Kolosu 1 - Mukanda Wa Zambi 1970

Kumeneka

¹ Yami, Paulu, kanganda ka Yesu Kristu ku upale wa Zambi, ni mukwetu Timoteu,

² tunanusonekena, yenu akwa kufuliela waze nwatwama mu limbo lia Kolosu, akwetu amwenemwene mu kulinunga ni Kristu. Zambi Tata yetu anulweze utu, anwehe uhwimino.

Kusakwila Zambi

³ Twakusakwila Zambi, Tato ya Mwene Yesu Kristu, matangwa eswe muze twakunulembela.

⁴ Mumu hitunevu chize nwakufuliela Kristu, ni chize nwakuzanga akwa Kristu eswe.

⁵ Muze maliji amwenemwene, Sango Jibema, januhetele chisuho chitangu, yijinulumbunwina ha kusa mbunge ku chize hananutulikila mwilu. Kashika nuli ni ufulielo ni zango mumu ha yize te nwakusa mbunge.

⁶ Sango Jibema jinamwangana ni jinatwala yiwape yajo hashi heswe. Jalingile nawa mukachi kenu chize ku tangwa lize nwevwile chisuho chitangu hakutwala ku utu wa Zambi, ni kuunyingika pundu chize ubwa.

⁷ Nwajivwile kuli Epafra, mukwa milimo ni mukwetu. Kakulinga hamwe ni yetu. Kali kavumbi wakushishika wa Kristu.

⁸ Hanatunyingikisa zango lize anuhele Mwiku wa Linanga.

⁹ Kashika kutushi kulitwamina kunulembela, chize ku tangwa lize twevwile hakutwala kuli yenu. Twakuliumba kuli Zambi hanga nubwe ni yinyingi yeswe ya upale wenyi, hamwe ni mana ni malinjekela waze akuhana Mwiku wenyi.

¹⁰ Mba munuhasa kubwa ni ndako yize anazange Mwene Yesu, ni kulinga matangwa eswe yize yakumuwahila. Munukema mihuko yeka ni yeka ya yitanga yibema ni munutatuka mu yinyingi ya Zambi.

¹¹ Tunaliumbu kuli Zambi hanga anutakamise ni ndundo jenyi ja uhenya. Mba munuhasa kubwa ni utunu wa kulihumikiza.

¹² Sakwililenu ni uwahililo Tata yoze hananuhashisa kubwa ni Chihanda cha chihinga chize Zambi hanafungu mu Wanangana wa Pangu, mumu hali atu jenyi.

¹³ Mwenawo hanatupulula ku tachi ja milima, hanatututulwila mu Wanangana wa Mwanenyi wa zango.

¹⁴ Mwe Mwanenyi hanatukulu, hanatukonekena milonga yetu.

Yesu Kristu ni yitanga yenyi

¹⁵ Kristu, ku kumoneka chenyi, kanalifu ni Zambi yoze keshi kumoneka. Iye kanahiana yuma yeswe yize atangile Zambi.

¹⁶ Mumu ni kwoko lia Mwanenyi Zambi yatanga yuma yeswe kwilu ni hashi, yize yakumoneka ni yize kuyishi kumoneka, akwa ndundo, ni mianangana, ni miata, ni akwa kuyula. Zambi yatanga yuma yeswe ni kwoko lia Mwanenyi, yayitanga hanga eswe achichimieke mwe Mwanenyi.

¹⁷ Mwenawo te hanabu kulu muze yuma yeswe kanda yichibwa. Mu kulinunga nenyi yuma yeswe yize yatangiwile kanayifungu.

¹⁸ Kali ngwe mutwe wa mujimba, che Chikungulwila, mwe kabutu kacho, mwe mutangu mu kuhinduka ku kufwa, hanga akabwe mulemu Wahiana eswe.

¹⁹ Mumu, Zambi yabatula ngwenyi, ndako jenyi jeswe jisoloke muli Mwanenyi.

²⁰ Zambi yabatula kuwanyisa yuma yeswe ni iye mwene ku yize alingile Mwanenyi. Chenacho awanyishine yuma yeswe ku upale wenyi, yuma ya hano hashi ni ya mwilu. Yachilinga muze ahanyine uhwimino ku kufwa cha Mwanenyi ha kulusu.

²¹ Ni yenu nawa, hatangu nwabwile kusuku ni Zambi. Nwabwile akwa kole jenyi ha yibi yeswe yize te nwakulinga.

²² Alioze haliabwila, ku kufwa cha Mwanenyi mu mujimba wa uutu, Zambi hananuwanyisa nenyi. Hanachilingi hanga anupwise akwa kulinanga ku meso jenyi, abema, ni kunushi kapalia.

²³ Alioze, chanutamba kumana nguu mu ufulielo wenu, akwa kujikiza kanawa. Atu kanda anwonga ha kwehuka yuma yize te nwakusa mbunge, chize kuze nwevwile Sango Jibema. Yami, Paulu, nguli kavumbi ka Sango jino Jibema—Sango jize ambujolele kuli akwa hashi eswe.

Milimo ya Paulu mu Chikungulwila

²⁴ Haliabwila ngunawahilila mu lamba lize nguli nalio mumu hali yenu. Ku lamba liami mu mujimba nakukwasa kumanununa lamba lize linasala lia Kristu, lamba lize Kristu amwene mumu ha mujimba wenyi, che Chikungulwila.

²⁵ Zambi hanangupwisa kavumbi ka Chikungulwila chenyi. Hanangwehe milimo yino ha kunukwasa. Hanangwehe yilemu ya kwambujola Sango jenyi jeswe:

²⁶ Jili chijimbikilo chize chahengamine ku yisemuko yeswe ku miaka yeswe, alioze haliabwila hanachisolola kuli atu jenyi.

²⁷ Mumu Zambi yazanga kwanyingikisa chijimbikilo cha kulumbama ni cha uhenya, chize ali nacho mumu hali atu eswe. Chino che chijimbikilo: Kristu kali muli yenu. Kashika Senu mbunge ngwenu, munukatambula Chihanda chenu cha uhenya wa Zambi.

²⁸ Kashika twakwambujola Kristu kuli atu eswe. Twakutoweza ni kulongesa mutu mweswe, ni mana eswe, ha kuhetesa mutu mweswe mungunu ku meso ja Zambi mu kulinunga ni Kristu.

²⁹ Ha kumanununa milimo yino, nakuhondangana ni kulitachika ni tachi jize akuhana Kristu, tachi jize jakulinga muli yami.