Kutuhuka 12 - Mukanda Wa Zambi 1970

Chiwanyino cha Kubalika

¹ Mwene Zambi yambila Mose ni Arane mu chifuchi cha Egiptu ngwenyi:

² “Kakweji yono kuli yenu akabwe mutangu wa ku tukweji eswe a ha mwaka.

³ Nulweza Chikungulwila cheswe cha Aisraele ngwenu: ‘Ha tangwa lia muchikumi lia kakweji yono, mutu mweswe akasakula mwana panga hanji mwana pembe mumu hali akwa zuwo lienyi, zuwo ni zuwo chimuna chimuwika.

⁴ Nyi akwa jiko limwe kaali akepe ha kulia chimuna chamuundu, akatambike mwenyembo wenyi yoze asulangana nenyi, nikulita ni unji wa atu, ni chize mutu ni mutu malia.

⁵ Chimuna chize maakalia kuchatambile kubwa ni kapalia. Chatamba kubwa kuji yoze habwa ni mwaka umuwika. Munuhasa kutongola panga hanji pembe.

⁶ Nukafunga chimuna chize ndoo ha tangwa kumi ni lia muchiwana, muze Chikungulwila cheswe cha Aisraele maakashiha yimuna yo.

⁷ Mba akanda manyinga a yimuna yo, nikwakwita ku yipamba ya ku yikolo ya mazuwo, muze analila yifwo yize.

⁸ Ha ufuku uze ye yifwo akalia ya kwocha ni mbolo yize kuyishi yitumbo, akayilia ni amwe mafwo asasu.

⁹ Kanda nukalia yifwo ya wisu hanji ya kuteleka, alioze che chimuna nukalia cha kwocha, mutwe, ni molu, ni yuma ya mu jimo.

¹⁰ Kanda nukayihichika ndoo chichamene. Yize muyikasala ho nukayocha, yikaweme.

¹¹ Nukayilia ngwe chino: muya wakujichika, sapato ku molu, lukanda ku moko, chatamba kumulia nikawashi. Chino chili chiwanyino cha Kubalika ha kulemesa yami Mwene Zambi.’

¹² “Ha ufuku uze mungubalika mu chifuchi cha Egiptu, mungushiha mwana lunga mweswe mutangu, wa atu ni tushitu. Mungubatwila mazambi eswe a Egiptu, yami nguli Mwene Zambi.

¹³ Manyinga waze munukwita ku yipamba ya ku yikolo ya mazuwo jenu, maabwa chilayi cha kulweza kuze nwatwama. Muze mungumona e manyinga mungunubalika, chichi kunulinga nichimwe muze mungumwesa akwa Egiptu lamba.

¹⁴ Lie tangwa alio mulikabwa chiwulukilo cha yize yami Mwene Zambi hinalinga. Chatamba kulifunga ndoo ku miaka yeswe.

Chiwanyino cha Mbolo Yize Kuyishi Yitumbo

¹⁵ “Ha matangwa shimbiali nukalia mbolo yize kuyishi yitumbo. Ha tangwa litangu nukachiza yitumbo yeswe mu mazuwo jenu. Mumu, nyi umwe walia mbolo yize yili ni yitumbo ha matangwa waze shimbiali, kuchatambile kumwalula nawa mukachi ka atu jami.

¹⁶ Ha tangwa litangu ni ha tangwa lia muchishimbiali chanutamba kukunguluka hamuwika ha kunguwayila. Ha matangwa waze mutu niumwe kanda alinga milimo, shina kuteleka yakulia wika.

¹⁷ Nukafunga chiwanyino cha Mbolo Yize Kuyishi Yitumbo, mumu ha tangwa lize nachijile mavungu jenu mu chifuchi cha Egiptu. Yenu ni ajikulu jenu, nukafunga chiwanyino chino ndoo ku miaka yeswe.

¹⁸ Chiwanyino chino nukachilinga ha kakweji mweswe mutangu, chize ku tangwa lia kumi ni lia muchiwana chingoloshi ndoo ni ku tangwa lia makumi aali ni kashi chingoloshi. Kanda nukalia ho mbolo yize yili ni yitumbo.

^19-20 Ha matangwa waze shimbiali kanda nukabwa ni yitumbo ya mbolo mu mazuwo jenu. Nyi mutu malia mbolo yize yili ni yitumbo, kuchatambile kumwalula nawa mukachi ka atu jami, chibwe chilambala, chibwe mwenyaho.”

Chiwanyino chitangu cha Kubalika

²¹ Mba Mose yatambika miata eswe ja Aisraele, yaalweza ngwenyi: “Sakulenu ana a yimuna yenu nikulita ni majiko jenu. Nukashihe tushitu a mulambu wa chiwanyino cha Kubalika.

²² Nukanda chisapo cha chibuta hisope, munuchubika mu manyinga waze ali mu chenga, mba munwakwita kwita ku yipamba ya ku yikolo. Niumwe kanda akatuhuka mu zuwo ndoo chichamene.

²³ Muze Mwene Zambi mabalika ha kushiha akwa Egiptu, mamona manyinga a ku yipamba ya ku yikolo. Ha chino kechi kutayiza mwe kanganda wa kwonona kunjila mu mazuwo jenu ha kunushiha.

²⁴ Yenu ni vungu lienu chanutamba kufunga Shimbi jino ndoo ku miaka yeswe.

²⁵ Muze munukanjila mu chifuchi chize anulakenyene Mwene Zambi, nukafunga chiwanyino chino.

