Kolosu 2 - Mukanda Wa Zambi 1970

¹ Ngunazange nunyingike chize nakuhondangana ni chinyengo hali yenu, ni hali waze atwama mu limbo lia Laodisea, ni eswe waze kaangunyingikine ku meso.

² Nakuchilinga hanga mbunge jo jikabwe ni hamu, ni hanga alinunge mu zango, ni hanga anyingike pundu chijimbikilo cha Zambi. Che chijimbikilo, Kristu.

³ Muli iye kumwahengama ubite weswe wa mana ni yinyingi wa Zambi.

⁴ Ngunambe chino hanga mutu niumwe kechi kunwonga ni maliji amokomoko, chibwe kaali ngwe maliji abema.

⁵ Mumu, chibwe nguli kusuku ni yenu mu mujimba, hindu mu manyonga nguli hakamwihi. Ngunawahilila ni kumona chize nwakumana nguu ha kufuliela Kristu.

Mwono wa kulumbama mu kulinunga ni Kristu

⁶ Ngwe chize nwatayijile Yesu Kristu Mwene wenu, liendelenu nenyi.

⁷ Tandenu miji muli iye, nukolese mwono wenu weswe muli iye, jikizenu matangwa eswe mu ufulielo, ngwe chize anulongesele. Sakwililenu Zambi kuhiana.

⁸ Kanyamenu, mutu niumwe kanda anupwisa funge ni kwonga chamokomoko ni mana ja uutu. Mana wano kaali longeso lia atu ni a mwiku ubi wa hano hashi, hi a Kristu ko.

⁹ Mumu chize cheswe Zambi abwa Chinasoloka muli Kristu, kafwa ngwe mu uutu wenyi.

¹⁰ Hinunatambula mwono wa kulumbama mu kulinunga nenyi. Kakuyula yiyulo yeswe ni ndundo jeswe.

¹¹ Mu kulinunga nenyi, hananupwisa ngalami, hi Ungalami wa kuli atu ko, alioze wa kuli Kristu. Ungalami uno uli utuswilo ku chiyulo cha mujimba uno wa shili.

¹² Mumu, muze anupapachishile, yanufunda hamwe ni Kristu, yanuhindwisa nawa hamwe nenyi. Chino chabwile mumu nwafulielele ndundo ja Zambi yoze wamuhindwishile.

¹³ Hatangu yenu nwabwile ngwe afu mumu ha milonga yenu, ni mumu nwabwile yilambala waze kunushi Shimbi. Alioze haliabwila Zambi hananupwisa akwa mwono hamwe ni Kristu. Zambi hanatukonekena milonga yetu yeswe.

¹⁴ Hanajimuna Chisoneko cha makongo jetu, jize twabwile najo mumu ha Shimbi jize twashihile. Yaajimuna muze ajihachile ha kulusu.

¹⁵ Ha kulusu Kristu yakumba tachi ja akwa ndundo ni akwa yiyulo. Yaasolola ku meso ja eswe muze aatwalile ngwe funge waze akwachile ha kukumba chenyi.

¹⁶ Ha chino, mutu niumwe kanda anubatwila ha chize munulia, hanji mununwa, hanji ha chikuma cha kufunga matangwa a yiwanyino, hanji Kakweji Mwaha, hanji tangwa lia kuhwima.

¹⁷ Yize yeswe yili chizulie cha yuma yize muyikeza, alioze umwenemwene uli muli Kristu.

¹⁸ Kanda nutayize niumwe kunuhisa mu kunulongesa ha kumwesa mujimba lamba ni kuwayila tunganda a mwilu. Mutu ngwe yoze wakukakaminya kuhiana yuma yize amwene mu Usolwelo. Kakulengumuka, mu manyonga jenyi a uutu, alioze chamokomoko.

¹⁹ Keshi kukakaminya kuli Kristu, we mutwe. Ku tachi jenyi, Kristu kanahoko mujimba weswe, kanaunungu mu makonekeno jawo ni mijiba yawo. We mujimba wakutatuka ngwe chize akuzanga Zambi.

Kufwa ni mwono hamwe ni Kristu

²⁰ Nwafwile hamwe ni Kristu, ni ku kufwa chize hinunatusuka ku chiyulo cha mwiku uze te wakunuyula. Mba kuchi nwakwenda ngwe nuli akwa hashi? Kuchi nwakufunga Shimbi ngwe jino ngwo:

²¹ “Kanda ukwata chino,” “Kanda upaka chize,” “Kanda usunga ko”?

²² Jino jeswe jakutoka, muze akulinga najo. Kujili Shimbi ja atu ni longeso lio.

²³ Chamwenemwene Shimbi jize jinasoloka ngwe ja mana, muze akuwayila nikulita ni manyonga ja uutu, muze akulikehesa ni kwonga cho, muze akumwesa lamba we mujimba, alioze Shimbi jino jeswe kujishi ni tachi ha kuzeyesa usolo ubi wa mujimba.