Kutuhuka 1 - Mukanda Wa Zambi 1970

Mwanangana wa Egiptu yamwesa Aisraele lamba

¹ Wano e ana ja Yakoba a malunga waze ayile nenyi mu chifuchi cha Egiptu:

² Rubene, ni Simeone, ni Levi, ni Yuda,

³ ni Isakare, ni Zabulone, ni Benjamine,

⁴ ni Dane, ni Naftali, ni Gade, ni Ashere.

⁵ Kwoka cha atu eswe a ku zuwo lia Yakoba te makumi shimbiali. Ha matangwa waze Josefe te habwa kulu mu Egiptu.

⁶ Muze te miaka hiyabalika, Josefe ni ayayo ni waze asemukine ha matangwa jenyi, eswe yaafwa kwo.

⁷ Alioze Aisraele yasema ana anji, yooka kuhiana, te akwa ndundo nawa. Chifuchi cheswe yichizala ni ayo.

⁸ Mba mu Egiptu yimuhinga mwanangana mwaha, yoze te kanyingikine Josefe.

⁹ Yambila atu jenyi ngwenyi: “Talenu, atu wano Aisraele hooka kuhiana, maatuhiana tachi. Ha chino mu utoji

¹⁰ Tangwa likwo, nyi kwabwa jita, maalichinga ni akwa kole jetu nikwasa jita ni yetu, mba maachina kwo. Kashika tubwenu ni mana hanga kanda aliokesa nawa.”

¹¹ Mba akwa Egiptu yaasela akwa lutwe ha kwabinjisa ni milimo yikalu. Chenacho Aisraele atungilile mwanangana membo Pitome ni Ramesese, ha kuswekela mo yakulia.

¹² Alioze chibwe aamwesene lamba ngwe lize, hindu Aisraele yooka kuhiana, yaalitanda mu chifuchi cheswe. Kashika akwa Egiptu yeevwila woma.

^13-14 Yaalingisa milimo yikalu ya undungo. Yaashinjika kuhiana kulinga tujolo (briki) a ndambo ni milimo yeka ni yeka ya minda. Keevwilile ko keke.

¹⁵ Mba mwanangana wa Egiptu yambila yifunguji Shifra ni Puwa, waze te akufungula mapwo ja Ahebreu, ngwenyi:

¹⁶ “Muze munufungula mapwo ja Ahebreu, nyi mwana kali wa lunga, mushihenu, alioze nyi kali wa pwo, atwame ni mwono.”

¹⁷ Alioze e yifunguji kachilingile mumu evwilile Zambi woma, yaafunga ana a malunga ni mwono.

¹⁸ Mba mwanangana yatambika e yifunguji, yaahula ngwenyi; “Kuchi mba nwakulinga chichize? Kuchi nwakufungula ana a malunga ni mwono?”

¹⁹ Ayo ngwo: “Mapwo ja Ahebreu keeshi ngwe mapwo ja akwa Egiptu, kaakwete tachi, kaakulianga kusema shimbu yetu kanda tuchiheta.”

^20-21 Zambi yawahisa yifunguji, yaaha ana mumu amuvwilile woma. Ni Aisraele yooka kuhiana, yaatakama.

²² Mba mwanangana yaha atu jenyi eswe Shimbi, ngwenyi: “Mweswe mwana wa lunga yoze wasemuka kuli mapwo ja Ahebreu numumbila mu lwiji Nile, alioze a mapwo nweecha ni mwono.”