Joele 1 - Mukanda Wa Zambi 1970

¹ Mukanda uno unalumbununa maliji waze ahanjikile Mwene Zambi kuli Joele mwana wa Petuele.

Atu yaalinyenga mumu ha kwenyeka cha mbuto

² Yenu tushinakaji a malunga kanyamenu, mutu mweswe mu Yuda, banjika. Hinunamono kama Chuma chino ha matangwa jenu chibwe ha matangwa ja tushakulu twenu, nyi?

³ Lwezenu ana jenu; no akalweze ana jo, no nawa akalweze Chisemuko cho.

⁴ Chizavu ni chizavu cha makumbi haabwila ha mbuto; yize ahichikile chizavu chimuwika yaayilia kuli chizavu chikwo.

⁵ Yenu akwa kuzengewa, laulenu nulile; lilenu mbimbi yenu akwa kunwa vinyu; yichakata yaha ya vinyu haayenyeka.

⁶ Chizavu chinene cha makumbi hicheza mu chifuchi chetu; kaali ni tachi, kaali anji, kuhasa ka kwalula; mazo jo kaambuka ngwe mazo ja tambwe.

⁷ Heenyeka yichakata ya vinyu yetu, haahulula mitondo yetu ya mikuyu. Mitango yawo haayihula yula, hiyatoma yeswe too.

⁸ Yenu atu, lilenu mbimbi ngwe umwe mwana pwo unalili lunga lienyi nyi hafwa yoze wamutendele.

⁹ Kukushi mbuto chibwe vinyu yakulambula mu zuwo lia Zambi; mahako kaakulila mumu keeshi milambu ya kulambula Zambi.

¹⁰ Minda haayenyeka; ha mavu hamokomoko mumu mbuto hiyafwa. Vinyu hiyoma chau. Maji akuhi.

¹¹ Yenu njimi lishimwokenu; yenu nwakululika vinyu, lilenu mbimbi mumu tiriku, ni masa, ni mbuto yeswe haayenyeka.

¹² Mitondo ya vinyu ni ya mikuyu hiyoma; mitondo yeswe ya mihuko hiyalela, hiyoma. Uwahililo wa atu hiwahwa.

¹³ Yenu mahako nwakulinga milimo ku yilumbilo. Zalenu mianji, lilenu! Yeenu mu zuwo lia Zambi nunongame ni kulila mumu kunushi ni mbuto chibwe vinyu yakulambula Zambi.

¹⁴ Tambikenu Chikungulwila cheswe; kungululenu makulwana eswe ni Ayuda akwo eswe mu zuwo lia Mwene Zambi, Zambi yenu. Hanenu Shimbi ya kulitwamina kulia hanga nulile kuli Zambi.

¹⁵ Mama yami! Tangwa lia Mwene Zambi hiliakundama; tangwa lize Mukwa Ndundo Jeswe meza nikwonona. Mwongo kuhiana!

¹⁶ Makumbi heenyeka mbuto ku meso jetu. Uwahililo wakuhi mu zuwo lia Zambi yetu.

¹⁷ Mbuto yinabolo mu mavu. Mbuto yakutulika mu machila kuyishiko; kashika mazuwo a mbuto haabwa amokomoko, haabuzuka.

¹⁸ Ngombe kaanendangana ni kuteta mumu keeshi ni haze maalia; chibwe yendo ya mapanga kaanamono lamba.

¹⁹ Mwene Zambi, ngunalili kuli yena, mumu mwambu ni mitondo yeswe hiyoma chau, ngwe hiyawema kahia.

²⁰ Chibwe tushitu a mu yambu kaanahwimashana kuli yena mumu yitwetwe ya meya hiyoma chau.