²⁶ Mba muze ana jenu maakanuhula ngwo: ‘Chiwanyino chino kuchi chinalumbunuka?’

²⁷ Nukaakumbulula ngwenu: ‘Uno uli mulambu wa chiwanyino cha Kubalika ha kulemesa Mwene Zambi, mumu yabalika mazuwo jetu, yatulamwina muze ashihile akwa Egiptu.’ ” Aisraele yaafulamana hashi, yaawayila Mwene Zambi.

²⁸ Mba yaaya, yaalinga ngwe chize Mwene Zambi ambilile Mose ni Arone.

Zambi yashiha ana atangu

²⁹ Ha tangwa lizeliene ha muchima ufuku Mwene Zambi yashiha ana atangu a malunga eswe mu chifuchi cha Egiptu, chize kuli mwana wa mwanangana, yoze te mahinga tato mu wanangana, ndoo kuli mwana wa funge, yoze te uli mu zuwo lia lamba. Yashiha nawa ana atangu a yimuna yeswe a kuji.

³⁰ Ha ufuku uze, mwanangana ni akwa kuyula ni akwa Egiptu eswe yaatungumuka ha tulo. Mu chifuchi cheswe yimubwa mbimbi, mumu zuwo ni zuwo yimufwa mutu.

³¹ Mwe mwanangana yatambika Mose ni Arone, yaamba ngwenyi: “Katukenu, tuhukenu mukachi ka atu jami, hamwe ni Aisraele eswe. Yeenu nukawayile Mwene Zambi ngwe chize nwambile.

³² Nwanda mapanga, ni pembe, ni ngombe jenu, yeenu kwenu. Ni yami ngulembelenu nawa hanga Zambi anguwahise.”

³³ Akwa Egiptu yaashinjika Aisraele kapupwishi, yaamba ngwo: “Nyi kunwayile, yetu eswe kumutufwa.”

³⁴ Chenacho Aisraele anjile mbolo yize te kuyishi yitumbo, yaayisa mu yenga, yaayifuka ni mahina, mba yaalitwika yo ha yipaya ni kuya.

³⁵ Aisraele yaalinga ngwe chize alwezele kuli Mose, yeeta yuma ya uhenya ya oru ni prata, ni mahina, kuli akwa Egiptu.

³⁶ Mwene Zambi yasolwela Aisraele vumbi ku meso ja akwa Egiptu. Kashika akwa Egiptu yaaha yuma yize echile. Chenacho Aisraele ayile ni ubite wa akwa Egiptu.

Aisraele yaatuhuka mu Egiptu

³⁷ Aisraele yaakatuka ku limbo lia Ramasese, yaabwila mu jila ya kuya ku limbo lia Sukote Kwoka cho 600,000 a malunga, kuweza ho mapwo ni ana.

³⁸ Atu akwo anji ayile no, ni mapanga, ni pembe, ni ngombe anji nawa.

³⁹ Ku wunga uze akatukile nawo ku Egiptu, yoocha mbolo yize kuyishi yitumbo, mumu te keeshi shimbu ha kululika yakulia chibwe kwocha mbolo yize yili ni yitumbo, mumu aahumine nikawashi mu chifuchi cha Egiptu.

⁴⁰ Aisraele yaatwama mu Egiptu miaka 430.

⁴¹ Ha tangwa lia kusula lia miaka yize 430, mavungu eswe ja atu ja Mwene Zambi yaatuhuka mu Egiptu.

⁴² Lie tangwa alio ha ufuku, Mwene Zambi yaafunga, yaatuhwisa mu chifuchi cha Egiptu. Kashika mwaka ni mwaka Aisraele ni waze eswe te maasemwoka kulutwe, no nawa chaatamba kunongama ni kunyonga hali Mwene Zambi ha ufuku uze. Chaatamba kulemesa tangwa lize, mumu lili lia Mwene Zambi ndoo ku miaka yeswe.

Shimbi ja chiwanyino cha Kubalika

⁴³ Mwene Zambi yambila Mose ni Arone ngwenyi: “Jino je Shimbi ja chiwanyino cha Kubalika: chilambala niumwe kanda akachilia,

⁴⁴ alioze ndungo yoze nwalanjile mahasa kulia, nyi hinwamupwisa ngalami.

⁴⁵ Ngeji ni ngamba, no kanda akachilia.

⁴⁶ Yakulia nukayilila mu zuwo muze nwayilulikila, kuyituhwisa haze ka. Kanda nukabolota chifwaha nichimwe.

⁴⁷ Chikungulwila cheswe cha Aisraele chaatamba kulinga chiwanyino cha Kubalika.

⁴⁸ Chilambala yoze watwama mu zuwo lie, nyi kanazange kulinga chiwanyino cha yami Mwene Zambi, iye ni atu jenyi eswe a malunga, chaatamba kwapwisa ngalami hatangu. Mba munumutayiza kulinga chiwanyino, munuhasa kumutambula ngwe Kaisraele. Alioze chilima kahashile kulia chiwanyino cha Kubalika.

⁴⁹ Aisraele ni yilambala waze nwatwama no, chaatamba kufunga Shimbi yizeyene yimuwika.”

⁵⁰ Aisraele eswe yaalinga ngwe chize Mwene Zambi ambilile Mose ni Arone.

⁵¹ Ha tangwa lizeliene Mwene Zambi yatuhwisa Aisraele mu Egiptu nikulita ni mavungu jo.