Kutuhuka 10 - Mukanda Wa Zambi 1970

Makumbi

¹ Mwene Zambi yambila Mose ngwenyi: “Yako maha mwanangana. Yami ngunakamukalisa mbunge, iye ni e akwa kuyula hanga achimone yilayi yami,

² nukalumbunwine ana jenu ni ajikulu jenu chize hinahepwisa akwa Egiptu muze hinalinga yilayi mu chifuchi cho. Yenu eswe mununyingika ngwenu, nguli Mwene Zambi.”

³ Mba Mose ni Arane yaaya maha mwanangana, yaamulweza ngwo: “Mwene Zambi, Zambi ya Ahebreu, kanambe ngwenyi: ‘Tangwa lika mukalikehesa ku meso jami? Echa atu jami aye akanguwayile.

⁴ Nyi walituna kwaha jila, hamene mungukatuma makumbi mu chifuchi che.

⁵ Kumaafuka hashi heswe, kuhechi kumoneka nawa. Makumbi maakalia yuma yeswe yize kuyafwile ni chiwe, maakalia mitondo yeswe.

⁶ Maakazala mu mazuwo je ni ja akwa kuyula ni ja atu je eswe. Yuma ngwe yino akakenu ni tushakulu twenu kanda achiyimona kama nilimwe tangwa.’ ” Mba Mose yahichika mwanangana, yaya kwenyi.

⁷ Akwa kuyula yaahula mwanangana ngwo: “Tangwa lika yono mutu makecha kutumwesa lamba? Echenu, hanga akawayile Mwene Zambi, Zambi yo. Kanda nuchinyingika ngwenu chifuchi cha Egiptu kuchafwa, nyi?”

⁸ Mwanangana yatambika nawa Mose ni Arone, yaamba ngwenyi: “Yeenu ni kuwayila Mwene Zambi, Zambi yenu, alioze aya waze maaya?”

⁹ Mose ngwenyi: “Yetu eswe kumutuya, ni twanuke ni tushinakaji. Kumutuya ni ana jetu a malunga ni a mapwo, ni yimuna yetu yeswe, mumu chatutamba kulingila Mwene Zambi chiwanyino ha kumulemesa.”

¹⁰ Mwanangana ngwenyi: “Ni mwe Mwene Zambi, chichi kutayiza nichimwe kuya ni mapwo ni ana jenu! Chinasoloka zwalala ngwe nunazange kulimika ni yami.

¹¹ Hi chocho ko. Nyi nunazange kuya ni kulingila Mwene Zambi yenu, shina yenu malunga munuhasa kuya.” Mba yaahanga Mose ni Arone ku meso ja mwanangana.

¹² Mwene Zambi yambila Mose ngwenyi: “Olola kwoko lie ha chifuchi cha Egiptu hanga makumbi akanduke, hanga akalie yuma yeswe yize yinasoko, yize kuyafwile ni chiwe.”

¹³ Mose yanda lukanda wenyi, yolola kwoko ha chifuchi, mba Mwene Zambi yatuma fuji, yiikatuka ku chivumbuko, yiihehuka mu chifuchi cha Egiptu tangwa lia muundu, ufuku ni mwalwa. Muze hikwacha, kuma fuji hiyaneha mazaji a makumbi.

¹⁴ Mazaji a makumbi yaafuka chifuchi cheswe. Mazaji abwa haha kanda aamona kama nilimwe tangwa, ni keechi kaamona nawa.

¹⁵ Makumbi yaafuka hashi heswe, chifuchi cheswe yichilaa bwii. Yaalia yibuta yeswe ya mitondo yize yaasalile ho ku chiwe. Chuma cha wisu nichimwe kuchasalile ko mu Egiptu.

¹⁶ Mba mwanangana yatambika Mose ni Arane nikawashi, yaamba ngwenyi: “Chibi nalinga ku meso ja Mwene Zambi, Zambi yenu, ni ku meso jenu.

¹⁷ Nalemba, ngukonekenenu kama chisuho chino wika. Liumbenu kuli Mwene Zambi, Zambi yenu, hanga achize kama lamba lino lia kufwa.”

¹⁸ Mose yahichika mwanangana, yaya ni kulemba Mwene Zambi.

¹⁹ Mba Mwene Zambi yaholesa fuji ya ku chivumbuko, yaneha fuji ya tachi ya ku chitokelo. Ye fuji yiihehula makumbi eswe, yiyaambila mu kalunga lwiji Muchila. Mu chifuchi cha Egiptu kumwasalile ko kumbi niumwe.

²⁰ Alioze Mwene Zambi yakalisa mbunge ya mwanangana, mba kechele ko Aisraele kuya.

Milima

²¹ Mwene Zambi yambila Mose ngwenyi: “Olola kwoko lie kwilu, hanga milima yinji yibwe mu chifuchi cha Egiptu.”

²² Mose yolola kwoko kwilu, mba milima yiibwa bwii matangwa atatu mu chifuchi cheswe cha Egiptu.

²³ Atu kaahashile ko kulimona ni akwo. Kashika kaahashile ko kutuhuka mu mazuwo jo ha matangwa atatu. Alioze Aisraele yaabwa ni pangu mu mazuwo jo.

²⁴ Mwanangana yatambika Mose, yamwamba ngwenyi: “Yeenu nukawayile Mwene Zambi, chibwe mapwo jenu ni ana jenu yeenu no. Alioze mapanga, ni pembe, ni ngombe chaatamba kusala kuno.”

²⁵ Mose ngwenyi: “Nyi Chenacho, kota yenu munutwaha yimuna ya kulambula ni kwochela Mwene Zambi, Zambi yetu.

²⁶ Hi chocho ko, yimuna yetu chatutamba kuya nayo, chibwe chimuwika kuchichi kusala. Mumu ku ye yimuna kwe mututongola yize mutulambula kuli Mwene Zambi, Zambi yetu. Shimbu kanda tuchiheta ko, kutwanyingikine yimuna yize mutukalambula Mwene Zambi mulambu.”

²⁷ Alioze Mwene Zambi yakalisa mbunge ya mwanangana wa Egiptu, neye kaahele ko jila ha kuya.

²⁸ Mwanangana yambila Mose ngwenyi: “Katuka kuli yami! Kanyama, kanda ukeza nawa ku meso jami! Nyi ka, mungukakushiha.”

²⁹ Mose ngwenyi: “Chibema nwamba, kunuchi kungumona nawa.”