Kutuhuka 14 - Mukanda Wa Zambi 1970

Aisraele yaazauka kalunga lwiji Muchila

¹ Mwene Zambi yambila Mose ngwenyi:

² “Lweza Aisraele aye mu jila yeka, aye ase musumba wo ku sali lia Pi Hahiro, te chili hakachi ka chihunda cha Migdole ni kalunga lwiji Muchila, hehi ni chihunda cha Bal Zefone.

³ Mumu mwanangana manyonga ngwenyi, Aisraele kaanachamangila, hijaakangana, hi kaamwene mwakuya.

⁴ Mungumukalisa mbunge, mba manukaula. Lufuma wami mafumana muze mungumukumba hamwe ni tujita twenyi. Mba akwa Egiptu maanyingika ngwo, nguli Mwene Zambi.” Aisraele yaalinga chize alwezele kuli Mose.

⁵ Muze mwanangana wa Egiptu hevwa ngwo, Aisraele haachina, iye ni akwa kuyula mbunge jo yijalumuka. No yaamba ngwo: “Kuchi mba tunakalinga Chuma chino? Hitwatayiza ndungo jetu Aisraele kuya!”

⁶ Mwanangana yalulieka matemba jenyi ni tujita twenyi.

⁷ Yanda matemba abema 600 ni matemba akwo eswe nawa. Ha temba ni temba yihabwa mwata wa tujita.

⁸ Mwene Zambi yakalisa mbunge ya mwanangana, mba yaakaula Aisraele waze te Zambi akufunga.

⁹ Tujita twa Egiptu ni tuvwalu two eswe ni matemba jo eswe, ni waze te akwenda ho, ayo eswe yaakaula Aisraele. Yaawana haze asele musumba, ku mbumbulu ya kalunga lwiji Muchila, hehi ni Pi Hahiro ni Bal Zefone.

¹⁰ Muze Aisraele haamona mwanangana ni tujita twenyi kaaneza, yeevwa woma unji, yaalila kuli Mwene Zambi ha kwakwasa.

¹¹ Yaambila Mose ngwo: “Ku Egiptu mafuka keshiko, kashika hiwatuneha muno mu puya hanga tufwile mo, nyi? Tala chize walinga ha kututuhwisa mu Egiptu!

¹² Chikwo nawa, kutwakulwezele ngwetu, nyi watutuhwisa, lamba mulikatuwana, nyi? Twakwambile ngwetu: ‘Tweche kwetu, tubwe lume ndungo ja akwa Egiptu.’ Te chibema kulingila kwetu akwa Egiptu, kuhiana kufwila mu puya.”

¹³ Mose yambila atu ngwenyi: “Kanda nwivwa woma. Hwimenu mbunge, munumona chize Mwene Zambi manulamwina musono. Akwa Egiptu wano kunuchi kwamona nawa nilimwe tangwa.

¹⁴ Mwene Zambi mwe manwashila jita, yenu kunuchi kulinga nichimwe.”

¹⁵ Mwene Zambi yambila Mose ngwenyi: “Kuchi mba unangulilila? Lweza Aisraele aye kulutwe.

¹⁶ Alioze yena, anda lukanda we, olola kwoko ha kalunga lwiji, hanga meya alihandunune, mba Aisraele azauke hashi homu.

¹⁷ Mungukalisa mbunge ja akwa Egiptu kuhiana, hanga anukaule, henaho ndundo jami mujimoneka, muze mungukumba mwanangana hamwe ni tujita twenyi, ni matemba jenyi ni waze akwenda ho.

¹⁸ Akwa Egiptu kumaanyingika ngwo, nguli Mwene Zambi, muze mungwakumba.”

¹⁹ Kanganda ka mwilu, yoze te wakwenda kulutwe lia Aisraele, yaauluka, yeza kunyima lio. Mba lelwa lize liabwile kulutwe lio, yiliza kunyima lio.

²⁰ Yilimana hakachi ka chendo cha Egiptu ni cha Aisraele, yilibwa milima kuli akwa Egiptu ni pangu kuli Aisraele. Kashika ufuku weswe kaalikundamine.

²¹ Mose yolola kwoko ha kalunga lwiji, mba Mwene Zambi yatuma fuji ya tachi, yize yakatukile ku chivumbuko, yiihuhwa ha meya ufuku weswe, mba meya yooma. Meya yaahandunuka,

²² mba Aisraele yaazauka hashi homu. Meya yaabwa ngwe chipanga sali ni sali.

²³ Akwa Egiptu yaakaula, yaanjila mu kalunga lwiji ni tuvwalu two eswe, ni matemba jo, ni e atu waze akwenda ho.

²⁴ Ha chichamene cheswe Mwene Zambi, mu lelwa lia kahia lize lialifwa ngwe nguji, yatala kuli tujita twa Egiptu, yaabinjisa.

²⁵ Yakalisa molu ja matemba jo, hanga eche kwenda kanawa. Akwa Egiptu yaamba ngwo: “Tuchinenu Aisraele, mumu Mwene Zambi kanaashila jita.”

²⁶ Mwene Zambi yambila Mose ngwenyi: “Olola kwoko ha kalunga lwiji hanga meya apukuke ngwe hatangu, hanga akwa Egiptu ni matemba jo, ni waze akwenda ho, afwe.”

²⁷ Mba Mose yolola kwoko lienyi ha kalunga lwiji. Ha chichamene meya yapukuka ngwe hatangu. Akwa Egiptu waze ambile kuchina, Mwene Zambi yaanungwina mu meya.

²⁸ Meya yaapukuka, yaafuka matemba, ni waze akwenda ho, ni tujita eswe a mu wanangana wa Egiptu, waze te anakaula Aisraele. Chibwe umuwika kasalile ko, eswe yaafwa.

²⁹ Alioze Aisraele yeenda hashi homu ha kuzauka kalunga lwiji, meya yaabwa ngwe yipanga sali ni sali.

³⁰ Ha tangwa lize Mwene Zambi yalamwina Aisraele ku moko ja akwa Egiptu. Aisraele yaamona akwa Egiptu haanafu ku mbumbulu ya kalunga lwiji.

³¹ Muze Aisraele amwene ndundo ja Mwene Zambi ha kukumba akwa Egiptu, yamuvwila woma, yaamufuliela, ni mwe kavumbi kenyi Mose.