Jobe 5 - Mukanda Wa Zambi 1970

¹ Jobe achitambika, iya makutaya? Kanganda ka mwilu muka mevwa?

² Ufwatulo wakushiha chihepuke, ukwa wakushiha yoze keshi mana.

³ Yami hingunamono yihepuke waze akulinyonga ngwo, tuli mu uhwimino, alioze susumuku hinashinga mazuwo jo.

⁴ Ana jo kaahashile kuwana uhwimino nichimwe, ku ubatwilo wakuhi yoze maalamwina.

⁵ Mihuko ya mu minda yo, maayilia kuli waze ali ni zala, chibwe yize muyikema hakachi ka mingonga; ubite wo, atu maakauvwila ukwa.

⁶ Kuyindama cha mutu kuchishi kukatuka ku fufuta, chibwe lamba lienyi kulichi kukatuka ku mavu.

⁷ Alioze mutu kakusemuka hanga amone lamba, ngwe maleka a kahia kakuhehukila kwilu.

⁸ Nyi ngwe nguli chize uli yena, kachi munguliumba kuli Zambi, ni kumelweza milonga yami.

⁹ Kutwahashile kunyingika yuma ya kukomwesa yize akulinga, yikomokeso yenyi kuyishi kuhwa.

¹⁰ Kakunokesa vula hashi ni kutuchikisa minda.

¹¹ Zambi kakunangamisa akwa kulikehesa, kakuwahisa akwa kulinyenga.

^12-13 Kakuhepwisa manyonga ja akwa mana, kakwakwachila ku ukanyame wo, keeshi kuyuka ni moko jo.

¹⁴ Chibwe tangwa lili ha muchima, kaali mu milima; ha mwalwa kaakupapata ngwe ha ufuku.

¹⁵ Alioze Zambi kakulamwina yiswale ku kufwa, kakulamwina akwa kuhona kuli waze akwabinjisa.

¹⁶ Kashika yiswale kaakumusa mbunge, alioze yivulumunyi kaakuhola kuluu.

¹⁷ Kawaha yoze akufumba kuli Zambi! Kanda ulelesa kubajila cha Mukwa Ndundo Jeswe,

¹⁸ mumu kakukulemeka, alioze kakukukasa nawa yilonda, kakukulamba, alioze kakukuwuka nawa.

¹⁹ Makakulamwina ku lamba yisuho yisambano, chisuho cha muchishimbiali, chibi kuchichi kakuwana.

²⁰ Ha mwaka wa zala makulamwina ku kufwa, mu jita makulamwina ku mukwale.

²¹ Zambi makufunga ku kulalaminya cha atu; makulamwina ha tangwa lia kufwa.

²² Muuseha ha tangwa lia kufwa ni lia zala, kuuchi kwivwa woma wa tushitu asasu.

²³ Minda yize muulima kuyichi kubwa ni mawe; tushitu asasu keechi kukukwata.

²⁴ Muubwa ni uhwimino mu zuwo lie, yimuna ye kuyichi kutoka nichimwe.

²⁵ Muunyingika ngwe, vungu lie mulioka ngwe mwambu wa mu minda.

²⁶ Ngwe chize tiriku yakutatuka ndoo hiyahia, maakakufunda ni ushinakaji wa tachi.

²⁷ Jobe, yuma yino hitwalilongesa yo matangwa anji, yili Chenacho, yifuliele.