Joele 3 - Mukanda Wa Zambi 1970

Zambi makabatwila mavungu

¹ Mwene Zambi kanambe ngwenyi: “Ha matangwa waze mungukahilwisa uwahililo wa Ayuda ni akwa Yerusaleme.

² Mungukakungulula mavungu eswe hamuwika ni kwatwala ku chikulo cha Yehosafate. Kwenako mungukaabatwila mumu ha yeswe yize haanalingi kuli atu jami. Yaamwangina Aisraele mu yifuchi ya yilambala ni kuhandununa Israele, chifuchi chami.

³ Haanate chela hanga amone waze maazuka funge. Haanalanjisa ana a malunga ni a mapwo mu undungo ha kufweta yitanji ni kulanda vinyu.

⁴ “Yenu akwa membo ja Tiru ni Sidone, ni yenu akwa yifuchi ya Afilistia, yika nunambe kungulinga?

⁵ Hinuneyi prata yami ni oru, hinunatwala ubite wami mu mazuwo ja mazambi jenu.

⁶ Hinunatwala Ayuda ni akwa Yerusaleme kusuku ni chifuchi cho, hinunaalanjisa kuli Agresia.

⁷ Mungukaachiza kuze nwaalanjishile. Mungukanulinga ngwe chize nwalingile ayo.

⁸ Mungukatayiza ana jenu a malunga ni a mapwo kwalanjisa kuli Ayuda. No maakaalanjisa kusuku ku chifuchi cha akwa Sabeane. Yami Mwene Zambi nachamba.

⁹ “Ambululenu sango jino hakachi ka mavungu: ‘Lulikenu ha kuya ku jita; tambikenu tujita twenu a tachi; kungululenu tujita twenu eswe hanga nuye!

¹⁰ Andenu matemo jenu nufule mikwale; andenu poko jenu nufule makunga. Atu alelu alisambe ngwo, tuli yitakame.

¹¹ Lipupwisenu tweyenu yenu mavungu eswe nunajikinyina, kungulukenu mu chikulo.’ ” Mwene Zambi tuma tujita twe, ase no jita.

¹² “Mavungu chaatamba kulilulika eze ku chikulo cha Yehosafate. Kwenako yami, Mwene Zambi, mungukatwama ni kubatwila mavungu eswe waze aajingilika.

¹³ Kaali yingulungulu kuhiana; aabatwile hashi ngwe mbuto ha matangwa a kubatula mbuto; aaliate ngwe chize akuliata vinyu mu ukamino wayo ndoo vinyu muyikapukumuka.”

¹⁴ Tununu ni tununu kaali mu chikulo cha Ubatwilo. Mumu tangwa lia Mwene Zambi lia kubatwila atu hiliakundama.

¹⁵ Tangwa ni kakweji yinalaa bwii matongonoshi haajilala.

Zambi makawahisa atu jenyi

¹⁶ Mwene Zambi kanakulunguza ha mulundu wa Zione; liji lienyi linahiohio ku Yerusaleme; hashi ni lilu yinanyiki. Alioze kumakafunga atu jenyi.

¹⁷ “Aisraele, ha tangwa lize munukanyingika ngwenu, yami nguli Mwene Zambi, Zambi yenu. Kunatwama ha Zione, mulundu wami wa chijila. Yerusaleme mulikabwa limbo lia chijila, yilambala hikeechi kalikumba nawa.

¹⁸ “Ha matangwa waze milundu muyikabwa ni vinyu yinji, ha mindundena yeswe muhakasoloka ngombe; yitwetwe yeswe ya Yuda muyikazala ni meya. Ku zuwo lia Mwene Zambi mukukapukumuka shima lia meya, waze maakatuchikisa chikulo cha Akasia.

¹⁹ “Egiptu makabwa puya, Edome makabwa wahululu, mumu ashile jita ni Ayuda, yaashiha waze te keeshi mulonga.

^20-21 Mungukakala waze haanaashihi; chichi kahichika akwa uhiso ni mwono. Alioze mu Yuda ni mu Yerusaleme atu maakatwama mo ndoo ku miaka yeswe. Henaho yami Mwene Zambi mungukatwama ha mulundu wa Zione.”