mwene Zambi ahanyinyine Shimbi kuli Aisraele, kwenako nawa eesekelele.

²⁶ Yaamba ngwenyi: “Nyi mununguvwila yami Mwene Zambi yenu, ni kulinga chize chinalite ku meso jami, ni kufunga ni kutayiza yiyulo yami yeswe, chichi kunwaha yikola yize nahele akwa Egiptu. Nguli Mwene Zambi yenu, yoze wakunuwuka.”

²⁷ Mba Aisraele yaaheta ku chikulo cha Elime, haze habwile mashima kumi ni aali ni mingaji makumi shimbiali. Yaasa musumba wo kwekuze.