Jobe 37 - Mukanda Wa Zambi 1970

¹ Ye fuji yize kuyakuchikimisa mbunge yami.

² Yenu eswe banjikenu liji lia Zambi, banjikenu kukulunguza chinatuhuka mu kanwa lienyi.

³ Kukutuma njaji kwilu kweswe, chize ku songo lia hashi ndoo ku songo likwo.

⁴ Mba liji lienyi liakuhiohia, kukulunguza cha vula ni njaji.

⁵ Liji lia Zambi liakukulunguza ni tachi, mba yikomokeso yinamoneka yize kutwahashile kulumbununa.

⁶ Kakwambila chiwe chiholoke hashi; kakutuma vula munji.

⁷ Kakuvuma milimo ya atu eswe; hanga atu anyingike ngwo, kuma iye Mwene Zambi wakulinga milimo.

⁸ Tushitu a mu yambu kaakunjila mu mena jo,

⁹ Chijimbi chakukatuka ku sude, chakuneha chishika ku norde.

¹⁰ Fuji ya Zambi yakwalumuna meya kubwa chiwe.

¹¹ Malelwa kaakumwanga njaji,

¹² kaakwendangana ngwe chize Zambi anazange, kakulinga yuma yeswe mwilu ni hashi ngwe chize akwamba.

¹³ Zambi kakutuma vula hashi, kakumutuma amwese atu lamba, hanji kwalweza utu wenyi.

¹⁴ Mwata Jobe, achihwimenu nuchibanjike, nyongenu ha yikomokeso yize Zambi akulinga.

¹⁵ Nunanyingika chize Zambi akwambila chisemewa, ni chize akutuma njaji mu malelwa, nyi?

¹⁶ Nunanyingika ye yilayi ya Mukwa Yinyingi Yeswe.

¹⁷ Ka, yenu munumona lume lamba lia chivukuminya, muze fuji ya ku sude yakubinjisa hashi.

¹⁸ Munuhasa kukwasa Zambi kuzazulula lilu ngwe hina, likakole ngwe ngaza ya unengu, nyi?

¹⁹ Mwata Jobe, tulwezenu chize mutwamba kuli Zambi; yetu kutwanyingikine chize mutwamba mumu tuli mu milima.

²⁰ Chichi kuhula nguhanjike ni Zambi. Mumu yika mungumwaha jila ya kungushiha?

²¹ Flaliabwila tangwa linahenye chinji mwilu, mana akulitala akuhi. Lilu liakusoloka ngwe halikomba ni fuji.

²² Talenu mwalwa Ubema unamoneka ku norde, uhenya wa Zambi wakutukolesa woma!

²³ Ndundo ja Zambi jinahiana kwoka, yetu kutwahashile kumukundama. Zambi kali mukwa ululi ni mukwa umwenemwene, keshi kubinjisa atu.

²⁴ Kashika atu eswe akumuvwila woma, alioze waze akulivulwoka ngwo: “Tuli akwa mana”, keshi kwatala liso.