Joele 2 - Mukanda Wa Zambi 1970

Kwiza cha makumbi chinalifu ni Tangwa lia Mwene Zambi

¹ Humunenu chitavwi, twenu milolo ha Zione, mulundu wa chijila cha Zambi, mumu ha lamba lize mulikeza. Yenu Ayuda Chikimenu! Tangwa lia Mwene Zambi mulikeza susumuku.

² Mulikabwa tangwa lia milima ni chinyengo, kwilu mukukalauluka ni malelwa bwii. Chizavu chinene cha tujita kaaneza ngwe milima hiyalitanda ha milundu. Chuma chino haanga te kanda chibwa kama, kuchichi kwiza kubwa nawa.

³ Makumbi kaanali yibuta ngwe chize kahia kakwocha mwambu. Kulutwe lio minda yili ngwe minda ya Edene, alioze kunyima lio hiyabwa ngwe puya. Chuma nichimwe chinaachinyi.

⁴ Kaanalifu ni tuvwalu; kaanazomboka ngwe tuvwalu a jita.

⁵ Muze maatumbwoka helu lia milundu, kaanalundumuka ngwe matemba, kaanalukuta ngwe kahia ha mwambu umu. Kaanalilongo ngwe chizavu chinene cha tujita waze haalilulika kwasa jita.

⁶ Muze maakundama atu maachikima; eswe maabwa hongonoo ku meso ni woma.

⁷ Kaanalimika ngwe tujita a tachi; kaananyina ha yipanga ngwe tujita. Ayo eswe kaanayi lume kulutwe, keeshi kuhambuluka mu mikana yo,

⁸ keeshi kulishinjeka. Kaanalicholongoza mu jita, chuma nichimwe kuchaahashile kwakwika.

⁹ Kaanalundumukina ha limbo, kaanatumbwoka ha yipanga; kaananyina ha mazuwo, kaananjilila mu tupenda ngwe eji.

¹⁰ Kulutwe lio hashi haananyiki; lilu linachikima. Tangwa ni kakweji yinalaa bwii, matongonoshi haajilala.

¹¹ Mwene Zambi kakutuma tujita twenyi ni liji lia tachi ngwe kukulunguza cha vula. Tujita twenyi waze anamwononokena kaali anji, kaali ni tachi. Lamba linji mulikabwa ha tangwa lia Mwene Zambi! Iya mahasa kujikiza?

“Alumukenu ku mbunge.”

¹² Mwene Zambi ngwenyi: “Chibwe chocho, alumukenu ku mbunge nuhiluke kuli yami nujile kulia, nulile ni kunenganyana.

¹³ Kanda nutanuna mahina jenu; alioze Sololenu yinyengo ya mu mbunge.” Hilukenu kuli Mwene Zambi, Zambi yenu, mukwa utu ni mukwa keke. Kali chihumikiji, kakumanununa yilakenyo yenyi; matangwa eswe kakululika kukonekena, hi kumwesa ko lamba.

¹⁴ Tangwa likwo Mwene Zambi, Zambi yenu, malumuna kama manyonga jenyi, ni kunuwahisa ni mbuto yinji. Mba munuhasa kumulambula mbuto ni vinyu.

¹⁵ Humunenu yitavwi ha mulundu wa Zione; tambikenu akwa Chikungulwila hanenu Shimbi yakujila kulia!

¹⁶ Kungululenu atu hamuwika; nwalulike ha kulikungulula. Nehenu tushinakaji; kungululenu twanuke ni ana a kemba nawa. Chibwe waze maachilimbata chaatamba kuhichika mazuwo jo ni kwiza.

¹⁷ Mahako waze akulingila Mwene Zambi hakachi ka chilumbilo ni zuwo lia Zambi, chaatamba kulila ni kulemba ngwo: “Mwene Zambi, vwila kama atu je keke. Kanda utayiza mavungu akwo kutulelesa ni kutukekuna nikwamba ngwo: ‘Yolihi Zambi yenu?’ ”

Zambi kanahilwisa chinuno mu chifuchi

¹⁸ Mba Mwene Zambi yevwila chifuchi chenyi chinyengo, yevwila atu jenyi keke.

¹⁹ Yaakumbulula ngwenyi: “Haliabwila mungunwaha mbuto ni vinyu ni maji a olive, mba munuwaha. Mavungu akwo keechi kunulelesa nawa.

²⁰ Munguchiza makumbi waze akatukile ku norde. Mungushinjika amwe a kuli ayo mu puya. Akwa lutwe jo mungwashinjikila mu chitende cha Kufwa, mukana wakusula munguushinjikila mu kalunga lwiji Mediterane. Mijimba yo ya kufwa muyinuka vumba. Mungukoonona mumu ha yibi yeswe yize haanulinga.

²¹ “Akwa minda, kanda nwivwa woma, wahililenu ni chiseke mumu ha yeswe yize Mwene Zambi hanulingila.

²² Tushitu kanda nwivwa woma. Ulilo hiwasoka mwambu wa wisu; mitondo hiyema mihuko yayo, hikwabwa mihuko yinji ya mikuyu ni vinyu.

²³ “Yenu akwa Zione wahililenu, likwizenu ha yize Mwene Zambi hanulingila. Hanwaha vula musazu; hanunokesela vula yoze wa kuzalisa njiji, ni vula wa mubatuko.

²⁴ Ha yizungwilo muhakabwa mbuto yinji, ukamino muukazala to ni vinyu ni maji a olive.

²⁵ Mungukanuhilwishila yize nwatokesele ha miaka yize makumbi alile mbuto yenu. Yami nanutuminyine yizavu ya makumbi ngwe tujita.

²⁶ Munukabwa ni yakulia yinji, munukakuta. Munukachichimieka Mwene Zambi, Zambi yenu, yoze hananulingila yikomokeso. Atu jami hikeechi kaalelesa nawa nichimwe.

²⁷ Hohene, yenu Aisraele, munukanyingika ngwenu, yami nguli mukachi kenu, yami mwene nguli Zambi yenu, kukushi mukwo. Atu jami hikeechi kaalelesa nawa nichimwe.

Tangwa lia Mwene Zambi

²⁸ “Kulutwe mungukamwangina Mwiku wami wa linanga muli atu eswe: ana jenu a malunga ni a mapwo maakambujola yuma yize muyikeza ho. Tushinakaji twenu maakalota yilota, akweze jenu maakamona Usolwelo.

²⁹ Ha matangwa waze mungukamwangina Mwiku wami wa Linanga chibwe muli tuvumbi twenu a malunga ni a mapwo.

³⁰ “Ha matangwa waze, mungukasolola yikomokeso mwilu ni hashi; mukukabwa manyinga, ni kahia, ni malelwa a mwishi.

³¹ Tangwa mulikalaa, ni kakweji makachila ngwe manyinga. Tangwa lia Mwene Zambi mulikeza, tangwa linene ni lia mwongo.

³² Alioze eswe waze maakalemba Mwene Zambi, kumakaalamwina. Ngwe chize Mwene hanambe ngwenyi: ‘Amwe mukachi ka Yerusaleme kumaakachina; waze natongwele kumaasala ni mwono.’ ”