Kutuhuka 11 - Mukanda Wa Zambi 1970

Mose yanyingikisa kufwa cha ana atangu

¹ Mwene Zambi yambila Mose ngwenyi: “Kwasala lume lamba limuwika lize mungumwesa mwanangana ni akwa Egiptu, mba manwaha jila nukaye. Kumanuhanga cha kunuhanga.

² Haliabwila yako wambile Aisraele, malunga ni mapwo, ngwe: ‘Etenu enyembo jenu akwa Egiptu anwehe yingeliengelie ya prata ni oru.’ ”

³ Mwene Zambi yasolwela Aisraele vumbi ku meso ja akwa Egiptu. Ni mwene, akwa kuyula ni akwa Egiptu akwo eswe te kaakumona ngwo, Mose kali mutu munene.

⁴ Mose yalweza mwanangana ngwenyi: “Mwene Zambi hamba ngwenyi: ‘Hakachi ka ufuku mungubalika mu chifuchi cha Egiptu,

⁵ mba mwana mutangu wa lunga mweswe mu Egiptu kumafwa, chize kuli mwana wa mwanangana, yoze te mahinga tato mu wanangana, ndoo kuli mwana wa ndungo ya pwo, yoze wakuzungula mbuto. Ana atangu a yimuna yeswe kumaafwa nawa.

⁶ Mbimbi yinene muyibwa mu chifuchi cheswe cha Egiptu, mbimbi ngwe yize kanda ayivwa kama nilimwe tangwa, chibwe keechi kayivwa nawa.

⁷ Alioze mukachi ka Aisraele chibwe kawa kechi kabwozela mutu hanji kashitu, hanga nunyingike ngwenu, kuma Mwene Zambi hahandununa akwa Egiptu ni Aisraele.’ ”

⁸ Mose yaweza ho nawa maliji ngwenyi: “Akwa kuyula eswe meeza ni kufukama ku meso jami ni kwamba ngwo: ‘Katukenu, yeenu ni atu jenu eswe.’ Mba munguya.” Mose yatenuka, yakatuka ku meso ja mwanangana, yaya kwenyi.

⁹ Mwene Zambi yambila Mose ngwenyi: “Mwanangana kechi kukwivwa, mumu Changutamba kulinga yipupu yikwo mu chifuchi cha Egiptu.”

¹⁰ Mose ni Arone yaalinga yipupu yize yeswe ku meso ja mwanangana wa Egiptu, hindu Mwene Zambi yamukalisa mbunge. Kashika kaahele ko jila ha kutuhuka mu chifuchi chenyi.