Jobe 7 - Mukanda Wa Zambi 1970

¹ Milimo ya mutu hano hashi hi yikalu ko, nyi? Hi ngwe mukwa milimo ko yoze unahondangana kuhiana, nyi?

² Chili ngwe ndungo yoze unase mbunge ku chihuhumuke, ngwe mukwa mulimo yoze unashimbwila fweto yenyi.

³ Kakweji ni kakweji kali wamokomoko, ufuku ni ufuku shina lamba wika.

⁴ Muze nabomba nakwamba ngwami, “Shimbu lika mukucha?” Alioze ufuku wakutoka, nakulilangumiona ndoo hikwacha.

⁵ Mujimba wami hiwahwa ni mavuno ni majilo, kowa liami liakukala, ni liakulokoka nikutuhuka mashina.

⁶ Matangwa jami kaakubalika nikawashi ngwe ndongo ya mukwa kunuka mahina. Himaasula, chishi kusa nawa mbunge kubwa ni mwono.

⁷ Aa Zambi, iwuluka kama mwono wami uli lume mwiku, chichi kumona nawa yuma yibema.

⁸ Yoze unangumono musono kechi kangumona nawa, shimbu machingutala, susumuku hinaya.

⁹ Ngwe chize lelwa liakwanduka, kulishi kubwako nawa, chenacho yoze maya muma lia afu, kechi kahiluka nawa.

¹⁰ Kechi kuhiluka nawa ku zuwo lienyi, chihela chenyi kuchichi kumunyingika nawa.

¹¹ Ka! Chichi kuhola kwami! Munguhanjika ni kunenganyana ni chimbangwinya mu mbunge.

¹² Zambi, mumu yika hiwangukasa chichize? Unangumono ngwe nguli kashitu musasu wa mu kalunga lwiji, nyi?

¹³ Nyi namba ngwami: “Muhela wami muungulembejeka, muu wami muungutepulula misongo,”

¹⁴ yena wakungukolesa woma ni yilota, wakungubinjisa ni Usolwelo.

¹⁵ Ngunazange akangukakaminye hanga ngufwe, kuhiana kutwama ni lamba.

¹⁶ Hijanguhwa, hinahonga kubwa ni mwono, ngweche, mwono wami hiwasala kuhwima kamuwika.

¹⁷ Mwe mutu kuchi abwa, kashika wakumulemesa, ni kumunyongena?

¹⁸ Wakumunangisa chichamene cheswe, ni kumweseka tangwa ha tangwa.

¹⁹ Ndoo mwiji muka mulitwamina kama kungutala, hingumina kama mate?

²⁰ Nyi hinavulumuna, chibi chika nakulinga kama, yena mukwa kutala atu? Mumu yika wakungukongakonga uta we? Mumu yika hinabwa chiteli kuli yena?

²¹ Mumu yika kuusolo kungukonekena kama mulonga wami? Ni kujimuna kama uhenge wami? Hasala hakepe ngubombe mu fuka liami, muze muukangufupa, kuuchi kangumona.