Kolosu 3 - Mukanda Wa Zambi 1970

¹ Hananuhindwisa hamwe ni Kristu ku kufwa. Kashika fupenu yuma yize yili mwilu, kuze Kristu anatwama ku chindume cha Zambi.

² Nyongenu yuma yize yili mwilu, hi yize yili hano hashi ko.

³ Mumu hinunafu, ni mwono wenu kuwaswama hamwe ni Kristu muli Zambi.

⁴ Kristu kali mwono wenu wamwenemwene. Muze makasoloka, ni yenu nawa munukasoloka hamwe nenyi, munukabwa ni kamwe ka uhenya wenyi.

Mutu mukulu ni mutu mwaha

⁵ Kashika shihenu yize yeswe ya hano hashi: utanji, ni luchisa, ni kusasaminya chibi, ni usolo ubi, ni lwahu wa mbongo, mumu lwahu wa mbongo kali ngwe kukombelela mahamba.

⁶ Mumu ha yuma ngwe yino, Zambi, ni utenu wenyi, makamwesa lamba waze keeshi kumwononokena.

⁷ Ni yenu nawa, hatangu che nwabwile, muze yuma yino te yakuyula manyonga jenu.

⁸ Alioze haliabwila ehukenu yuma yino yeswe: utenu, ni ufwatulo, ni uhuka, ni kushililika, ni kuhanjika maliji a sonyi.

⁹ Kanda nuhanjika mahuza ni akwenu, mumu hinunehuka mutu mukulu hamwe ni ndako jenyi.

¹⁰ Hinunazala mutu mwaha. Mutu yono, Zambi mwe Tangi, kakumupwisa mwaha nikulifwa chenyi, hanga numunyingike kanawa.

¹¹ Ha chino, kunushi nawa yilambala ni Ayuda, chibwe ngalami ni yilima, chibwe waze kaalilongesele hanji waze keeshi mana, chibwe ndungo hanji enyaho, alioze hasala lume Kristu; mwe unakwata eswe.

¹² Nuli akwa Kristu; Zambi hananuzange, hananutongola. Kashika zalenu keke ngwe mahina, ni utu, ni kulikehesa, ni kushimbika, ni uhomboloji.

¹³ Lihumikizenu ni akwenu, likonekenenu nyi umwe kali ni chitela ni mukwo. Chanutamba kulikonekena ngwe chize anukonekenene Mwene.

¹⁴ Ku yuma yino yeswe wezenu ko zango, lize mulinupwisa ngwe mutu umuwika lume.

¹⁵ Uhwimino uze akuhana Kristu uyule mbunge jenu, mumu Zambi wanutambikile ku uhwimino uno, hanga nubwe mujimba umuwika. Sakwilenu Zambi.

¹⁶ Liji lia Kristu, ni kulumbama chalio, litwame muli yenu. Lishinjilenu ni kulikanyamisa ni akwenu ni mana eswe. Imbenu ni mbunge jeswe uhaliso kuli Zambi ni Miaso (Masamu), ni miaso yikwo ya Zambi, ni mimbo ya kulinanga.

¹⁷ Yuma yeswe yize nwakulinga ni yize nwakuhanjika, yilingenu mu jina lia Mwene Yesu nikusakwilila Zambi Tata mumu hali iye.

Kuliendela cha atu mu mwono Waha

¹⁸ Yenu mapwo, Zeyelenu kuli malunga jenu, mumu Chenacho chanutamba kulinga ngwe akwa Kristu.

¹⁹ Yenu malunga, zangenu mapwo jenu, kanda nubwa asasu kulimika no.

²⁰ Yenu ana, ononokenenu yisemi jenu mu yuma yeswe, mumu chize chinabemena kuli Mwene.

²¹ Yenu atata, kanda nwihia ana jenu. Nyi ka, maahonga.

²² Yenu ndungo, ononokenenu miata jenu a hano hashi mu yuma yeswe. Kanda nuchilinga ku meso wika muze akunutala, ha kubemena kuli ayo. Alioze Ononokenu ni mbunge yakutuwika, mumu ha vumbi lize nuli nalio kuli Mwene Yesu.

²³ Yuma yeswe yize nwakulinga, yilingenu ni mbunge jenu jeswe, kafwa ngwe nwakulingila Mwene Yesu, hi atu ko.

²⁴ Nyingikenu ngwenu, Mwene Yesu makanukundulula. Munukahinga chihinga chize anafungila atu jenyi, mumu Mwene wamwenemwene yoze nwakulingila kali mwe Kristu.

²⁵ Alioze yoze wakulinga yibi, makatambula nikulita ni yize alingile, mumu Zambi keeshi katonde.