Jobe 8 - Mukanda Wa Zambi 1970

Bildade

^1-2 Mwiji muka muwecha kuhanjika maliji waze analifu ni kangonga?

³ Kuma Zambi kakubatula ni uhenge, nyi? Kuma Mukwa Ndundo Jeswe kakubinjisa ululi, nyi?

⁴ Ana je kaanakavulumuna, kashika Mwene Zambi haamwesa lamba.

^5-6 Alioze nyi uli mutu mubema ni mukwa ululi, ni kulilembejeka kuli Mukwa Ndundo Jeswe, kachi makukumbulula, makuhilwishila nawa yiwape ye.

⁷ Ubite uze Zambi makwaha, muukahiana uze wabwile nawo hatangu.

⁸ Hula kama hakutwala ku miaka ya tushakulu, zewula longeso lio.

⁹ Yetu tuli azau, kutwanyingikine nichimwe, matangwa jetu muno muze kaali ngwe chizulie.

¹⁰ Alioze tushakulu twetu maakakulongesa, banjika chize anambe:

¹¹ “Ngowa kujakusoka kuze kukushi tenga, nyi? Mbungu kujakusoka kuze kukushi meya, nyi?

¹² Nyi ngwe meya homa, mujilekama kuhiana yibuta yikwo yeswe, chibwe muze kanda yisuhwa ha kuyibatula.

¹³ Yingulungulu kaali ngwe ngowa jize. Muze akuvulama Zambi hikeeshi nawa kuze maasa mbunge.

¹⁴ Ufulielo wo kuuli wamokomoko ngwe Wanda wa chandawuli.

¹⁵ Nyi mutu washachila ha wandajili kuuchi kutanduluka, nyi? Nyi mutu wakwata kwe ku Wanda, mahasa kujikiza, nyi?”

¹⁶ Yivulumunyi kaali ngwe mwambu uze unatatuka ha mwalwa, ngwe mwambu wamokomoko uze wakutanda mu munda weswe.

¹⁷ Miji yawo yakulimbalimba, kuyakukwata ha mawe.

¹⁸ Nyi ngwe wayivunya, niumwe kechi kunyingika muze te wasokela.

¹⁹ Chenacho che kuwaha cha yingulungulu, mba akwo maasalakana.

²⁰ Alioze Zambi keshi kwehuka akwa ululi, keshi kukwasa yivulumunyi.

²¹ Kumakakutayiza kuseha ni kulikwiza nawa.

²² Alioze makevwisa sonyi akwa kole je, mazuwo ja yingulungulu kumaakatoka.