Jobe 9 - Mukanda Wa Zambi 1970

Jobe

^1-2 Ewa ngunanyingika yuma yize. Alioze ngulweze kama chize mutu mahasa kulisambisa ku meso ja Zambi?

³ Ngwe kuchi mutu mahasa kuhamika nenyi? Zambi mahasa kuhula yihula tununu, alioze mutu kechi kuhasa kukumbulula chibwe chisuho chimuwika.

⁴ Zambi kali ni mana ni ndundo kuhiana. Iya makwata nenyi pami, mba matwama kanawa?

⁵ Kakututulula milundu alioze kuyishi kunyingika, kakuyibuzwola ni utenu wenyi.

⁶ Kakunyika hashi nyi muhachikima, ni e manguji jaho.

⁷ Kakwambila tangwa, mba kulichi kuvumbuka, hanji kufuka matongonoshi mba keechi kutemuka.

⁸ Yazazulula lilu ukawenyi, yaliata lukashitu lwa mu kalunga lwiji.

⁹ Yatanga matongonoshi wano: Ursu, ni Muta ni Kawa, ni Kungulwila, ni waze a ku sude.

¹⁰ Kutwahashile kunyingika yikomokeso yize akulinga, yilayi yenyi kuyishi songo.

¹¹ Zambi kakubalika, alioze chishi kumumona, kakuhiana, alioze chishi kunyingika nichimwe.

¹² Nyi machangumuna chimwe chuma, iya mahasa kumukanjisa? Iya mahasa kumuhula ngwenyi: “Yika ayize unalingi?”

¹³ Utenu wa Zambi kuushi kuhwa, chibwe yikwashi ja lukashitu Rahabe yaahetama ku meso jenyi muze alimikine nenyi.

¹⁴ Mba yami kuchi mungumukumbulula, kuchi mungwamba?

¹⁵ Chibwe chishi mulonga chahashile kumukumbulula kwami, changutamba kwita keke kuli Zambi ngaji yami.

¹⁶ Chibwe ngumutambike neye mataya, alioze chahashile kusako mbunge ngwami, kumangubanjika.

¹⁷ Kakungufwenya ni kangonga, kakwokesa mbandu jami chibwe Chishi chitela.

¹⁸ Kasolo kungwecha kutambula kama fuji, kananguwezela lamba ha lamba.

¹⁹ Kuchi, ngumushinjike ni tachi, nyi? Iye mwe mukwa ndundo. Hanji kumutwala ku ubatwilo, nyi? Iya mamukolesa kuya?

²⁰ Chibwe ngubwe mukwa ululi, ku maliji jami mungubwa ngwe ngunahi; chibwe ngubwe mukwa umwenemwene, hindu mulingupwisa mutu mubi.

^21-22 Chishi mulonga, alioze chisolo kusako nawa mbunge. Chazangile nawa mwono, cheswe chimuwika, chibwe akwa ululi chibwe yingulungulu, Zambi matushiha eswe.

²³ Mutu yoze keshi mulonga, nyi mafwa susumuku, Zambi mamuseha.

²⁴ Zambi hanakunjika akwa hashi mu chiyulo cha yingulungulu, hanapupuchiza meso ja ngaji eswe. Nyi hi iye ko, mba mukwo iya?

²⁵ Matangwa jami kaakubalika fujifuji ngwe mutu yoze unazomboka, haanahu, alioze matangwa abema akuhi.

²⁶ Kaakubalika ngwe mato anende fuji, ngwe chize pupa akuhulumuka ni kukwata kashitu.

²⁷ Nyi mungwamba ngwami, munguvulama musongo wami, chichi kubwa nawa ni yinyengo, munguwahilila.

²⁸ Chibwe chocho ngunachikima mumu ha lamba liami lieswe, mumu ngunanyingika ngwami, Zambi kechi kungusambisa.

²⁹ Mba Chenacho yinabu, yika mungufwila?

³⁰ Chibwe ngusane ni sabau (savon), hindu shili yami kuyichi kuhwa,

³¹ Zambi mangumbila mu wina wa malowa, chibwe mahina jami maanguvwila ngenye.

³² Zambi hi mutu ko ngwe yami, mba ngumukumbulule, mba hanga ngukaye nenyi ku chisopelo.

³³ Kukushi niumwe yoze mabatwila Zambi ni yami.

³⁴ Zambi kanda ungumwesa lamba! Kanda unguvwisa sonyi!

³⁵ Yami Chishi woma, munguhanjika lume mumu ngunanyingika mbunge yami.