Jobe 42 - Mukanda Wa Zambi 1970

Jobe

¹ Mba Jobe yakumbulula Mwene Zambi:

² Mwene Zambi ngunanyingika ngwami, yena uli mukwa ndundo jeswe, unahase kulinga yuma yeswe yize unazange.

³ Hiwanguhula ngwe: “Kuchi Unahase kuhamika hakutwala ku mana jami, nyi kuwanyingikine nichimwe?” Te nakuhanjika yuma yize Chanyingikine, yikomokeso yize chahashile kunyingika.

⁴ Yena yiungwamba ngwe: “Banjika, mba weseke kukumbulula ku yihula yami.”

⁵ Ha matangwa waze te nakukunyingikina lume kukwambujola cha atu akwo, alioze haliabwila hinakumona ni meso.

⁶ Kashika ngunevu sonyi ha yize yeswe hinahanjika, hinalumuna mbunge, hinatwama mu fufuta ni uto.

Maliji akusula

⁷ Muze Mwene Zambi hahanjika ni Jobe, yambila Elifaze ngwenyi: “Ngunanuvwila wuli yena ni masepa je aali, mumu kunwahanjikile umwenemwene hakutwala kuli yami ngwe chize anakahanjika kavumbi kami Jobe.

⁸ Haliabwila yeenu nwande kuji a ngombe shimbiali ni kuji a mapanga shimbiali, nwize no kuli Jobe, nwalambule mulambu mumu hali yenwene. Jobe manulembela, mba mungwivwa kulemba chenyi, chichi kunuvwsia sonyi ngwe chatamba. Te kunushi kuhanjika umwenemwene hakutwala kuli yami ngwe chize anakahanjika Jobe.”

⁹ Elifaze Katemane, ni Bildade Kashuha, ni Zofare Kanama yaalinga yuma yize aalwezele Mwene Zambi, mba Mwene Zambi yevwa kulemba cha Jobe.

¹⁰ Muze Jobe halembela masepa jenyi, Mwene Zambi yamuwahisa nawa, yamwaha yisuho yaali ya yuma yize abwile nayo hatangu.

¹¹ Anakwo ja Jobe a malunga ni a mapwo, ni masepa jenyi waze atangu eswe yeezaza ni kumunangisa, yaalinga chiwanyino ku zuwo lienyi. Yaamulweza yinyengo yo, yaamutakamisa ha lamba Heswe lize amumwesene kuli Mwene Zambi. Mutu ni mutu yamwaha jimwe mbongo ni kazeya ka oru.

¹² Mwene Zambi yawahisa Jobe ha matangwa jenyi akusula kuhiana waze atangu. Jobe yabwa ni mapanga 14,000, ni tumelu 6,000, ni ngombe 2,000, ni yimbulu 1,000.

¹³ Yasema nawa ana shimbiali a malunga ni ana atatu a mapwo.

¹⁴ Mwanenyi mutangu wa pwo yamuluka jina ngwenyi, Jemima, ni wa muchaali Kezia, ni wa muchitatu, Kerene Hapuke.

¹⁵ Hashi heswe kuhabwile ko mapwo abema ngwe ana ja Jobe. Tato yaaha chihinga ngwe anenyi a malunga.

¹⁶ Jobe yatwama nawa miaka 140, yamona ajikulu jenyi ni tukwata mbuli twenyi.

¹⁷ Mba yafwa muze habwa kashinakaji kuhiana.