Jobe 6 - Mukanda Wa Zambi 1970

Jobe

^1-2 Nyi maapezalisa kama lamba liami heswe,

³ kachi te kulema chalio muchibwa kuhiana chize cha masekeseke a mu meya. Kashika maliji jami eswe haabwa akulipupula.

⁴ Zambi Mukwa Ndundo Jeswe hangwasa mivwi, ulembe hiwatanda mu mujimba wami. Chuma chino Zambi anangulingi, ngunachivwila mwongo kuhiana.

⁵ Chimbulu mateta muze anali yambu, nyi? Hanji ngombe mateta muze anali yizungu, nyi?

⁶ Chuma chasaluka maahasa kuchilia, nyi kuchishi mungwa, nyi? Leji lia Konda mahasa kulilia, nyi?

⁷ Chishi kwivwa mate a kulia, cheswe Chuma ngunali nakuchivwa kuzelwoka.

⁸ Kuchi mba Zambi kasolo kungwaha Chuma chize ngunechi? Kuchi mba kasolo kungwivwa?

⁹ Chibema angushihe lume!

¹⁰ Nyi nanyingikine ngwami, machilinga, kachi te mungutumbuka ni uwahililo, chibwe lamba liami lioka naye. Ngunanyingika ngwami, Zambi kali munangi, ndoo ni musono Chishi kumuhangulula.

¹¹ Tachi jika nguli najo jakutwama nawa ni mwono? Kuwaha chika ni kusako mbunge nyi ngunanyingika ngwami, kumungufwa?

¹² Te nguli liwe, nyi? Hanji mujimba wami uli unengu, nyi?

¹³ Chishi nawa ni tachi ja kulilamwina yami mwene; niumwe mahasa kungukwasa.

¹⁴ Mu lamba ngwe lino, changutamba kubwa ni masepa a mbunge jibema, chibwe hinehuka Zambi hanji ka.

¹⁵ Alioze yenu masepa jami, nunangwongo ngwe mingulunga yize yaakuma meya muze vula hiyabatuka.

^16-17 Ha lwiza meya mu njiji kaakukala alioze nyi mwalwa hiwatwa, meya meenda ni maajijiminya hashi.

¹⁸ Yendo ya ngeji kuyakupianguka mu jila ni kufupa meya, kakuchamangina mu puya mba mafwafwa.

¹⁹ Yendo ya ngeji a ku Tema kaakufupa meya, akwa kwendangana a ku Sheba kaakusako mbunge.

²⁰ Hatangu te kaakufuliela, alioze yevwa sonyi muze kaamwene ko nichimwe.

²¹ Yenu nuli ngwe njiji jize kuli yami muze hinwamona lamba liami hinwevwa woma, himunungusosoloka.

²² Te hinanwamba ngwami, ngwehenu chimwe Chuma, nyi? Hanji mwehenu Sanganji sambilo lia uhenge, nyi?

²³ Hanji ngulamwinenu ku kwoko lia umwe mukwa kole, nyi? Hanji ngukulenu ku tachi ja umwe mukwa kungubinjisa, nyi?

²⁴ Ngulongesenu mba nguhole, ngulumbunwinenu haze hingunahengesa.

²⁵ Kwambila mutu ni umwenemwene, kubema cho, alioze kuhanjika chenu, kuchi chinalumbunuka?

²⁶ Nyi nunanyongo ngwenu, yuma yize nunahanjika yili kwayo ngwe fuji, mba yika nunanguhanjikishila yami mukwa kuhuza?

²⁷ Ngunamono ngwe munuhasa kulanjisa mwana shiwa, hanji sepa lienu kutambula mbongo!

²⁸ Achingutalenu ku meso, chichi kuhanjika mahuza.

²⁹ Kunahu, ngwechenu kunguketeka chamokomoko. Echenu kungubatwila, chalingile kwami chibi.

³⁰ Alioze nunayongo ngwenu, ngunahanjika mahuza, nunanyongo ngwenu, chahashile kuhandununa yibi ni yibema.