Kolosu 4 - Mukanda Wa Zambi 1970

¹ Yenu miata, lingilenu ndungo jenu kanawa ni chize chinalite. Iwulukenu ngwenu, ni yenu nawa nuli ni Mwene mwilu.

Kushinjila

² Lembenu ni kunyongonona, ni kulayilila mu yilemba, ni kusakwilila Zambi.

³ Tulembelenu nawa yetu, hanga Zambi atwehe jila ha kulongesa maliji jenyi ni kwambujola chijimbikilo cha Kristu. Mumu ha chijimbikilo chino nguli mu zuwo lia lamba.

⁴ Kashika lembenu hanga nguhanjike mwazu ngwe chinalite.

⁵ Kanyamenu ku meso ja waze hi akwa Kristu ko nikulinga yitanga yibema matangwa eswe.

⁶ Hanjikenu ni vumbi ni maliji abema matangwa eswe. Nyingikenu kulumbununa kanawa kuli mutu mweswe.

Kushika

⁷ Mukwetu mu ufulielo, Tichiku, chikwashi wa kushishika, kavumbi ni mukwetu mu milimo ya Mwene Yesu, makanwambulwila sango jami jeswe.

⁸ Kashika ngunanutumina ye ha kunwambulwila chize tunabu, ni kutakamisa mbunge jenu.

⁹ Kaneza hamwe ni Onesimu, mukwetu mu ufulielo, mukwa kushishika. Kali wa ku mbunga jenu. No maanunyingikisa yuma yeswe yize yinabalika kuno.

¹⁰ Aristarku, yoze uli mu zuwo lia lamba hamwe ni yami, kananumeneka. Marku nawa, musonyi wa Barnaba kananumeneka. (Nwevwile kulu kushinjila chami hakutwala kuli Marku ngwami, nyi ngwe wanuheta, numutambula kanawa.)

¹¹ Yesu yoze anavuluka ngwo, Justu, kananumeneka nawa. Shina wano atatu wika, mukachi ka Ayuda waze anafuliela, kanalingi milimo hamwe ni yami ya Wanangana wa Zambi. Haanangukwase kuhiana.

¹² Epafra, neye nawa kali wa ku mbunga yenu, kananumeneka. Kavumbi yono wa Yesu Kristu kakulitachika matangwa eswe mu kunulembela. Kanalembe hanga nujikize, hanga nubwe angunu, nukunuke ha kwononokena upale wa Zambi.

¹³ Ngunahase kushindakenya chino hali iye. Kakuhondangana chinji mumu hali yenu, ni mumu hali atu waze ali mu membo ja Laodisea ni Hierapoli.

¹⁴ Mukwetu mbuki Luka, ni Dema kaananumeneka.

¹⁵ Menekenu akwetu waze ali mu Laodisea, ni mama Mimfa, ni Chikungulwila chize chinakunguluka mu zuwo lienyi.

¹⁶ Muze hinwatanga mukanda uno, uhanenu nawa akautangile akwa Chikungulwila cha mu Laodisea. Ni yenwene, nukatange nawa mukanda uze maakanutumina kuli akwa Laodisea.

¹⁷ Ambilenu Arkipu ngwenu: “Manununa kanawa milimo ya Mwene Yesu yize akukunjikile.”

¹⁸ Ni kwoko lia yami mwene ngunasoneka maliji wano ngwami: “Mwoyo wenu.” Kanda nuvulama ngwenu, nguli mu zuwo lia lamba. Zambi anulweze utu wenyi.