Kutuhuka 13 - Mukanda Wa Zambi 1970

Kukunjika cha ana atangu a malunga kuli Mwene Zambi

¹ Mwene Zambi yambila Mose ngwenyi:

² “Ana ja Aisraele eswe atangu a malunga ni a yimuna, chatamba kwajilika, mumu kaali niami.”

Chiwanyino cha Mbolo Yize Kuyishi Yitumbo

³ Mose yambila Aisraele ngwenyi: “Chanutamba kwiwuluka tangwa lino nunatuhuka mu chifuchi cha Egiptu mu undungo, mumu Mwene Zambi hananutuhwisa ni ndundo jenyi. Kunwahashile kulia mbolo yize yili ni yitumbo ha tangwa lino.

⁴ Musono mu kakweji yono mutangu Abibe nunatuhuka mu Egiptu.

⁵ Mwene Zambi hanalakenya kanawa tushakulu twenu ngwenyi, maakanwaha chifuchi cha Akanana, ni Ahite, ni Aamore, ni Ahive, ni Ajebuse. Che chifuchi cha chinuno. Muze hanuhetesa ko, chanutamba kulinga chiwanyino chino, mwaka ni mwaka, ha kakweji mutangu.

^6-7 Ha matangwa shimbiali nukalia mbolo yize kuyishi yitumbo, mba ha tangwa lia muchishimbiali nukalinga chiwanyino cha kulemesa Mwene Zambi. Chibwe yitumbo, chibwe mbolo yize yili ni yitumbo, kuyahashile kubwa mu chifuchi chenu cheswe ha matangwa waze.

⁸ Ha lie tangwa alio nukalumbunwina ana jenu a malunga ngwenu: ‘Chiwanyino chino chinatulubunwina chize atulingilile Mwene Zambi muze atutuhwishile mu Egiptu.’

⁹ Chiwanyino chino muchikabwa ngwe chibenya ha moko ni ha mahuma jenu, ha kwiwuluka chize Mwene Zambi atutuhwishile ni ndundo jenyi mu chifuchi cha Egiptu.

¹⁰ Chiwanyino chino nukachilinga mwaka ha mwaka ha kakweji wacho.

Ana atangu a malunga

¹¹ “Mwene Zambi makanuhetesa mu chifuchi cha Kanana, chifuchi chize alakenyene ni Shingo kuli tushakulu twenu. Muze makanwaha cho,

¹² mwana lunga mweswe mutangu chanutamba kumukunjika kuli Mwene Zambi, chibwe ana ja atu, chibwe a yimuna, eswe kaali a mbala a Mwene Zambi.

¹³ Alioze mwana mutangu wa chimbulu wa kuji nukamukula ni mwana panga. Nyi kunwazangile kumukula, chatamba kumumakuna kota. Mwana mutangu wa lunga mweswe wa kuli ana jenu, chatamba kumukula.

¹⁴ Kulutwe, muze mwana makakuhula ngwenyi: ‘Chino kuchi chinalumbunuka?’ Ukamukumbulula ngwe: ‘Mwene Zambi watutuhwishile ni ndundo jenyi mu chifuchi cha Egiptu, kuze twabwile mu undungo.

¹⁵ Muze mwanangana wa Egiptu akashile mbunge, katutayijile ko yetu ha kuya, mba Mwene Zambi yashiha mwana lunga mweswe mutangu mu Egiptu, chibwe ana ja atu, chibwe a yimuna. Kashika twakulambula mwana wa chimuna wa kuji mweswe mutangu, alioze mwana mutangu wa lunga, twakumukula ni chimuna.

¹⁶ Chiwanyino chino muchikabwa ngwe chibenya ha moko ni ha mahuma jenu, ha kwiwuluka chize Mwene Zambi atutuhwishile ni ndundo jenyi mu chifuchi cha Egiptu!’”

Lelwa ni kahia

¹⁷ Muze mwanangana wa Egiptu hahana jila kuli Aisraele ha kuya, Zambi kaatwalile ko mu jila ya kuya ku Filistia, chibwe te yili yihi. Mumu yanyonga ngwenyi: “Chazangile atu jami, muze maamona jita mu jila, manyonga jo alumuke ahiluke ku Egiptu.”

¹⁸ Alioze Zambi yaasongwela jila ya puya ya kuya ku kalunga lwiji Muchila. Aisraele yaatuhuka mu Egiptu ni yitwa ya jita.

¹⁹ Mose yanda yifwaha ya Josefe, yayimbata, ngwe chize Josefe aashingishile. Mumu Josefe yashika ngwenyi: “Muze Zambi makanulamwina, nukambata yifwaha yami, nukaya nayo.”

²⁰ No yaakatuka ku limbo lia Sukote, yaajika musumba wo ku Etame, hakamwihi ni puya.

²¹ Ha mwalwa, Mwene Zambi te kakwatetekela mu lelwa lize lialifwa ngwe nguji, ha kwasongwela jila. Ha ufuku te kakwatetekela mu kahia kaze kalifwa ngwe nguji, ha kwatemwina, hanga ahase kwenda mwalwa ni ufuku.

²² Lelwa ha mwalwa ni kahia ha ufuku kuyakatukile ko ku meso jo.