Jobe 41 - Mukanda Wa Zambi 1970

¹ Muuhasa kulowa Luchazangombe ni kazambu, hanji kukasa limi lienyi ni muhipu, nyi?

² Muuhasa kubalikisa muhipu mu muhombo wenyi, hanji kutuwa mbangachi jenyi ni suna, nyi?

³ Maliumba hanga umuvwile keke, nyi? Mahanjika ni yena ni maliji a vumbi, nyi?

⁴ Makolesa Usendo ni yena ni kukulakenya akabwe ndungo ye ndoo ku miaka yeswe, nyi?

⁵ Muuhasa kumuhehesa ngwe kajila, hanji kumujichika lwoji hanga ana a mapwo ahehe nenyi, nyi?

⁶ Akwa kusepa maahasa kumukulisa, nyi? Maahasa kumubatwola hanga ahase kumulanjisa, nyi?

⁷ Muuhasa kutuwa kubu lienyi ni mivwi, hanji mutwe wenyi ni makunga a yishi, nyi?

⁸ Achimukwate; kuuchi kweseka nawa; kuuchi kuvulama kubinda chize.

⁹ Mweswawo mamona Luchazangombe malekumuka, malimbuka hashi.

¹⁰ Nyi ngwe mevwa wuli, matenuka kuhiana, niumwe mahasa ku mana ku meso jenyi.

¹¹ Iya mahasa kwasa nenyi jita mba mabwa kanawa? Hashi heswe niumwe mahasa kuchilinga.

¹² Ngweche ngukulweze hakutwala ku molu jenyi, ni unene wenyi ni ndundo jenyi.

¹³ Iya mahasa kumuzula chikuto chenyi cha helu? Iya mahasa kutuwa chikowa chenyi chize chili ngwe yitwa ya jita?

¹⁴ Iya mahasa kubakula mbangachi jenyi jize jakujingilika ni mazo a mwongo kuhiana?

¹⁵ Nyima yenyi yakulinga ni milongo ya kebwe, yili yakununga hamuwika, yikalu ngwe liwe.

¹⁶ Yeswe yakubalakenya ni yikwo, fuji niyimwe muyihasa kubalika mukachi kayo.

¹⁷ Yeswe yakubalakenya hamuwika, chuma nichimwe muchihasa kuyihandununa.

¹⁸ Kakuchihula kahia, meso jenyi ngwe mitemite ya tangwa muze mulichivumbuka.

¹⁹ Ku kanwa lienyi kwakulekwoka milengi, Mwakutuhwoka maleka a kahia.

²⁰ Mu mazulu jenyi mwakutuhuka chishichishi, ngwe chishichishi cha mbungu jinaweme, hanji cha ndeho (yimbia) yinafuluka.

²¹ Mwiku wenyi wakuwika kahia, mu kanwa lienyi mwakutuhuka mulengi wa kahia.

²² Kota yenyi yili ya tachi, eswe waze akumutakana kaakuchikima ni woma.

²³ Misunya yenyi kuyalikwata, yakuumba hamuwika kuyishi kulisunga.

²⁴ Mbunge yenyi yikalu ngwe liwe, ngwe liwe lize akutwa nalio.

²⁵ Muze akukatuka chibwe akwa ndundo kaakwivwa woma, kaakulifwita ni mwongo.

²⁶ Mukwale wakuhela kuwahashile kumutuwa, chibwe kunga linene, chibwe likepe, chibwe mwivi.

²⁷ Iye kakumona utale ngwe mwambu, ni unengu ngwe mutondo wabola.

²⁸ Keshi kuchina mwivi; mawe akukonga kuli iye kaali ngwe yizungu.

²⁹ Mbulo kakuyimona ngwe yiswaswa, kakuseha muze akumukonga makunga.

³⁰ Mahalo a mu jimo lienyi ngwe ye yiyo ya ndeho (yimbia). Muze anende ha malowa kakwavundula ngwe temba lilemu.

³¹ Kakuvundula kalunga lwiji ngwe meya anafuluka, kakuvwelokesa kalunga lwiji ngwe maji anavweloka mu ndeho (yimbia).

³² Kunyima lienyi kakuhichika ko jila yalejima, kakwalumuna meya a kalunga lwiji kubwa fulufulu.

³³ Hashi kuheshi niumwe yoze alifwa nenyi, kali kashitu yoze keshi woma.

³⁴ Kakulelesa tushitu eswe, chibwe waze akulengumuka, kali mwanangana wa tushitu eswe a mu yambu.